(میجر مھمد کریم پنّام ء مُلّا بھرام)
پنچُمی بھر
داں ھپتگے کپّے ءَ گیش ڈیھ پانپاہیں ھمید ءِ دشت ءَ جلّ اِت اِیں، ھما ھمید کہ آ کُجام پِگر ءِ پاسپانی ءَ پاھُو ءِ ساد ءَ چُکّیت ءُ گْور ءَ کنت۔۔۔۔۔۔۔۔۔۔۔، آ لیکہ راجی آکبت ءِ مانزمان اِنت۔ پہ بلوچ راج ءَ وتی آکبت ءِ سمبھینگ ءَ ھژدری اِنت کہ آ ھمے دِیدانک ءِ رِد ءَ پہ دیمونی ءِ دَیَگ ءَ چکّ ءُ پد مہ بیت، گُڑا آجوئی ءِ سُھرچکّیں بام دِلجماں دْرپش اِیت۔۔۔۔۔۔۔۔۔۔
شھید ھمید ءُ ایدگہ نرمزاریں پُسّگانی دشت ءَ گوں سنگتاں گل ءِ درگت ءَ نِند ءُ نیاد کُت، چہ دشت ءَ پد دیم ہہ میجر باسِت (اسد) ءِ گُلیں دمگ کُلانچ ءَ دات، اے دمگاں کہ ما گْوستگیں ءُ دیم پہ کُلانچ ءَ شُتگ اِیں، اے ھند ءُ دمگ گوں وتی ابرم ءِ جلواناکیاں بے مٹّ بوتگ اَنت، بلے بژن کہ گُلامی ءِ سانکلاں بندیگیں جلواہ گُڈّی ءَ ھمے سما ءَ دنت کہ آئی دْروشم ءُ زیبناکی ھوادگ ھوادگ اِنت، ءُ انچو منی زیردستیں بُوستان ءِ ھمُک پُلّ ءُ وشبو، رنگ ءُ جلواہ۔۔۔۔۔۔۔۔
ما وھدے کُلانچ ءِ نزّیکیں ھلک ءُ میتگاں سر بوت اِیں، گُڑا مارا میجر باسِت ءَ دست گِپت ءُ ما دیم پہ کُلانچ ءِ پاند ءَ جُنزان بوت اِیں۔۔۔۔۔۔۔۔۔۔۔
ما داں کُلانچ ءَ سنگتانی جاہ ءَ سر بوت اِیں گِنداں سنگتاں چہ میتگ ءَ گِستا ڈگارے ءِ سر ءَ بُندر کُتگ۔ روچ جھل کپتگ اَت، شپ ماہ ءِ ھنکین ءَ وتی ستارھی ئیں شار ءَ ماں پوشان اَت، پمشکا ما نان وارت ءُ پہ وپسگ ءَ ھر یکّے گندلانی سر ءَ تچک بوت اِیں، کَوش سُبکّ سُبکّ ءَ کشّگ ءَ اَت ءُ من ءَ سما نہ کپت کہ چوں واب کپت آں۔۔۔۔۔۔۔۔۔
چو مُدامیگیں وڑ ءَ سنگتاں مارا سُھب ءِ سر ءَ مھلہ پاد کُت، چاراں ڈگار ءِ بیلگ (کابیل) ءَ نوکاہے ھست ءُ مئے سنگتانی ورگ ءُ چرگ ءِ آپ ھمیش اِنت، گُڑا من ھمے سما کُت کہ اے دمگ ءَ شالا آپ ءِ کمی اِنت۔۔۔۔۔۔۔۔۔۔۔چہ جُست ءُ پُرس ءَ پد راست بوت کہ اے دمگ ءَ آپ ءِ کمی اِنت، گُڑا ھمد ءَ من ءَ اُستاد منیر مومن ءِ شیئرے گیر اتک
اِد ءَ ھوشم درپانی تھا اِنت
اِد ءَ ھر چمّ تاسے واب گِندیت
ھو! بلکیں اِد ءَ ھر چمّ سرّیچیں تاسے ءُ اُمیت ءِ بیٹ سراں، رُژن ءِ ھساراں، آجوئی ءِ نِوان ءَ، اِیمنی ءِ رھسراں، شادمانی ءِ ھونکّیں ساھگ ءَ، وتی ھورک ءُ ھالیگیں گیابان ءَ واب گِندگ ءَ اِنت۔۔۔۔۔۔۔۔۔۔۔۔۔۔۔۔۔
ءُ اِد ءَ ھر بالاد رنجانی امبارے، زِندان ءِ لھڑیں اِیرگْوات ءَ ودارِ ءِ چانٹ ءَ گوں آزردگیں دِلے نِشتگ ءُ ودارِیگیں چمّاں سھڑینگ ءَ اِنت، اِد ءَ ھر بالاد ءَ تیر سُپتگیں، ٹپّ ءُ ٹوریں، ژانگول ءُ پجّار نہ بیتگیں جون کُوپگ داتگ ءُ جید ءِ میار کُرتگ اَنت۔۔۔۔۔۔۔اِد ءَ ھر ارواہ زدگ ءُ ٹپّی ئیں واھِشتانی کبرِستان جوڑ بوتگ، اِد ءَ ھر دِل تاکچنڈیں موسم ءِ چنکّاں بھارمیچ ءِ گْوانزگ ءَ پہ لیلو لیل نازینک گْوپگ ءَ اِنت، اِد ءَ ھر ساھگ گوں وتی تُنّاپیں واھگاں اُمیتانی شھجو ءَ در رُوپگ ءَ اِنت، اِد ءَ ھر باتِن وتی شِک اِتگیں ارمانانی چنڈّیں شال ءِ پُچّگ ءَ مُلمہ۔۔۔۔۔۔۔۔۔۔۔۔۔
بلے! ایردستی ءِ کورُم ءَ توامیں دوار وتی کَوار ءَ کُتگ ءُ وشّیانی کَوش دمے سھرا نہ بیت کہ گیمرتگیں دِل بود بِہ کنت ، بس اُمیت ءِ مِرمِرانکیں ڈیوا اِنت کہ گوں گْوات ءِ چَولاں لیب کنگ ءَ اِنت۔۔۔۔۔۔۔۔۔۔۔
ھمے ساھت ءَ منی چمّ پہ مُلّا ءُ سنگتانی مُھکمیں بالاد ءَ کپت اَنت، تہ ھمے ھیال اتک کہ واھگ ءُ واھشانی دیمونی دَیَگ ھر یکّے ءِ کار نہ اِنت۔ اگاں یکّے ءَ چہ وت ءَ گیش وتی لیکہ ارزِشت دات، گُڑا آ تئی سِدک دِل ءُ گْواچنیں ھمراھے ءَ ھوار اے جُھد ءِ اندر ءَ کارِست گوناپیں بامردے، انچو مُلّا ءَ بچکند اِت ءُ منی ھیالانی واگ وتی نیمگ ءَ ژپ اِت ءُ گْوشت، ھاں بابُل جان! کُلانچ ءِ بابت ءَ چے جیڑگ ءَ ئے۔۔۔۔۔۔۔۔؟
من ھم پہ کندگ پسّو دات ءُ گْوشت، ھو مُلّا جان جیڑگ ءَ آں شُمئے وڑیں بامردیں ھمراھانی بابت ءَ، جیڑگ ءَ آں تُنّاپیں کُلانچ ءِ درگت ءَ کہ کد سیراپ بیت ءُ بھارانی مِستاگ ءَ گیت۔۔۔۔۔۔۔۔۔، گُڑا مُلّا ءَ پہ بچکندگ درّائینت کہ اے تُنّیگیں ڈگار آپ ءِ بدل ءَ گوں مئے ھوناں سیراپ بیت۔ من پّسو ءَ گْوشت
ھو مُلّا جان! کسے پہ رُوژنائیں آکبت ءُ زیردستیں گُلزمین ءِ موکگ ءَ کہ وتی بُورینگ ءَ درکپتگ۔۔۔۔۔۔۔۔۔۔، آ توکل ءِ ھُدابُند ءَ گیدی ءِ ھِچّ تاکت بُورینت نہ کنت۔ پمشکا بَہ کَول ء میلکم ایکس ” بَرے بَرے ترا تُپنگ ءِ جَھل کنگ ءِ واستا، تُپنگ چِست کنگ هم لوٹ اِیت "۔
راستے کہ پہ وتی ڈیھ ءِ رکّینگ ءَ بھادُریں سر پاد کاینت ءُ دُژمِن ءِ دیم ءَ وتی ڈڈّر ءَ چو تلار ءُ سائجی ءَ مِکّ کن اَنت، بلکیں لگور ءُ بُزدل ابید ءِ جِند ءِ ڈکّگ ءَ دِگہ ھِچّ نہ جیڑ اَنت۔۔۔۔۔۔۔
اے درگت ءَ نامداریں یونانی سیاستدان ءُ شائِر الیگزینڈر پیناگولز کہ زِندان ءِ کُوٹی ءَ دِیوالانی سر ءَ نبشتگ کنت ” من چہ زُوراک ءَ نپرت کن آں، ءُ چہ بُزدل ءَ من ءَ بدّ کَیت” ۔
چہ الیگزینڈر ءَ پد تھامس جیپرسن جاھے گْوش اِیت ” من ءَ چہ گوستگیں زمانگ ءِ راجدپتر ءَ آیوکیں زمانگ ءِ واب دوستر بنت”۔
من مُلّا ھمے داب ءَ دیستگ اَت کہ آ پہ وتی دیستگیں وابانی مانا کنگ ءَ گیشتر ھُدوکی اَت، پرے ھاتِر ءَ آئی لُنٹانی بچکند تو کدی پُرشگ ءَ نہ دیست، ءُ آئی نپرت گوں دُژمِن ءَ ھمے رنگ ءَ سھرا اَت کہ مُدام پہ جنگ ءَ ساجو ءُ چاڑِکّہ اَت، آئی اے نہ جیڑ اِت کہ زندگی سپرے ءُ ما مُساپِر، کُجا ءُ کد ما دم ءَ بالا کن اِیں زانگ نہ بیت۔۔۔۔۔۔۔۔۔، بلے اے سپر ءَ زندگ ھما بالاد مان اَنت کہ شیشاریں کارِستے پیلو کنت، بلکیں آ پہ شیشاریں کارِستے ءِ پیلو کنگ ءَ تیھریں کوھاں بالا، ژیمب ءُ گٹّیں راھاں رھادگ اَت، تْراولیں پند ءِ مُشکلاں آ گیش مُھکم ءُ تمرد کُتگ اَت، پمشکا آ مُدام گِلگ ءُ زنگ جَنَگ ءِ بدل ءَ بچکندگ ءَ اَت، پرے ھاتِر ءَ مزن گِندی ءُ نامداری ءِ زراگ آئی نزّیک ءُ گْور ءَ سھرا نہ اَت، چی ءَ کہ آئی گوں ماتیں گُلزمین ءِ وشبو سماریں ھاک ءَ کَول ءُ اِکرار، اھد ءُ پیمان کُتگ اَت کہ من وت ءَ پہ تئی موکگ ءُ پانپاہی ءَ گار ءُ گُمسار کن آں۔۔۔۔۔۔۔۔۔۔۔۔، بلے ترا ماں زُورگِر ءِ دست ءَ پہ بندیگی چار اِت نہ کن آں۔۔۔۔۔۔۔۔۔۔
بَہ کَول ء واجہ اکبر بارکزئی کہ وتی شیئرے ءِ تہ ءَ گْوش اِیت
کول ءُ اِکرار کن اِیں، اُگدہ ءُ پیمان کن اِیں
گار ءُ گمسار وت ءَ، راج ءَ نمیران کن اِیں
مُلّا گوں وتی جنگول ءُ ملّیں بیلیانی ھمراھی ءَ راج ءِ نمیرانی ءَ درکپتگ اَت، پمشکا وت پہ مُجّتی نمیران بوت۔۔۔۔۔۔۔۔۔۔
روان اِنت۔۔۔۔
***
