من کمانچر بَہ نہ دیستگ بس انسٹاگرام ءَ کدی کدی ھال ءُ ھیوالے بُتگ ءُ بس زانتَگ کہ یک مزنیں ءُ جوانیں اکسکارئے ءُ یک شوکیں انسانے ھم، من ءَ یات بیت سال 2019 اَت من ءَ کمانچر ءِ گندگ سک دلا ات بلے نزانت گندانے یا کہ نا بلے یک روچی من ءُ منی سنگتے پہ وتئی کارانی نیت ءَ بازار ءَ شُتیں گُڑا امد ءَ منی ٹیلپُون ءَ فونے اتک چاراں سنگتیے ءِ فون اِنت من فون چِست کُت ھبر بیت سنگت ءَ گُشت بیا کمانچر اتکگ ءُ ترا لوٹَگ ءَ اِنت من گَل بُتاں کہ مرچی من بلوچستان ءِ مزن استی ءَ گنداں گُڑا امدا ما زوتّ ءَ وتئی کار گیشینتاں دیم پہ سنگت ءِ لوگ ءِ نیمگ ءَ روان بیتیں گُڑا ما کہ سر بیتیں گوں سنگت ءَ ٹیلپُون کُت کہ بیا ڈنا ما اَتکگیں دَر ءِ دپ ءَ اِیں، سنگت اَتک سلام دُروت بیتیں پدا سنگت ءَ گُشت بریں رویں مَجلِس ءَ کمانچر تئی ودار ءَ کنگ ءَ اِنت ترا گندگ لوٹیت من بس وتئی دل ءَ اَمی جیڑگ ءَ تا کہ کمانچر باریں چونیں مردمے ءُ چونیں تب ءِ انسانے بیتیں پرچا کہ اِش کُتگیں گپاں ءُ چم ءِ دیستَگیناں زمین ءُ آزمان ءِ پَرک بیت، ھیر ما شُتیں لوگ ءِ توکا ءُ مَجلِس ءَ سر بیتیں سلام ءُ دُروت بیتیں ءُ نشتیں ءُ ھبر بندات بیت امدا پدا من جُست کُت کہ کمانچر ءَ من ءَ پیشدارے شُمے تہا کمانچر کُجام اِنت؟ کمانچر ءَ امدا مزاک ءِ توکا دگہ سنگتی ءِ نیما وتئی دَست دِراج کُت ءُ گُشت اِش اِنت، ءُ پدا وت کندگا لگیت گُڑا امی دمان ءَ سنگت ءَ گُشت من نیا کمانچر اَمشے ءِ جِند اِنت مَسکرا کنگ ءَ اِنت! منی کیرا گپ ھچ نیست اَت من بس گُشت دگہ تو وش جوڑے تئی مھلوک وشاں یلاکا وش بیتا؟
گُڑا دَراینتے کہ کُل وشاں من ھم یک ئے سرا ءَ برابراں، من گُشت ھُدا وش بکنت ءُ وشّ باتے! گُڑا منی ھمراہ ءَ جُست کُت زوھیر شُما نیارتا گوں؟
کمانچر ءَ پسّہ دات کہ نا یار زوھیر ءَ کمی کار بیتگ ءُ دگہ نیمگے شُتگ ھیاگ نبیتگے!
منی جندا کمانچر ءِ یک ھبری ءِ سرا بِے باور نبیتگ کہ کمانچر یک کوانیں ماڈلیں ٹیلپُونے ءِ سرا چوں چوشیں جوانیں اکسکاری کُت کنت مُدام وت ھم امیں گپ انسٹاگرام ءَ لایب ءَ جتگے کہ من یک کونیں نوکیا ءِ سرا اکس کاری کناں بلے من ءَ بِے باور نبیتگ!
من مُدام مسیج کُتگ ءُ جُست کُتگ من ءَ تئی ٹیلپُون ءَ چی شرتریں ٹیلپُونے گوں ءُ دی ایس لِر کیمرھے ھم بلے منی گُما تئی وَڑا اکسکاری نہ بیت، من ءَ مزاک ءِ سرا گُشتے تو گُڑا کیمرہ ءِ وَڑا نزانے کیمرہ ءَ بِدے من ءَ!
من گُشت کُربان اَڑے تئیگیں کُجا دیم ایش بدیاں؟
اَڑے پُل من مزاک کناں تئی اکس شوک اَنت جوان اَنت بس پوٹوگراپی کنان بکن وتئی یلاکا ءِ ءُ دَمگاں پیشدران بکن ھرکسا!
کمانچر ءَ من ءَ مُدام دلبڑی دات من مرچی امی گپاں یات کناں ءُ امی سرپد باں کہ کمانچر منی اُستاد بیتگ! ءُ پدا ما کایں دیوان ءَ، من کمانچر جُست کُت کہ تئی امی ٹیلپُون کُجیں کہ تو امیشی ءِ سرا اکسکاری کنے؟ پدا کمانچر ءَ دمان ءَ پسّہ دات کہ من نیارتگ گوں! من ھم ھچ نہ گُشت! منی زند ءِ کار باز اِتا گُڑا ما سنگت اِجازت کُتاں کہ مارا اِجازت بِدے اِت کہ مارا کار اَست شُما باندا بیا اِت منی کیرا سُبارگ ءَ، گُڑا کمانچر ءَ گُشت کہ ما باندا رواگیں جاھے ءَ باندا نہ بیت ءُ پُنشی ما راویں کیچ ءَ پدا زندگی بیت الم کایں، من گُشت ھیر اگاں نہ شُتے الم بیا اِت، گُشتے ھیر بیت اِنت اِنشااللّہ گُڑا ما اجازت کُتاں ءُ درکپتیں!
بس کدے کدے ھال یوال بُت وھد گوازان بُت یک روچے کمانچر ءَ من ءَ ھال کُت کہ کُجاے؟
من گُشت گْوادر ءَ! پدا گُشتے تو کاری بکن، من گُشت بگُش، تو بُرو اَنیتا جلیل ءِ کیرا لھتیں کتاباں دست بگرے شاہین ترانسپورت ءَ بدی ئے تُربَت ءَ گون کنے گوں، من انیتا گُشتگ کہ سنگتے کیت بدی ءِ من گُشت شریں! چَدو پیسر نہ من انیتا جلیل دیستگ نہ کہ انیتا جلیل ءِ لوگ، ھیر من سنگتے مسیج کُت جُست کُت کہ تو انیتا جلیل ءِ لوگ دیستگاں؟ گُشت ھو من گُشت منی ھمراہ بے منبءَ کاری اَست لھتیں کتاباں امود ءَ دست گرگی اَنت ءُ تربت ءَ دیم دیگی اَنت گُشتے شریں! بلے کدی؟ من گُشت مرچی بیگاہ ءَ! گُشتی شریں گُڑا بیگاہ بُت ما شُتیں انیتا جلیل ءِ لوگا کتاب دست گپتاں شُتیں ترانسپورت ءَ داتاں ءُ من کمانچر ھال کُت کہ من کتاب گون کُتگاں کتابانی اکس تئی وٹسپ ءَ دیم داتَگ گُشتے منتوار!
وھد گوازان بُت ھال ھوال بیان اَت بلے پدا نہ من کمانچر دیست ءُ نہ کہ کمانچر ءَ من ءَ بس کدی کدی ھال ءُ یوالی بُت انو لاتیں روچ ساری یکی ءَ استوری ءَ اِیر کُتگ اَت کمانچر مریز اِنت من دلا گُشت اے بزگ مُدام مریز اِنت ھُدا اشیا وش بکنت!
گُڑا لاتیں روچ گُواست بلے تو وشّ نہ بُت ئے 16 اپریل ءَ سنگتی ءَ وٹسپ ءَ استوری ءَ جتگ اَت کہ، آہ کمانچر ھُدا ترا جنت نسیب بکنت۔۔۔۔
من نہ سنگت مسیج کُت نہ کہ دیگہ کسے ءَ گوں ھال کُت شُتاں انسٹگرام ءَ چاراں جمال بلوچ ءَ ھم اکس جتگ گُڑا نی من باور کُت کہ تو نیستے! بلے کمانچر تو گپے زانے ترا چو اشتاپ ءَ چو زُوت رواگی نہ اَت ترا اَنگت گوں وتی کیمرہ ءَ باز اکسکاری کنگی اَت ءُ ترا باز پند بُرگی اَت، بلے ھُدا تئ جاہ ءَ مُدام وش بکنات رُخصت آف آواریں کمانچر۔
” سلام دیدگاں تئی “
( کمانچر بلوچ ءِ نام ءَ )
ندارگانی لاڈُکی ءِ..
لاڈکیں تو سنگت ءِ..
زمین ءِ رنگ ءَ زندگ ءِ..
شُلُنچ ءِ اکس بے مثال..
نگاہ ءِ تُنّی ایں زر ءَ..
ھمے کہ رنگی ایں تئ جھان ءَ..
ایر باں کدم..
تو بےکساس دوست بئے..
دل ءُ ھیالاں پچگرءِ..
بلوچ ءِ زندمانی ءِ..
عزابیانی ءَ پولگ ءَ..
اے کِسّہ ءِ پہازگ ءَ..
سلام دیدگاں تئی..
سلام دیدگاں تئ..
” مولُم چراگ “
***
