بلوچ مزاھمت ءُ آجوئی جنگ یک دْراجیں پندے کہ بلوچ راج ھمے جنگ ءِ آماچ ءُ جنگ کنان دیم پہ مِنزل ءِ نیمگ ءَ رَوَگ ءَ اِنت۔ اے درگت ءَ بلوچ ءَ گوں بازیں زُوراک ءُ زُورگِراں جنگ کُتگ، پہ درور پرتیگیزی، ترکمان، اَرب، پارس یا پرنگی زُوراکیں تاکت بباں، اِیشاں بلوچ راج ءِ سر ءَ گوں وتی تاکتاں اُرش کُتگ، بلے بلوچ راج پُروش دات نہ کُتگ، بلے یک نادْراھی یے
بلوچ تہ ءَ دور داتگے کہ آ ناتِپاکی اِنت۔
بزاں بلوچ ءَ را وت ما وتی ٹکّ ءُ بولکی سیت ءُ نپّانی ھاتِر ءَ میڑینتگ، بلوچ راج ءَ را نِزور کنگ ءِ رِپک ءُ پندل، ھیلا ءُ ھُنر ساز اِتگ۔ گُڑا بلوچ ھمے پندلانی آماچ بیت ءُ چہ ھمے پندلانی موچکین ءَ پرنگی سوبین بیت۔ چہ ھمے ناتِپاکی ءِ سَوَب ءَ پرنگی ئیں زُوراک وتگڑیں کالونی پاکستان ءَ جوڑ کنت ءُ مُلکے ءِ نام ءَ دیم ءَ کار اِیت، پدا ھمے نام گِپتیں ریاست پاکستان بلوچ راج ءِ وت ما وتی ناتِپاکی ءَ گِند اِیت، چہ پرنگی ءَ سِکین زُور اِیت ءُ 27 مارچ 1947 بلوچ راج ءِ سرڈگار بلوچستان ءِ آجوئی ءُ وتواکی ءِ بستار ءَ ھلاس کنت ءُ گُلام دار اِیت۔
چہ ھما روچ ءِ کْوزہ ءَ پد روچ ء مروچی بلوچ راج زُورگِریں پاکستان ءُ لبّ وریں نوابانی ھِلاپ ءَ جنگ ءَ اِنت، بلے اے بلوچ راج ءِ وش بھتی اِنت کہ مروچیگیں جنگ کہ 2002 ءَ یک پکری ءُ سیاسی ادارے ءِ بُنیاد ءَ بِندات بیتگ ءُ چہ گْوستگیں جنگاں جُتا اِنت۔
پرچا کہ گْوستگیں جنگ لھتیں ٹکّ ءُ ھنداں بیتگ ءُ چہ سیاسی، پکری ءُ اداری بُنیاد ءَ نہ بیتگ۔ مروچیگیں جنگ ءَ بی ایس او ءِ، اَندُلھز کُرد ءُ اِیسُپ مگسی ءِ پِکر ءُ لیکھانی برورد اِنت کہ مروچی 22 سال اِنت کہ دیم ءَ جُنزان اِنت، پمشکا اے جنگ ءِ سوبمندی اِنت کہ مروچی اے بلوچ ءِ کلیں ھلک ءُ دمگاں تالان اِنت ءُ اے جنگ ءَ بلوچ راج ءَ وتی ھیشی ئیں سرانی کُربانی داتگ ءُ انگت دَیَگ ءَ اِنت۔ اے جنگ ءِ تہ ءَ مئے زالبُولانی بازیں مزنیں دستے ھم ھوار اِنت۔
اے جنگ ءَ چہ پیش بازیں جنگے ٹکّ ءُ بولکی دْروشم ءَ دیم ءَ اتکگ، پمشکا آ جنگ داں دیر برجاہ نہ منتگ۔ ءُ ھمے رنگ ءَ چہ آ جنگاں مکران ءِ مردُم پوہ ءُ سرپد نہ بیتگ اَنت۔ مروچیگیں جنگ پِکری ءُ ادارھانی دْروشم ءَ دیم ءَ رَوَگ ءَ انت۔ مکران ءَ بِہ گر تاں تمامیں بلوچستان ءَ یکشلہ برجاہ اِنت۔ اے بی ایس او ءِ سنگتانی تربیت، سیاسی راھشُونیانی مُزّ برورد اِنت مروچی مکران جنگ ءِ بُنجاھی دْروشم ءَ دیم ءَ اتکگ ءُ اے جنگ ءَ مند ءِ ھند شھدائے مُرگاپ ءِ ھند گْوشگ بیت۔
مرچی ما کہ گْوستانک ءَ چار اِیں، گُڑا اے گُلزمیں ءِ دامُن ءَ بازیں سنگتانی ھون رِتکگ ءُ بازینے شھید بیتگ۔اے درگت ءَ مَنْد ءِ شھیدانی لیڑ لڑ ءَ مُلّا بھرام بلوچ گوں وتی ھپت کُنگُریں ھمبلانی ھمراھی ءَ 22 پروری 2023 ءَ دوکوپ ءِ ھند ءَ دُژمِن پاکستانی لشکر ءِ کاروانے ءِ سر ءَ یک اُرشے ءَ پد 23 پروری ءَ پاکستانی لشکر ءِ ڈرون ءُ بالگردانی آپریشن ءَ شھیدی ءِ جام ءَ نوش کنت ءُ پہ شرپ گُلزمین ءِ سالونک بَہ اَنت۔
مُلّا بھرام مئے مند ءِ ھند گوبرد ءِ جھمِنند بیتگ۔ اے جنگ ءُ آشوبی دور ءَ منی گون ءَ شھید مُلّا بھرام جان ءَ اولی دیدار من دشت زرین بُگ ءَ بی این ایم یک پچیں راجی مراگشے ءَ 2014 بیتگ، اے مراگش بی این ایم ءِ کاگشاد شھید ڈاکٹر منان جان ءِ پاگواجھی ءِ برجم دارگ بیتگ۔ وھدے کہ مراگش سرجم بیت، ما شھید ڈاکٹرمنان جان گوں سنگتان واتر مند ءَ رھادگ بَہ اِیں، گُڑا شھید بھرام جان گون وتی ٹولی ءِ سنگتاں مئے ھمراھداری ءَ کنت ءُ مارا گوبرد ءَ سر کنت۔
ھمے وڑ ءَ مُلّا بھرام جان ءِ یک بلاھیں کِردے تھنا گوں جنگی پِڑ ءَ نہ بیتگ، بلکیں بی این ایم ءِ تہ ءَ یک مزنیں جوانیں سیاسی کِردے ھم بیتگ۔ مُلّا بھرام جان یک جوانیں جنگولے، یک شرّیں سیاسی باسکے ءِ ھمراھی ءَ یک ملنگ ءُ درویشں ھمبلے بیتگ۔ مدامی گوں دیوان ءُ مجلِساں، گوں وتی وشیں کندگاں سنگت دلگوش کُتگ اَنت۔
من مدامی بھرام جان ءَ گوں مجلِس ءُ دیوان کُتگ، گُڑا بھرام جان ءَ مارا گوں وتی شھدیں کندگ ءُ ٹھکاں دلگوش کِرتگ اَت۔ 2014 ءِ وھد ءَ مند ءِ دمگ ءَ سیاست کنگ یک وابے بیتگ، بلے مُلّا جان ءَ وتی جنگی زِمہ واریاں گوں ھوار بی این ایم ءِ سیاسی چِست ءُ اِیر ھم پیلو کُرتگ اَنت، بلکیں یک شریں وڑے ءَ بی این ایم ءِ تنزیم کاری گوں مند ءِ سنگتاں برجاہ داشت۔
ھو مُلّا بھرام جان! وھدے کہ من 23 پروری 2023 ءِ روچ ءَ بیگاہ ءِ موسم ءَ تئی پُرمھر ءُ کندوکیں شھیدی ءِ جون چہ رسانکدر ءَ دیست، من گوں تئی شھیدیں جون ءِ مھر دپیں کندگاں دلگوش بیت آں۔۔۔۔۔۔۔
من ھیال ءُ جیڑگ ءَ پد ھمے سما کُت کہ مُلّا تو شموشگ نہ بَہ ئے، ترا اے کوہ ءُ ڈوک، درچک ءُ دار، جنگل ءُ گیابان، تانسریں بلوچستان ترا گیر کار اِیت ءُ تو پہ مُدامی ابدمان۔۔۔۔۔۔۔۔
***
