بلوچستان کے ضلع پنجگور میں گزشتہ شب مسلح افراد کی جانب سے اہم چوک کی ناکہ بندی کے بعد فورسز اور مقامی ڈیتھ اسکواڈ کے کارندوں کے ساتھ شدید تصادم کی اطلاعات موصول ہوئی ہیں، جس کے نتیجے میں جانی نقصان کا خدشہ ظاہر کیا جا رہا ہے۔
مقامی ذرائع کے مطابق، مسلح افراد نے گزشتہ رات 11 بجے سے رات 2 بجے تک پنجگور کے علاقے تاسپ میں واقع اہم ‘اسٹار چوک’ کو مکمل طور پر بلاک کیے رکھا۔ اس دوران پاکستانی فورسز اور ڈیتھ اسکواڈ کے مسلح اہلکاروں کے ساتھ مسلح تصادم شروع ہو گیا جس میں شدید فائرنگ اور دھماکوں کی آوازیں سنی گئیں۔
ذرائع کے مطابق اس جھڑپ کے نتیجے میں متعدد جانی نقصان کی اطلاعات ہیں، جبکہ 3 زخمی افراد کو فوری طور پر نجی گاڑیوں اور ایمبولینس کے ذریعے علاج کے لیے اسپتال منتقل کیا گیا۔ زخمی ہونے والے افراد کی شناخت حمزہ، توصیف اور دیدگ کے ناموں سے ہوئی ہے۔
علاقائی ذرائع کا کہنا ہے کہ ڈیتھ اسکواڈز کے مسلح کارندے ریاست کی سرپرستی میں خطے میں سرگرم ہیں اور ان کی آپسی چپقلش یا فورسز کے ساتھ تصادم کی وجہ سے عام آبادی شدید خوف و ہراس کا شکار ہے۔ واقعے کے بعد علاقے میں سیکیورٹی کی صورتحال انتہائی کشیدہ ہے۔
