بلوچ نیشنل موومنٹ کے رہنما رحیم بلوچ ایڈووکیٹ نے سماجی رابطے کی ویب سائٹ ایکس پر اپنے ایک بیان میں کہا ہے کہ بلوچوں کی جبری گمشدگی اور ماورائے عدالت قتل پر پاکستانی فوج اور خفیہ اداروں کا بیانیہ آج بھی وہی پرانا جھوٹ ہے جو اسد اللہ مینگل اور احمد شاہ کرد کی جبری گمشدگی اور قتل کے وقت ذوالفقار علی بھٹو کو بیچا گیا تھا۔
انہوں نے کہا کہ آج بھی فوج اور سکیورٹی فورسز بلوچوں کو ان کے گھروں اور عوامی مقامات سے اغوا کر کے خفیہ اذیت خانوں میں منتقل کرتی ہیں، جہاں انہیں دنوں، مہینوں بلکہ برسوں تک لاپتہ رکھ کر اذیتیں دی جاتی ہیں۔اس کے باوجود ڈی جی آئی ایس پی آر ڈھٹائی سے دعویٰ کرتا ہے کہ لاپتہ بلوچ فورسز کی تحویل میں نہیں بلکہ پہاڑوں، افغانستان یا ایران میں ہیں۔
رحیم بلوچ نے کہا کہ حکومت، پارلیمان، عدالتیں اور ضمیر فروش میڈیا اس جھوٹے بیانیے کو سچ ثابت کرنے میں لگے رہتے ہیں، جبکہ پنجاب کے عوام بغیر سوال کیے اسے مان لیتے ہیں۔
