بلوچستان کے ضلع کیچ کے مرکزی شہر تربت کے قریب کیساک کے مقام پر گزشتہ رات سی پیک روڈ پر ایک ہولناک ٹریفک حادثہ پیش آیا، جس کے نتیجے میں 3 افراد ہلاک جبکہ ایک شخص شدید زخمی ہو گیا۔
عینی شاہدین کے مطابق حادثہ اُس وقت رونما ہوا جب ایک تیز رفتار گاڑی سامنے سے آنے والی تیل بردار زمیاد سے ٹکرا گئی۔ تصادم اتنا شدید تھا کہ 3 افراد موقع پر ہی دم توڑ گئے۔
ہلاک ہونے والوں کی شناخت شاہ جان ولد رحیم بخش اور نعیم ولد نبی بخش (ساکنان ہیرونک) جبکہ بہادر ولد ہاشم (سکنہ شاپک) کے ناموں سے ہوئی ہے۔
حادثے میں ڈاکٹر شبیر ولد میراں شدید زخمی ہوئے جنہیں قریبی اسپتال منتقل کیا گیا، جہاں ان کی حالت تشویشناک بتائی جا رہی ہے۔
پولیس نے واقعے کی تحقیقات شروع کر دی ہیں جبکہ مقامی افراد نے سی پیک روڈ پر ٹریفک قوانین پر سختی سے عمل درآمد کا مطالبہ کیا ہے۔
