بلوچستان میں جبری گمشدگیوں کے خلاف وائس فار بلوچ مسنگ پرسنز قائم دنیا کی طویل اور پرامن احتجاجی کیمپ تنظیم کے ایگزیکٹو کمیٹی کے رکن نیاز محمد کی سربراہی میں کوئٹہ پریس کلب کے سامنے آج بروز بدھ 5969 ویں روز جاری رہا۔
وائس فار بلوچ مسنگ پرسنز کے چیئرمین نصراللہ بلوچ نے کہا کہ جناح روڈ کوئٹہ سے 27 اگست کو جبری گمشدگی کا شکار ہونے والا نوجوان ثاقب بزدار بازیاب ہوگیا ہے۔
انہوں نے کہا کہ ثاقب بزدار کے کیس کو تنظیمی سطح پر کمیشن برائے جبری گمشدگی اور بلوچستان حکومت کے سامنے پیش کیا گیا تھا، جس کے بعد 9 اکتوبر کو کمیشن نے اس کیس پر قانونی کارروائی کا آغاز کیا تھا۔
وی بی ایم پی کے چیئر مین نصراللہ بلوچ نے اپنے بیان میں کہا کہ ثاقب بزدار کی بازیابی ایک مثبت پیش رفت ہے، تاہم اب بھی سینکڑوں بلوچ لاپتہ افراد کے اہلِ خانہ اپنے پیاروں کی واپسی کے منتظر ہیں۔
انہوں نے حکومت اور متعلقہ اداروں سے مطالبہ کیا کہ تمام لاپتہ افراد کو بازیاب کرایا جائے اور جبری گمشدگیوں کا سلسلہ ختم کیا جائے۔
نصراللہ بلوچ نے کہا کہ وی بی ایم پی جبری گمشدگیوں کے متاثرین کی آواز کو پرامن اور قانونی دائرے میں رہ کر اُٹھاتا رہے گا تاکہ ہر شہری کو آئینی و انسانی حقوق کی ضمانت فراہم کی جا سکے۔
