بلوچستان کے علاقے پنجگور اور قلات میں پاکستانی فورسز نے باپ بیٹے سمیت 3 افراد جبری طور پرلاپتہ کردیئے۔
ضلع پنجگور سے اطلاعات موصول ہوئی ہیں کہ فورسز نے عیسیٰ تاناپ کے علاقے میں ایک گھر پر چھاپہ مار کر باپ اور بیٹے کو حراست میں لینے کے بعد لاپتہ کردیا ہے۔
مقامی ذرائع کے مطابق، حراست میں لیے گئے افراد کی شناخت عبدالقادر اور امجد کے ناموں سے ہوئی ہے۔
بتایا جا رہا ہے کہ فورسز نے گزشتہ شب علاقے میں کارروائی کرتے ہوئے مذکورہ افراد کے گھر کا محاصرہ کیا اور دونوں افراد کو اپنے ساتھ لے گئی۔ جس کے بعد سے عبدالقادر اور امجد کا کوئی پتہ نہیں چل سکا۔
دوسری جانب قلات سے فورسز نے مستونگ کے رہائشی نوجوان کو جبری طور پر لاپتہ کردیا۔
قلات میں مزدوری کرنے والے نوجوان عبدالناصر ولد عبدالخالق سکنہ کھڈکوچہ، مستونگ کو فورسز نے گیارہ اکتوبر کو قلات کے علاقے کوہنگ سے اس وقت جبری طور پر لاپتہ کردیا جب وہ صبح کی نماز پڑھنے جارہا تھا۔
تین دن گزرنے کے باوجود نوجوان کے حوالے سے کوئی خبر نہیں ملی ہے۔
حکام نے بھی اس حوالے سے تاحال کوئی موقف پیش نہیں کیا ہے۔
