بلوچی زبان ءُ گوگل | میجر مجید

0
39

بلوچ گُشنت کہ اُشترءَ ھِرّے آؤرت کس سھی نہ بیت، بلئے کُکڑءَ ھیکے دات سجھیں بازار ے سرا زُرت۔

اے دْرچءَ بلوچ راج پھاز، زبان پھاز، بامرد ءُ لبزانکی سرمچار سنگت محمد جھانگیرءِ جُھد ستا کرزنت کہ واجہءَ پہ بے تواری وتی کار سرجم کت ءُ بلوچی زبان بُرت ءُ ماں گوگلءَ سر کُت۔ اے کار آئیءَ باز اگل مندیءُ رازداریءَ کت، پاشک ے نہ کُت، پرچا کہ اگاں پاشک ے بہ کتیں بکشوءِ چلوپگ کار ءُ چِریک اے ڈولیں کارانی دیمرویءَ نیلنت، بلئے واجہءَ پہ اگل مندی وتی کار دیما بُرت، پرے مزنیں کارءِ سرجم کنگءِ درگتا قوم ءُ مہلوک اندگہ جھدکاریں سنگتانی منتءَ مہ گیپت، گڑا زیادہی یے بیت۔ چوش کہ ڈاکٹر غفور شاد، عبداللہ دشتی، ہیبتان عمر، پروفیسر بالاچ بالی، مھتاب جھکرانی، اشفاق بلوچ، جُنید قادر ءُ اندگہ بازیں بلوچ جھدکار ءُ کلمکارانی کہ آیانی کُمک گون بوتگ انت۔ اے درگتا لس بلوچانی کمک ہم ھوار انت ءُ اے سنگت منی یا دگرےءِ توسیپ ءُ ستا ءُ وڈّمءِ مُہتاج نہ انت۔ بلوچ گُشیت اُشتر وتی بارءَ وت بارت، بلئے واجہءِ جی ءُ جانءَ لوٹیت۔

بلوچی زبانءَ را ماں گوگل ٹرانسلیشنءَ سر کنگ جْوانیں مستاگے۔ چونائیا بلوچ راج پھازاں سک باز کُربانی داتگ، بلئے وتی ڈِیلّ اش وت وڈّم نہ داتگ انت، بلئے جھدکار زانگ بیت، ہر چُنت کہ وتا چیر بہ دنت، روچے نہ روچے زانگ بیت۔ انچش کہ محمد جھانگیر ءُ آئیءِ ھمکارانی جھد مئے دیما پدر انت ءُ بلوچ راج اے دابیں جھدکارانی سرا پھر بندیت۔ اے دابیں جھدکار راجءِ جْوانیں آکبتءِ مانزمان انت۔

ہر یک راجے بہ بیت ورنا دیمروی کارانی سروک بنت۔ مروچی پہ زبانانی دیمرویءَ رسانکدرانی مزنیں ارزشتے ءُ بلوچی زبان ہم چو اندگہ زبانانی دابءَ مزنیں ءُ کْوہنیں زبانے، بلوچی زبانءَ ماں گوگلءَ جاگہ دیگءَ گوگلءِ واکدار ءُ منسبدارانی منت گرگ ہم المی انت۔

محمد جھانگیر بلوچءَ گوں وتی سنگت ءُ ہمکاراں وتی اے بے بھائیں کار کت، نی چد و دیم کُلیں بلوچ راجءِ ورنا، زانوگر ءُ ادبی گلانی فرض اِنت کہ اے جھدءَ دیما بہ برنت ءُ ٹرانسلیشنءِ اڑ ءُ جنجالانی گیشینگءَ گوں محمد جھانگیر ءُ آئیءِ ہمکارانی کُمکءَ بہ کننت۔

یک فردے کُلیں کاراں کت نہ کنت، اے کار قومی کارے، بائد انت کہ کُلیں قوم وتی بھرءَ ہم بہ دنت گوں۔ ہرکسی کہ دستءَ چیزے بیت وتا گون بہ گیجیت۔

نی چد و دیم ہمے ٹرانسلیشنءِ کارءِ پش کپتگیں بھرانی سرجم کنگءِ جھد کنگ بہ بیت تاکہ ہرچ کمی ے کہ منتگ آ کمی پیلو کنگ بہ بنت۔ بلوچ ورنا ءُ کلمکار اے دْرچءَ کارءَ انت، اُمید اِنت کہ جْوانیں آسرے دیما کیت ءُ بلوچی زبان چو اندگہ دیما شتگیں زبانانی دابءَ دیمروی کنت ءُ جْوانیءَ پجّارگ بیت۔

یکبرے من پدا محمد جھانگیر ءُ آئیءِ سنگتانی منتءَ گراں۔
سید ھاشمی گُشیت:
راجے کہ بہ بیت گُنگ نہ مانیت، نہ مانیت
مانیت پہ اَدارُّکے بزاں زندگءَ مُردار

بلوچی زبان سبز ءُ مَیزران بات
بلوچی زبانءِ بدواہ سرنگون بات انت

***

LEAVE A REPLY

Please enter your comment!
Please enter your name here