وتن ءِ مِھر ءُ مات ءِ مِھر یک وڑ ءَ سوچ اَنت۔ ماں شپی پاساں ترانگ ءُ اومان ترا پیچ اَنت۔ درانڈیھی سک گْران اِنت۔ درانڈیھی ءِ درداں ھما مردم زانت کہ وت درانڈیھ اِنت۔ درانڈیھ ءَ ترا دنیا کُلّیں آسراتی بہ رس اَنت بلے انگت وتن گیر کَیت۔ کَور، کوہ، کُوچَگ، کِشار، آپ۔ کسانی ءِ ترّ ءُ تاب ، لیب جاہ، دْرست ترا یات کاینت۔
یکّے ءَ گْوش اَنت وتن، یکّے ءَ گْوش اَنت مُلک۔ ایشانی تہ ءَ پَرک اِنت۔ وتن ھما اِنت کہ تئی ھپت پُشتی وتن اِنت۔ پِت داں پیرُکی ھمود ءَ تئی ناپگ کَلّ اِنت۔ ایشی ءَ گْوش اَبت وتن. مُلک ھما اِنت کہ تو چیزے آسراتیانی سوب ءَ جھمنند ئے۔ ایشی ءَ گْوش اَنت مُلک۔
چوناھا منی سرھال دگرے. کہ یک بلوچ شائرے ماں اِراک (عراق) ءَ بزاں بسرہ ءَ (بصرہ) ءَ درانڈیھ بیت۔ شائر ءِ نام زانگ نہ بیت۔ بلے شیر ءَ زانگ بیت کہ شائر مندی مردمے بیتگ۔ بلوچ ءِ وتن دوستی سیل کن کہ ماں بَسرہ ءَ گال ئِے پِر بستگ۔ وتی زمین ئِے دیم ءَ کُتگ ءُ مُرواردیں گال ئِے رستگ۔ کَھیر، کَلیر، ریدگیں پیش، تَلّانی سیسِیگ، وتی کھچر ءُ زید، وتی کوہ ءُ کَور، وتی دودمان دیم ءَ ایر کُتگ وتی شیر ئِے پِر بستگ۔ بسرہ ءِ ماڑی ءُ زیبداریں ءُ وش زیدیں جاگہ وتی گال چیدگ نہ کُتگ اَنت۔ وتی ھُشکیں، واریں، گُلامیں، ازابیں گُلزمین وتی گال چیدگ کُتگ۔ بلوچ ءِ وتن دوستی اد ءَ زانگ بیت۔ بلوچ ءِ وتن دوستی سر ءَ کسے شک بہ کنت۔ تو بزاں کہ گُناجے۔
نی بچار شائر چے گْوش اِیت۔
بَسرہ من رمبینت شھد ءُ شِیرانی
مُلک من ءَ اومان اِنت کَلیرانی
گپ ءُ دیوان مئے امیرانی
زھم جن ءُ ڈاٹاریں سَکیّانی
ھَلک ھما میت بندیں گِدامانی
بُزگَل ءِ دودَگ بانسَگ گوکانی
ریدگیں پیشّ ءُ سیسِیگ تلّانی
دار ھما ھشت پانچیں چگردانی
زَردُکی گْوبز ءُ شِیمّاز چاتانی
ساھِگ من ءَ وش بنت نَبُرّانی
زامُر ءُ سبز تاکیں کَھِیرانی
کہ منج ئِے ھمرنگ اَنت لال ءِ دُرّانی
شَنگر ئِے کوھِنگ اَنت چُلمبانی
کُنٹ گْوش ئے سرزان اَنت ھَپُرکانی
آ مہ رَنجانیں پُشت بِھانانی
گنگل ءُ دزبازی جنکّانی
سارت ءُ ھونکّیں کُل امُلّانی
ریک، سوراپ، سِیرگ ءُ مُلّان
گَجّو گوں دروازگ دپیں کُلّاں
منی دوست ئِے مان اِنت گوں ھُلکویں دُرّاں
(واجہ ھوتی ھان ءِ منّتوار کہ چیزے گالاں من ءَ کُمک ئِے کُتگ)
٭٭٭
