(میجر مھمد کریم پنّام ء مُلّا بھرام)
سیمی بھر
مُلّا!
سئے ءُ چار روچ ءَ تئی ھند ءِ جلّگ ءَ پد، جھل دِیگر ءِ شِنگ اِتگیں رنگانی ساھت ءَ ما شُما دیم دات پہ جنگولیں کمانچر ءِ دوار ءَ، کمانچر ءِ میتگ گھگیری ءِ چیدگے ءُ مُدام دُژمِن ءِ چمّانی کُنٹگ اَت۔۔۔۔۔۔۔۔۔۔۔۔، پمشکا دُژمِن ھر ھپتگ ءُ چارشمبے کمانچر ءِ میتگ ءَ دِرکّ اَت۔۔۔۔۔۔۔۔۔۔
ھمے وڑ ءَ واجہ گُلام نبی ءَ بُنزہ ءِ سنگت پیسر ءَ ھال اھوال کُرتگ اِت آں کہ ما پیداک ءُ گوں شُما گل ءِ نیادے کن اِیں، پمشکا بُنزہ ءِ سنگت ساری ءَ ساجو اِت آں ءُ ما گوں آیاں دیوان کُت۔ وھدے شپ دیم پہ جھلگ ءَ اِیرکپان اَت گُڑا مئے واب ءِ ھاجت ودّان ءُ ما شُما سنگتاں پہ واب ءِ ھاتِر ءَ دیم پہ جنگل ءَ دات۔۔۔۔۔۔۔
سُھب ءِ سر ءَ مھلہ سنگت ءَ کہ مارا پاد کُت، گوں پاد کنگ ءَ ھور شانتلے ءِ زئیپیں نالگانی سوزمانیں توار ءَ من ءَ جیڑگانی جنگل ءَ پادشپاد راھے ڈسّ اِت ءُ وت واتر بوت۔۔۔۔۔۔۔۔۔
من ءُ منی پادشپادی، دْراجکشیں دگ ءُ پادانی بُج اِتگیں ھاٹیگ۔۔۔۔۔۔۔، یک نیمگے سُکسُک ءُ ھلوت ءُ دومی نیمگ ءَ زُرمبشتے ءِ ڈاہ، ءُ ھمے توار ءِ چپّ ءُ چاگِرد ءَ ھونانی آپشار ءُ چیھانٹے ءِ تاموریں نِدارگ، منی جیڑگانی گْرانیں بار ءُ نِزوریں کُوپگ، مارِشتانی جمبوریں آس زُبان کشّگ ءَ اَت کہ ھیالانی کونج چہ رم ءَ سِستگ اَت ءُ نیم بال اَت، ھمے نیم بالی ءِ مْیان ءَ بُتکگیں ھیال ءَ وت ءَ چو پدّر کُت۔۔۔۔۔۔
ارسے چمّاں، آھے زِرد ءَ، انگرے تالاں دِل ءَ
موسم ءِ زپتیں زھیراں، شانتلے نالاں دِل ءَ
بے ترا گْوانکے نہ جکسیت آھِگ ءِ مِستاگی ءَ!
بے ترا دِیوانگی ءِ، جھ جتگ گالاں دِل ءَ
من گوں ھمے ھیالانی کماھگ ءَ مُلمہ اِت آں کہ مُلّا تو کند اِت ءُ گْوشت، منی ھیال ءَ بابُل تو دُوریں تْرانگے ءَ کپتگ ئے ءُ نہ زان آں چے چیڑگ ءَ ئے ھاھاھاھاھاھا۔۔۔۔۔۔۔۔
من ھم پہ کندگ تئی پسّو دات ءُ گْوشت، ھو مُلاّ جان! راستے کہ من ءَ شانتل ءِ زئیپیں نالگاں دُور ماں جیڑگانی جھانے ءَ سر کُرتگ ءُ تھنا یلہ داتگ۔۔۔۔۔۔۔۔۔۔۔۔، نوں واترّگ ءِ بدل ءَ واھگ ءِ تُنّ گیش ودّ اِتگ ءُ پہ زِرد ءِ سھڑینگ ءَ نیلیں آزمان ءَ شینکے اُوں درا نہ بیت کہ اُمیت ءِ گیمرتگیں کِشار بِہ سبز اِیت ءُ دھل دو تاکُو بِہ بیت۔۔۔۔۔۔۔۔
مُلّا! تو پدا گوں وتی شھدیں بچکندگاں الھان کُت ءُ گْوشت، ھو! مئے کِشار داں ھما وھد ءَ نہ سبز اِیت کہ گُلامی ءِ توک مئے گْور ءَ لوپ اِنت، اے توک ما چہ گْور ءَ لگوشت گُڑا اے گیمرتگیں کِشار سبز اَنت ءُ شانتلانی کُوکُو جتائیں چاڑے بکش اَنت۔۔۔۔۔۔۔۔۔، بلے بژن کہ اے اُوں مئے وڑ ءَ گُلامی ءِ کبس ءَ بندیگ۔۔۔۔۔۔۔۔۔
مُلّا! وھدے من تئی اے پلسپہ ریچیں دانک کہ اِش کُت آں، منی باتن ءِ مردکو ءَ گوں وت ءَ جیڑ اِت ءُ گْوشت، ھو ڑے ملنگ ءُ درویشیں بنی آدم۔۔۔۔۔۔۔پمشکا تو چہ زِند ءِ توامیں واھِشتاں در ءُ گُلامی ءِ کبس ءَ بندیگیں سرڈگار ءِ آجوئی ءَ ابید دِگہ ھِچّ رنگیں واھگ ءُ واھِشتانی آپریچ ءَ سھرا نہ بہ ئے۔۔۔۔۔۔۔۔۔۔بس تئی ھیال ءُ لیکہ کہ من دُژمِن ءَ کُجا ءُ چون بِہ گِند آں آئی ءَ چکپُروش بِہ کن آں۔۔۔۔۔۔۔۔۔۔
پرے ھاتِر ءَ من پہ دِلجمی گْوشت کہ مُلّا تو ملنگے ئے، تئی چمّاں ابید ء بلوچستان ءِ زیبائی ءَ دِگہ ھِچّ نِدارگ سھرا نہ بیت، اگاں نِدارگے سھرا بیت گُڑا آ ایردسیں راج ءِ آجو کنگ ءُ رھنیں گُلزمین ءِ موکگ۔۔۔۔۔۔۔۔۔۔۔۔، پمشکا منی گْور ءَ تئی ملنگی ءِ مانا کنگ سک گْران اِنت، بلے ھیالاں کہ پرّیچگ لوٹ اَنت۔۔۔۔۔۔۔۔۔۔۔، گُڑا من گوں وتی ھیال ءِ ریسّگ ءَ گُلائیش ءُ شُما پہ جُنزگ ءِ واستا وت ءَ جاڑی کنگ ءَ اِت ئے۔۔۔۔۔۔۔
بیا ھیالے مانداریں، وشبوھے کِشّیں نوکیں
زِندمان ءِ سرجاہ ءَ، ساھگے کِشّیں نوکیں
بِل تبیبیں اھد ءَ را دارُو ءِ بِہ بیت اُومان!
کْوھنگیں گمے ساٹیں، ھاجتے کِشّیں نوکیں
شکّلیں زھیرانی کُچلّیں دوارجاہ ءَ
مھلبیں وپاھانی، موسمے کِشّیں نوکیں
دُور جنگلے سھرا گْوانکے گْوات ءِ چنکّانیں!
شِنگ اِتگ زھیروکے، تْرانگے کِشّیں نوکیں
مارا بابُل ءِ ھلک ءَ نوبتے کوار ءَ کنت
مھر ءِ رُودیں جنگجاہ ءَ، کِسّھے کِشّیں نوکیں
مُلّا! تو اے مھر ءِ رُودیں جنگجاہ ءَ ابدمانیں کِسّھے کِشت ءُ نوبت ءَ را نوکیں جامگے پوش اِت، تئی رند پداں کسے کہ راھی اِنت۔۔۔۔۔۔۔آئی ءِ مُدام واھگ ھمے بیت کہ من مُلّا بِہ بَہ آں ءُ وت ءَ پہ مُجّتی ابدمان بِہ کن آں، پمشکا تو زِندگ ءُ تئی سگاریں کِرد ءِ ڈیوا ھر پاند ءَ بلگ ءَ اِنت ءُ پہ مُجّتی بلیت۔۔۔۔۔۔۔۔۔۔۔۔
روان اِنت۔۔۔۔
٭٭٭
