(میجر مھمد کریم پنّام ء مُلّا بھرام)
دومی بھر
مُلّا!
چہ واجہ ڈاکٹر منّان ءِ پہ ماتیں مرزبُوم ءِ دیمپانی ءَ کولیگ بُوَگ ءَ پد من وھدے Acting Secretary General ءِ بِستار ءَ دوھزار شانزدہ ءَ دیم پہ شُمئے ھند ءُ دمگاں پارٹی ءِ تر ءُ تاباں اتک آں، گُڑا من ترا واجہ گُلام نبی ( بی این ایم ءِ پیشیگیں وائس چیئرمین ) ءِ گِس گومازی ءَ ڈیکّ دات، تئی گِندگ ءَ ھور من ءَ سما نہ کپت کہ من ترا اولی رندیں گِندگ ءَ آں، بلکیں انچو سما بوت کہ تو چہ سالاں پیسر گوں من آشنا ئے۔۔۔۔۔۔۔۔
چہ تُمپ ھنکین ءِ دیوان ءَ پد ما شُما ھواری ءَ دیم دات پہ شُمئے ھند گُلیں گوبُرد ءَ، نِھنگ ءِ ھمساھِگیں گوبُرد ءِ نود ساچیں بالاد گوں وتی ڈگارانی کِشت ءُ کِشاراں، سارت ءُ سبزُکیں کھیراں بھشت ءِ گواناپ ءُ چھرگ ءَ جَنَگ ءَ اَت، بلے من مرچی سما کنگ ءَ آں کہ اے تئی مھروانی ءُ مھمانداری اَت کہ منی چمّاں گوبُرد چو ٹھلیں بانورے ءَ سمبھینتگ اَت۔ ملاریں شپ گوں زاپِرانیں کَوش ءِ شیکّـگاں وشبو دْرنزگ ءَ اَت۔ نِھنگ ءِ گز ءُ گْوات ءِ وت ما وتی بند ءُ مِڑ ءَ انچو سما کپت کہ بمبرے تئی آشوبیں بالاد ءِ نام ءَ سَوت گْوپگ ءَ اِنت۔۔۔۔۔۔۔
ماہ جوھان اَت، ءُ جوھانیں ماہ ءِ مجلِس ءَ پِیرزالے گوں وتی نماسگاں نِشتگ ءُ پہ لیلو ءُ نازینک تئی مزن مردی، مھمانداری، میار جلّی، دریا دِلی، جنگ ءُ کوھگردی ءِ ابدمانیں کِسّھاں آرگ ءَ اَت۔۔۔۔۔۔۔۔۔۔۔، من چہ ھمود ءَ دِلجم بوت آں کہ اے جنگ وتی سر ءَ کُجام دمک ءُ دراں بِہ کشّ اِیت۔۔۔۔۔۔۔مُلّا ءِ کوھیں بالاد ءَ جکسّینت نہ کنت، ءُ راستی ھمے رنگ ءَ سھرا بوت ءُ مرچی مُلّا ءِ تلاریں بالاد چیدگے منتگ ءُ گْواچنیں دگ ءَ شوناھگ ءَ اِنت۔۔۔۔۔۔۔۔
مُلّا! وھدے ما تئی ھند ءَ سنگتانی بُنزہ ءِ دِیوان کُت، چرے دیوان ءَ پد تو ءُ واجہ گُلام نبی گوں لس مھلوک ءَ نِند ءُ نیاد کُت، مھلوک ءِ جیڑہ ءُ جنجال گُوشداشت اَنت ءُ آیانی گیشواری ءَ راہ ءُ درے ءِ شوھازگ ءَ پِگر کُت، بلے مُلّا تئی زُبان ءَ مُدام ھمے ھبر اَت گوں مھلوک ءَ کہ مارا گُلامی ءَ اے ھال ءَ سر کُرتگ، اگاں ما باندا وتی ایردستیں ڈگار ءِ موکگ ءَ سوبین بوت اِیں اے جیڑہ ءُ جنجال نہ مان اَنت۔۔۔۔۔۔۔
بلکیں مارا شُمارا وتی راجی جُھدکار ءُ ڈیھ پھازیں جنگولانی گوم ءَ وتی بِستار ءِ رِد ءَ ھر رنگیں کُمک کنگی ءُ ساڑی بُوَگی اِنت، چی ءَ کہ پہ مئے شُمئے باندات ءِ سمبھینگ ءَ در کپتگ اَنت ءُ وت ءَ کُربان کنگ ءَ اَنت، اگاں ما گوں اِیشاں دِگہ کُمکے کُت نہ کن اِیں گُڑا اے مئے راجی زِمہ واری بیت کہ ما گوں وتی جِند ءِ راجپھازاں دگا مہ کن اِیں ءُ چہ در ءَ اتکگیں لشکر ءِ پلّو ءَ مہ اُوشت اِیں کہ اے مئے بلوچی دود ءُ ربیدگانی چپّ ءُ گوں ماتیں گُلزمین ءَ گدّاری گْوشگ بیت، ءُ گدّار باندا راجدپتر ءِ تاکانی اندر ءَ پہ دائمی رُزواہ بیت، من ءَ اے شات نہ بیت کہ منی راج ءِ زھگے باندا راجدپتر ءِ تاکانی اندر ءَ رُزواہ ءُ ملامت بِہ بیت، بلکیں منی واھگ اِنت کہ آ داں زِندگیں یا چہ مرگ ءَ پد پہ اِزّت ءُ شرپ گیر آرگ ءُ یات کنگ بِہ بیت۔۔۔۔۔۔۔۔۔۔۔
چہ لس مھلوکی مجِلس ءَ پد ما واتر تئی گِس ءَ اتک اِیں، من ءَ یات اِنت تئی گِس ءَ شپ ءِ نان ورگ ءَ پد دو ورناہ اتک ءُ دِگہ سنگتے ھم پیسر ءَ تئی گِس ءَ ساڑی اَت۔
اے ھمے زمانگ اَت کہ بلوچ راجی جُنز ءِ اندر ءَ ھرکس ءَ یکّے دومی ءِ جیگ گِپتگ اَت ءُ وتی پارسائی ءِ جار ءَ پِرّینگ ءَ اَت کہ من ساپ ءُ پلگاراں، وھد ءَ ھرکس ءَ را سھرا کُت کہ کَے، کَے اِنت۔۔۔۔۔۔۔۔۔۔۔
بلے مُلّا! من ھما روچ ءَ چہ ترا یک درونتے دربُرت کہ تو چہ اے رنگیں چِست ءُ ایراں گِستا ءُ وتی ملنگیں زِندمانے ءِ ھُدابُند اِت ئِے، گپّ چو نہ اِنت کہ تو چہ اے چِست ءُ ایراں ناسھی ءُ بے سما۔۔۔۔۔۔۔۔بلکیں تئی گْوشگ اَت کہ مارا چہ اے چِست ءُ ایر، بے سیتیں پندلاں گیش وتی ھیال ءُ دلگوش دُژمِن ءِ نیمگ ءَ گْور کنگی اِنت کہ آ مارا چون ءُ چے پیم پُروش دَیَگی اِنت، اگاں ما گوں وتی جِند ءَ گِر ءُ چیل بِہ بَہ اِیں بدواہ گیش سوب کنت ءُ مارا تاوان دنت۔۔۔۔۔۔۔۔
گھتر ھمیش اِنت ما پہ دُژمِن ءِ تاوان دَیَگ ءَ چاڑِکّہ بِہ بَہ اِیں اے وت ما وتی جیڑہ پہ گیش ءُ گیوار بُوَگ ءَ دیر نہ کن اَنت، بس مارا وتی دلگوش پہ جُھد ءُ جنگ ءَ گْور کنگی اِنت۔۔۔۔۔۔، مُلّا! اے ھبر ما گوں وتی چمّاں دیست ءُ راست سھرا بوت۔۔۔۔۔۔
روان اِنت۔۔۔۔
٭٭٭
