کوہلو کے علاقے کاہان میں اسٹیبلشمنٹ کی جانب سے بلوچ عسکریت پسندوں کے ہتھیار ڈالنے اور قومی دھارے میں شامل ہونے کے لئے خصوصی جرگہ کا انعقادکیا گیا۔
آئی ایس پی آر کے جا ری کر دہ پریس ریلیز کے مطابق کوہلو کے علاقے کاہان میں قبائلی عمائدین اور مختلف کالعدم تنظیموں سے راہیں جدا کرنے والے فراریوں پر مشتمل خصوصی جرگہ منعقد ہوا۔
جرگے میں مختلف کالعدم تنظیموں کے فراریوں نے ہتھیار حکام کے حوالے کرنے اور آئندہ پر امن زندگی گزارنے کا عہد کرتے ہوئے کہا کہ مستقبل میں وہ کسی تخریب کاری میں حصہ نہیں لیں گے اور ملک کی ترقی و خوشحالی کے لئے کام کریں گے۔
جرگے میں موجود فراریوں نے اس بات کا اعتراف کیا کہ وہ بیرون ملک بیٹھے چند عناصر کے کہنے پر دہشتگردی کی کارروائیاں کر رہے تھے جس پر ان کو پچھتاوا ہے لہذا اب وہ حکومت بلوچستان کی سیاسی مفاہمتی پالیسی کے تحت ہتھیار پھینک کر قومی دھارے میں شامل ہوکر پرامن زندگی گزارنا چاہتے ہیں۔
واضح رہے کہ اسٹیبلشمنٹ کی جانب سے بلوچستان بھر میں بلوچ عسکریت پسندوں کے سرنڈرکرنے کے حوالے سے اس طرح کے پہلے بھی متعدد دعوے ڈرامے کرچکے ہیں تاکہ بلوچستان میں فوج کی گرتی مورال کو سنبھالا جاسکے ۔
