بلوچی میوزیکل پروموٹر سوسائٹی …. میجر مجید

بیا اگازی گوں چندنیں شاگ ءَ
ساز ءُ سیمکار کن سیمّ ءِ اوتاگ ءَ
گِر منی راستی نیمگ ءَ جاگہ
پاد کن منی پُر دیتّیں دل ءِ داگ ءَ
اے گل یا سوسائٹی چیزے ایمانداریں ءُ راجدوستیں سنگتاں جوڑ کُت۔ بلاھیں جْوانیں کارے کہ بلوچانی دیریگیں لوٹے بیتگ۔ اے سنگتانی جھد پہ ساز ءُ زیمل ءُ لبزانک ءِ پڑ ءَ بے مٹ ءُ بے درور اَنت۔ من سرپد باں کہ اے گلّ ءِ مدت ءُ کمک اکلاکی بہ بیت یا کہ مالی مدت ءُ کمک کُل بلوچ ءِ پرز اِت۔ اے گلّ ءِ دلبڈی راجی ارزشتے۔ بلوچ گْوش اِیت کہ
ھُشتر وتی بار ءَ وت بارت بلے انگت جی ءُ جان ءِ مُھتاج اِنت
یک کسانیں وھدے ءَ اے گلّ ءَ باز جْوانیں کار کُتگ ءُ وتی کم توان ءُ کم نکانیں ساز ءُ زیملی بامردانی مدت ءُ کمک کتگ۔ کہ پیش ءَ اے دابیں گل نہ بیتگ ءُ مئے بازیں ساز ءُ زیملی بامرد نادْراھی ءُ اے دگہ بازیں اڑ ءُ جنجالانی ھرجان بیتگ اَنت۔ ءُ بلوچانی گریبیں ءُ نادزرسیں کھول ھم مالی جیڑھانی آماچ بیتگ اَنت۔ بلے چہ کہ اے گل ءِ بُنھشت ایر کنگ بیتگ بازیں نہ وشّیں جیڑھانی گیش ءُ گیوار بیتگ۔ بلوچ گْوش اَنت۔
ھُرّے ھُرّے کاسگی پُرّے
من زاتی سورت ءَ اے گل ءِ واکداراں ، باسکاں ءُ کمک کاراں سد رند ءَ سلام گْوشاں۔ زندگیں راجانی نشانی ھمیش اِنت کہ وتی کم دزرس ءُ ناتوانانی مدت ءُ کمک ءَ دیم ءَ کنز اِیت۔ ءُ اے امل مئے دود ءُ ربیدگانی بلاھیں بھرے۔
لبزانک ءُ ساز ءُ زیمل بلوچ ءِ راجی پجّار ءِ بھرے۔ ساز ءُ زیمل انسان ءِ ارواہ ءِ وردن اِنت ءُ مھر ءُ دوستی ءِ بامردانی ربّال اِنت۔
جی بہ باتاں منی مھرنگ ءِ دْروت ءُ اھوال
کہ سمین چندن ءُ مسکاں منی جیگ ءَ دْرنز اِیت
اتا شات
بلوچی ساز ءُ زیمل بلوچ دودمان ءُ ربیدگانی آدینک اِنت۔ بلوچ ءِ دلیری، میار جلّی، مھمانداری، مھر ءُ دوستی، ننگ ءُ ناموس پھازانی کتابے کہ تئی گشندہ اے کتاب ءَ گوں ساز ءُ زیمر ءُ وشّیں الھاناں تئی دیم ءَ وان اِیت ءُ ترا پوہ کنت ءُ سکین دنت کہ تو کے ئے؟ وتی ارزشت ءَ بہ زان وت ءَ مہ شموش۔
من ھما انجیراں پتن تاکیں
سر منی ھچ گْوات ءَ نہ چنڈینتگ
بلوچ راجدپتر ءَ بلوچ شائر ءُ گشندہ ءُ ازمگرانی بلاھیں ارزشت ءُ شرپے بیتگ۔ بلوچ ازمگر، شائر، پھلوان گوں ازّت ءِ چمّاں چارگ بیتگ اَنت۔ بلوچاں چہ دوستی ءُ ازت دیگ ءِ ھاتر ءَ بلوچ شائر ءُ پھلوان ”مُلّا“ گْوشتگ اَنت۔ بزاں جْوانیں پنّامے داتگ اَنت۔ آ دھر ءَ ”مُلّا“ بلاھیں ازتداریں پنّامے بیتگ۔ چوش کہ مُلّا پازل، مُلّا کاسم، مُلّا ازّت، مُلّا بھادُر، مُلّا بوھیر ، مُلّا موسا، مُلّا گُلام کادر، مُلّا ھسن راسکی، مُلّا کمالان ھوت ءُ دگہ باز۔ اے کُل دینی مُلّا نہ بیتگ اَنت۔ بلے چہ دوستی ءُ اھترام ءِ سوب ءَ ایشاں ”مُلّا“ ءِ پنّام دیگ بیتگ۔
نامداریں کسّھے کہ یک گَشتاں مُلّا پازل بمپور ءَ پہ سردار سید ھان ءِ گندگ ءُ نند ءَ شُت۔ سردار سید ھان بلاھیں مردم شناس نگن شانیں سردارے بیتگ ءُ سردار سید ھان ءِ نگن شانی ءِ بابت ءَ باز کسّہ ھست۔ گُڑا مُلّا پازل کہ واجہ ءِ گس ءَ سر بوت گُڑا دیست ئِے کہ سردار سر گپتگ کہ چیزے روچ ءِ واست ءَ ڈنّ ءَ ترّ ءُ گردے ءَ بہ روت۔
پازل ءَ سلام دات ءُ دیوان ءَ نشت۔ ھال ءُ اھوال بوت۔ بلے سردار ءَ مُلّا پازل پجّاہ نیاؤرت۔ مُلّا پازل ءَ گْوشت کہ واجہ تو ڈن ءَ سپر ءَ روگ ءَ ئے۔ منی دیر اِنت کہ دل ءَ بیتگ کہ گوں تو دیوان بہ کناں۔ بلے منی بھت ءَ بچار کہ تو در کپگ ءَ ئے۔ سردار ءَ پسّو دات کہ بی بی ھمد ءَ اِنت شُمئے مھمان نوازی ءَ کنت۔
مُلّا پازل ءَ شائری دْروشم ءَ پسّو دات
من درکپتاں گوں ملک دینار ءَ (ملک دینار ملّا پازل ءِ ھمراہ اَت)
مند ءِ گُلشنیں بازار ءَ
کہ دیدارے کناں سردار ءَ
بلے بے ھار اَنت کروس لاشار ءَ
جنگ دنت نکینکاں مارا
سردار ءَ جُست کُت کہ تو مُلّا پازل ئے؟ گْوشت ئِے جی ھو من مُلّا پازل آں۔ سردار چہ وتی جاہ ءَ پادآتک ءُ مُلّا پازل ئِے گُلائیش کُت۔ دست ءُ دْروہ بوت ءُ سردار ء۔ وتی سپر کوتاہ کُت۔
اے تئی بلوچ ءِ ازمگر ءِ ازت ءُ اھترام بیتگ۔ منی سرھال دگہ نیمگے شُت۔ بلے منی مول ءُ مُراد ایش اَت کہ تئی ازمگراں بلاھیں ارزشت بیتگ۔ مروچی ھست اَنت باندات ھم مان اَنت۔ آ راج ءَ کہ وتی ازمگر ءُ شائرءُ کواسانی کیمت ءُ ارزشت مہ دنت گُڑا الّم بہ زان اِت کہ اآ راج وتی راجی کیلواں شمشکار اِنت۔
مروچاں من گندگ ءَ آں کہ مئے وتساپی تران جاھاں ءُ اے دگہ رسانکدراں بلوچی میوزیکل سوسائٹی ءِ سنگتانی ھلاپ ءَ ناجائزیں تکءُ گیچن بزاں تنکید کن اَنت۔ ابید منّانک ءَ ابید ء گْواچن ءَ۔ بلے سید ھاشمی گْوش اِیت
واھگ ءِ سوزمان کم بیت
پْروش امیتانی بان ءُ بادگیراں
تئی کُل ءَ تھار اِنت ورنائی
کئی میار اِنت کہ آجز ءُ پیراں
ھانل ءِ ھاتر ءَ سید انگت
گْران تریں گم وتی سر ءَ زیراں
اد ءَ منی مول ءُ مراد اے نہ اِنت کہ تک ءُ گیچن مہ بیت۔ جست ءُ باوست ءُ نتکید مہ بیت۔ تعمیری تنکید جوانیں املے بلے تنکید برائے کینگ مہ بیت۔ ھر کس ءَ تنکید ءِ ھک ھست بلے بلوچ ادارہ مپت ءُ ناھک ءَ ڈوبارگ مہ بنت۔ من وتی ھما نادانیں سنگتاں گْوشاں کہ نہ چار اَنت ، نہ وان اَنت، پٹ ءُ پول نہ کن اَنت ءُ بے مانائیں تنکید کن اَنت۔ مُلّا کاسم گْوش اِیت
کوڑواں لیگار نہ بنت پھکیں اشرپی
من اد ءَ گوں وتی بلوچی میوزیکل پروموٹر ءِ سنگتاں دزبندی کناں کہ دلپروش مہ بنت، وتی جھد ءِ گاماں تیز تر بہ کن اَنت۔ کہ بلوچ شُمئے ھمراہ ءُ ھمکوپگ اِنت۔ شُما نی تھنا نہ اِت نی تھنائی ءِ وھد شت۔ مروچی بلوچ ھر شرّیں کار ءَ تپاک ءُ ھمدست اِنت۔ نی بلوچ وتی کٹ ءُ نپ ءُ تاوان ءَ زانت ۔ بلوچ وتی مھروان ءُ بدواہ ءَ جوان پجّاہ کار اِیت۔
اکبال لاھوری گْوش اِیت
تندیِ بادِ مخلاف سے نہ گھبرا اے عقاب
یہ تو چلتی ہے تجھے اونچا اڑانے کیلئے