منی دل ءِ سربُرز ءُ مَلنگیں بہر!
”تؤ روشنیں آزمان ءَ چو بیرک ءَ مِک اِت ئے،
من چو گُلابیں پُل ءَ ھما کبر ءِ نگھپان اِت آں“،
اے ھبر ءَ تؤ ھم زانئے کہ من وت ءُ ترا برمیچگ (موازنہ) ءَ نہ آں، من تہنا ھما بیرک ءِ بُرزی ءُ پُل ءِ وشبوہ ءَ درشان کنگ لوٹگ ءَ آں کہ تئی توپک ءِ برمیل(barrel) ءِ تہا اَت، پد ءَ باریں کازماس ءِ گردش ءِ تہا کُجام مٹ ءُ بدلی اتک انت کہ پُل ءَ ھمے کبر ءِ نگھپانی گچین کُت ءُ تئی توپک ءِ برمیل اِش یلہ کُت۔۔۔۔
بلے پُل ماں تئی توپگ ءِ بیرل ءَ زیباتر اَت۔
پُل ءِ ھما وشبوہ کہ چو کوش ءَ کشّگ ءَ اَت گُشئے تیوگیں سَنگر گُلدانے اَت۔۔۔ نہ زاناں پُل ءِ کُجام گپّ ءَ بہ کناں، کُجام کسّہ ءَ بہ کشاں۔۔۔؟ ھما کسّہ ءَ بہ کناں کہ وھدے چاھدان لاڑ کنان ات، پُل تئی زُلپانی چیرسر ءَ ءُ گوش ءِ پُشت گؤر ءَ سمبھیتگ ات، وشبوہ تالان ات بلے نہ زاناں کہ اے وشبوہ پُل ئیگ ات یا ھما گُلابیں بِچکند ئیگ ات کہ تئی دپ ءَ ساڑی اَت۔۔۔
ھما کسہ ءَ بہ کناں کہ تئی سوگات کُتگیں مہرگہوش ءِ ھمُک تاکدیم ءَ یک پُلے سرپتگ اَت، ھمک نوشتانک ءَ یک گُلدانے پچ اَت۔ کُجام کسّہ ءَ بہ کناں منی ھیالانی دامُن چہ کسّہاں سرریچ اِنت۔۔۔ ھیر! تؤ گوں وتی کندوکیں دپ ءَ چہ سنگر ءِ زیبائی آں گسر کپت ئے، ءُ گُلابیں گُلزمین ءَ اندیم بوت ئے، سُرمگیں ھاک ءَ واب کپت ئے۔۔۔
چوشکہ وش نَویسیں ملنگے ءِ دوبندے اَست؛
نوں وابانی گُلانی ھُشکیں تاکاں موتک پیڑائیں
تو وشبوہ زُرتگ اندیم ئے، اد ءَ ما کُل سوالی اَنت
نوں من زاناں کہ ھما وشبوہ تئی بچکند ءِ بوتگ کہ چریشی ءَ سنگر گُلدانے اَت، نوں اے وشبوہ ھمابُرزیں بیرک ءَ زُرت کہ آزمان ءِ سینگ ءَ سر کشان ات۔ نوں گوات روژناہ اَت، کئوش گوں مِسکاں کشان اَت۔۔۔
بلے منی دِل ءَ را تبدیں شمالے ءَ پتاتگ اَت، منی زند ءَ را ھما تہار ءُ مانِش رنگیں سکرات ءَ امباز اتگ ات کہ گُشئے منی ارواہ ھون ءِ سینگ ءَ وپتگ ات۔۔ ساہ چہ زند ءِ ھمُک اُردگ ءَ چہ پٹ ءُ رچان اِنت۔
بلے منی سک مریں زِند ءَ وتی اُردگاناں گوں مھکمی ءَ داشت۔۔۔
منی شیداھیں شھر ءِ ملنگیں زِرپھاز، مروچی پد ءَ ترا گیراروں۔۔۔۔!!
منی مھروان! تؤ پمن ھما سباہ بوتگئے کہ زِر ءِ وشتواریں چولاں گوں الوت کنان ءَ رولہ ٹِک داتگ۔ تؤ منی جابہہ ءِ سینگ بوتگ ئے کہ آ گوں ترا بندوک بوتگ۔۔ منی پگرانی ھما ڈیوا بوتگ ئے کہ منی لیکہ چہ ترا روک بوتگ انت، روژناہ بوتگ انت۔ من سدک آں کہ اے نمدی ترا سر بیت۔۔۔۔ تئی نمدی ءَ دراج نہ کناں لوز چو بالو ءَ بال کنان ءَ کدی سب کونشس ءِ دریگ ءِ سر ءَ نند ءُ پد ءَ دمانے ءَ بال کننت ءُ تئی گیرانی کُٹ ءَ کپنت۔۔
رُخصت اف، کُربان۔۔!!!!
تئی پُرسوز ءُ ملوریں ھمبل روچ زاد
***
