انگت من ھما روچ ءَ بیھال کُت نہ کن آں کہ تو گوں من ءَ دوبر واتر بُوَگ ءِ کرار کُتگ اَت۔ تو جولائی ءَ شُتگ اِت ئے ءُ گْوشت ستمبر ءَ واتر کایاں، بلے تو منی گون ءَ زندگی ءِ اولی کُتگیں کول ءُ کرار سرجم کُت نہ کُت۔۔۔۔۔۔۔
چونائی ءَ منا ءُ ترا کُجا یک ءُ دومی ءَ گوں کول ءُ کرارانی، مھرانی ستک دَیَگ ءِ موہ رستگ اَت۔ جون ءِ لوار چکیں موسم ءَ تو چہ سنگر ءَ واتر اتک ئے ءُ مئے سیر بوت۔ انگت مئے سیر ءَ یک ماھے ھم سرجم نہ اَت کہ تو وتی بانور دوبر آھگ ءِ کرار دات ءُ جنگ ءَ رپت ئے۔ چک نہ جت ءُ نہ چار اِت باریں ھمائی ءَ کہ تو یل کنگ ءُ روگ ءَ ئے آ اُوشتاتگ یا اُوشتوکانی کپتگ۔۔۔۔۔۔۔
ھما شپ ءَ کہ تئی ھمراھانی بُنجل ءِ سر ءَ دُژمن ءَ اُرش کُتگ اَت، جنگ اَت، سنگت نہ گیگ ءُ دژمن ءِ انگران اِت اَنت ۔ تو من ءَ ھمے کرار کُت ءُ رپت ئے کہ زوت واتر کایاں۔۔۔۔۔۔۔
یکرندے پد ءَ ستمبر ءَ تئی پون اتک کہ وتی دستاں ھِنّی بکن ، سبز ءُ سُھریں چوڑیگاں دست ءَ بکن کہ من واتر کایاں۔۔۔۔۔من ھمے ودار ءِ سِیمراں نِندوک اِت آں ، تئی ودار آسر نہ اَت کہ یکّے اتک ءُ من ءَ گْوشت ئِے۔۔۔۔نی آ نئیت ، ھچبر نئیت۔۔۔۔۔۔۔۔۔
تئی ودار بھ ھلاس نہ بیت ءُ ودار بس ودارے مان اِیت ، گْوش ئے کسے ءَ منی ارواہ ءِ تار سُرینت اَنت ءُ گْوشت۔۔۔۔
اے وڑ بیت نہ کنت ، آ الم کَیت۔ آئی ءَ منی گون ءَ کول ءُ کرار کُتگ ، آ وتی کول ءُ کراراں پُروشت نہ کنت۔ آ بے وپا ھم بیت نہ کنت۔ انگت مئے سیر ءِ ھِنّیانی رنگ نہ لَگُشتگ اَنت۔ آ من انگت اے ھال نہ داتگ کہ من تئی چُک ءِ مات بُوَگ ءَ آں۔
آ کَیت ، بلے وتی پاداں گوں نئیت۔ نہ آ گوں تو گپ ءُ تران کُت کنت ، نہ آ ترا دیست کنت۔۔۔۔نیکہ آ اے زانت کنت کہ آ چُکّے ءِ پت بُوَگی اِنت۔ آ اے درستیں چیزاں چہ بے نیاز بیتگ۔۔۔۔۔۔۔۔۔
نہ نہ آ کَیت ، منی گون ءَ گپ ءُ تْران کنت۔ آئی ءَ منی گون ءَ کرار کُتگ اَت کہ ستمبر ءَ کایاں آ چون بَد زُبان بیت کنت۔۔۔۔۔۔
من گون ھِنّی ئیں دست ءُ کانچیں منگلیکاں آئی ءِ ودار ءَ کنگ ءَ اِت آں۔۔۔۔۔۔۔ءُ آ اتک۔۔۔۔، بلے آئی ءَ بلوچستان ءِ بیرکے مانپوشتگ اَت۔ دار ءِ پیتی ءَ چہ بندیں آئی ءِ بدن ءَ نہ من دست جت کُت۔۔۔۔نہ آ منی توار ءَ اِش کنگ ءَ اَت۔۔۔۔۔۔۔، نہ آ منی گون ءَ گپ ءُ تْران کنگ ءَ اَت۔۔۔۔۔۔۔۔
دار ءِ بندیں پیتی ءَ ھما جاہ ءَ کہ آئی ءِ سر کانچ ءِ تہ ءَ زاھر اَت ، من وتی دست ھمود ءَ ایر کُت کہ بِہ گِندئے آ منی دستانی وشبوھاں بِہ مار اِیت۔ منی کانچ ءِ منگلیکاں بِہ گِند اِیت۔ چمّاں پچ بہ کنت ءُ من ءَ بِہ چار اِیت ۔ آئی ءِ لُنٹانی سر ءَ تالانیں بچکند گیشتر تالان ءُ زیبا بہ بیت۔۔۔۔۔۔۔۔
بلے منی واھشت بس واھشتے بوت ءُ پش کپت ، چی ءَ کہ آ واب کَپتگ اَت۔ پہ دائمی واب کپتگ اَت ، کرار دْروشمیں واب! ھما واب کہ راستیں راہ ءِ مُساپِرانی نسیب ءَ اَنت۔۔۔۔۔۔ ھما وڑ واب کپتگ اَت۔ گلزمین ءِ ھاک ءِ شیدا پہ بچکند مرگ ءَ وش اتک کن اَنت ءُ امبازاں گِر اَنت۔ مات ھاک ءِ ڈیساں رپتگیں بچّاں ھِچّ وڑیں تاکت وتی لوگ مردماں چہ جتا بُوَگ ءَ ابیتک کُت نہ کنت ، بلکیں آ وتی پرزانی پیلو کنگ ءَ وتی مھر ءِ کُربانی دَیَگ ءَ ھم چک ءُ پد نہ بَہ اَنت۔۔۔۔۔۔۔۔۔
بِہ گندئے اِیشانی زندگی لھتیں سالانی اَت ، بلے داں اے گیدی مان اِیت اِیشانی نام پہ مُدامی مان اِیت۔ اے ھمے سر اَنت کہ وتی ھیشی سراں بکش اَنت تا ماں زندگ مان ایں ، اے ھمیش اَنت کہ شپ آگاہ اَنت کہ ما شپاں وش واب اِیں۔۔۔۔۔۔۔۔
ھما بامرد کہ گلزمین ءِ وپا ءِ سوگند ءَ ور اَنت ، گُڑا آ وتی کھول ءِ مردُمانی ءُ ایندگہ سیادانی گون ءَ کتگیں کَول ءُ کرارانی پاسداری ءَ کُت نہ کن اَنت۔ من آئی ءَ را گُڈّی رند ءَ گندگ ءَ اِت آں ، آئرا ستمبر ءَ آھگی اَت۔۔۔۔۔۔۔۔۔۔آ ستمبر ءَ ھم اتکگ اَت ، بلے آ وڑ نہ کہ آئرا آھگی اَت ۔ آئی ءَ ھما بچّ ھم گِندگی اَت کہ ھپت ماہ ءَ رند اے دُگنیا ءَ آھگی اَت ، بلے آ پہ گُلزمین ءِ کُٹ ءِ وپسگ ءَ انچو اِشتاپ اَت کہ وتی بچّ ءِ آھگ ءِ ودارے ھم نہ کُت۔۔۔۔۔۔۔
چینچو بھارگاہ کاینت ءُ رَو اَنت ، چینچو ھور ءُ جمبری ساچان گْوز اَنت۔۔۔۔۔۔۔موسم مٹ بَہ اَنت ءُ دُگنیا ھمے وڑ ءَ مان اِیت۔۔۔۔۔۔
بلے منی دل ءِ سر ءَ ایریں گم ءِ موسم کدی ھم مٹ نہ بہ اَنت ، تئی لھتیں روچانی مھراں گوں من وتی زندگی چو دوچے ءَ دُوتکگ ءُ گور ءَ کتگ۔۔۔۔۔۔۔۔۔۔۔کہ وتی بچّ ءِ ھمراھی ءَ منی پش کپتگیں زندگی گْران مہ بیت۔۔۔۔۔۔۔۔۔
من تئی ھورک ءُ ھالیگیں جاہ ءَ دِگہ یکّے ءَ دات نہ کن آں ، بِہ گندئے دُگنیا ءِ چمّاں من یک جنوزامے آں ، بلے من زان آں کہ تو ھست ءُ زندگ ئے۔۔۔۔۔۔۔۔۔
وھدے تو زندگ ئے۔۔۔۔۔۔، گُڑا تئی جاہ ءَ من دِگرے ءَ چوں دات کن آں۔۔۔۔۔۔۔۔
