چہ گْوستگیں سال 2025 ءَ بہ گِر ،انی چیزے ماہ بوتگ کہ نیکراھی جنگول مجاھدینِ اسلام ٹی ٹی پی(تھریک تالبان پاکستان) گوریچی پشتون دمگ ءِ بلوچستان ءَ وتی جنگولاں سر کنان ءَ پاکستانی پوج ءِ سر ءَ ٹوھیں اُرشاں کنگ ءَ اِنت۔ چہ ایشی ءَ پیسر یک نیمگ ءَ پاکستانی لشکر بلوچستان ءِ تہ ءَ چہ راجی لشکر بی ایل اِے ءِ دست ءَ پْروش ورگ ءَ اَنت، دومی نیمگ ءَ ماں ولایت(صوبہ) کے پی کے ءَ پاکستانی لشکر ءِ ھلاپ ءَ مجاھدینِ اسلام ٹی ٹی پی ءِ ترُندیں اُرش برجاہ ات اَنت۔ بلے بلوچستان ءِ پشتون دمگاں جنگ نیست اَت۔ انی چہ کراچی رینجر ھیڈکوارٹر، ھنہ اڑک ءُ زیارت ءِ اُرشاں پد بازیں ریجنل ءُ جیوپولٹیکل اسپرٹ گْوش ایت کہ پاکستانی پوج ھم اوگانستان ءِ گْوستگیں سروک اشرپ گنی ءِ پوج ءِ وڑ ءَ پْروش ءِ آماچ بیت ءُ زوت پاکستان نیکراھی گل ٹی ٹی پی ءِ دست ءَ رئوت۔
چیزے روچ پیسر مجاھدینِ اسلام ٹی ٹی پی ءِ جنگول ھنٹہ اُڑک ءِ راہ ءَ پاکستانی پوج ءِ مستریں بُنجاہ(کینٹ) ءِ نیمگ ءَ روگ ءَ بیتگ اَنت کہ ما پوج ءِ بُنجاہ ءِ سر ءَ اُرش بکن ایں۔ گُڑا ھمے دمگ(علاقہ) ءِ پشتوناں ٹیٹی پی جنگول دیم ءَ نیشتگ اَنت، جنگ بوتگ دوئیں نیمگ ءَ مُرتگ اَنت۔ پد ءَ ٹی ٹی پی ءَ گوشگ کہ شما پہ پوج ءِ پھریزگ ءَ گوں من جنگ کنگ ءَ اِت گُڑا من پیسر گوں شما دست ماں دست بہ آں پمیشکا ٹی ٹی پی ءَ ھمے کاسگچٹ ءُ دلار کُشتگ اَنت۔
دومی ما بے ھال مہ بَہ ایں کہ پشتون راج ءِ دْروگ ءُ وتگڑیں رھشون مھمود ھان اچکزی ءُ دگہ بازینے بلوچ راجی لشکر ءَ ناشرکار(دھشتگرد) گْوشگ ءَ اَت۔ پد ءَ ماں زھرشانیاں(احتجاج) ءَ گْوشگ ءَ اَت کہ کوئٹہ پشتونانی شھر اِنت۔
پاکستانی پوج ءِ مستریں بُنجاہ کوئٹہ ءَ اِنت ءُ سرجمیں بلوچستان پوج ءَ چہ کوئٹہ بُنجاہ کُمک رسگ ءَ اِنت۔ بلوچ راج ھم یکشل ءَ(مسلسل) ھمے جھد ءَ اَت کہ ما کوئٹہ ءَ پاکستانی پوج ءَ پْروش بہ دے ایں پد ءَ سبی، مستونگ تا مکُران ءَ بلوچ سرمچار دستیگ کن اَنت۔
بچار ھمے درستیں ھساب ءَ اگاں مجاھدینِ اسلام ٹی ٹی پی پشتون دمگ ءُ کوئٹہ ءَ پاکستانی پوج ءِ سر ءَ ارش بکنت گڑا ایشی ءِ پائدگ بلوچ سرمچاراں رس ایت۔ چہ ایشی ءَ پیسر پاکستان ءَ نیکراھی ٹی ٹی پی ءُ بلوچستان ءِ راجدوست ءُ آجوئی لوٹوکیں گل بی ایل اِے ءِ جیڑھاں میان اُستمانی(انٹرنیشنلائیز) کنگ ءِ واست ءَ 15 ءُ 16 اکتوبرب2025 ءَ اوگانستان ءِ سر ءَ اُرش کُت کہ اوگان تالبان ٹی ٹی پی ءُ بی ایل ءاے ِ ھلاپ ءَ پاکستانی پوج ءِ جنگ ءَ بہ کنت۔ کتر، سھودی، چین ءُ ترکی ءِ وڑیں ملکے دیم ءَ بئیت ءُ پاکستان ءَ چہ اِے دْراجیں جنگ ءَ رکین ایت۔ ھمے واست ءَ کتر ءِ شھر دوھا ءُ تُرکی ءِ شھر استنبول ءَ بازیں باوست ءُ منّگ نامہ بیتگ اَنت کہ آیانی رِد ءَ بی ایل اِے ءُ ٹی ٹی پی پاکستان ءِ تھی(اندرونی) جیڑہ اَنت پمیشکا اوگان تالبان پاکستانی پوج ءِ واست ءَ ٹی ٹی ہی ءُ بی ایل اے ءِ ھلاپ ءَ جنگ نہ کنت۔ بزانکہ پاکستان ءَ ھچ پائدگ نہ رسگ ءَ اِنت۔
مرچاں نیکراھی گل ٹی ٹی پی ءِ جنگ ھم سک تْرُند اِنت۔ ٹی ٹی پی جارکش واجہ ھُراسانی ءَ گوں کارڈین نیوز ءَ یک انٹرویو ءَ گوشتگ کہ ما اے وھد ءَ دْراجیں رینج ءِ میزائیلاں اڈ کنگ ءِ جُھد ءَ ایں، کشمیر ءَ بہ گِر داں پنجاب ءُ سندھ ءَ مئے جنگول ھست اَنت۔ چہ ایشی ءَ زانگ بیت کہ زوت پاکستانی لشکر تیوگیں پشتونستان ءَ بِہ گِر تا روالپنڈی ءُ اسلام آباد ءَ بیرانی ءِ آماچ بہ بیت ءُ زوت پاکستانی پوج پْروش بہ وارت پد ءَ اوگانستان ءِ وڑ ءَ پاکستان ھم شرھی اسلامی رھبندانی رِد ءَ سرکارے اڈ دیگ بیت۔ بزانکہ اے وھد ءَ پاکستان بازیں جنگی سنگراں گٹ اِت۔
ما بے ھال مہ بَہ ایں کہ ٹی ٹی پی 2007 ءَ پاکستانی جھادی جنگولی گلاں اڈ دات کہ آئی ءِ تہ ءَ گیشتر پشتون مُلا اَنت۔ چوناھا ٹی ٹی پی وت یک سرجمیں گلے نہ اِنت بلکیں ایشی ءِ تہ ءَ جمائت الھرار، ھاپز گُلبھادر ءِ گل ٹی ٹی جی اور دِگہ بازیں گل ئِے ھوار اِنت کہ پاکستان ءِ تہ ءَ اسلامی رِد ءُ رھبندے آؤرگ لوٹ اَنت۔ پاکستانی پوج ءُ میڈیا پروپاگنڈہ کنت ءُ گْوش ایت کہ بی ایل اے ءُ ٹی ٹی پی یک اَنت۔ برے انڈیا ءِمیڈیا ھم پاکستان ءِ گپاں دپ ءَ زُور ایت کہ ٹی ٹی پی ءَ چہ اوگانستان ءَ کُمک رسگ اَنت، بلوچ بے وارسیں راجے پمیشکا ٹی ٹی پی بلوچ راجدوستی ءِ گل بی ایل اے ءَ کُمک کنگ ءَ اِنت۔
البت بلوچ راجی آجوئی لوٹوکیں گھیگری گل چہ ٹی ٹی پی ءَ چَپ(اُلٹ) اَنت۔ بلوچ گوں پنجابی ءُ پاکستان ءَ ھچ وڑیں سْیادی یے نہ دار ایت پمیشکا بلوچ راج چہ 27 مارچ 1948 ءَ وتی راج آجوئی ءُ وتی ڈیھ ءِ وتواجھی ءَ جُھد ءَ اِنت۔ بلوچ یک آزاد ھیال ءُ راجمستری ءِ منّوگِریں چاگِردے دار ایت، بلوچ دود ءُ رواج ءِ رِد ءَ بلوچیت وت یک سرجمیں رھبندے ءُ نیکراھی بنی آدم ءُ ھُدا ءِ یک نیکراھی سْیادی یے پمیشکا راجکاری(سْیاست) ءَ گوں نیکراھی ءَ ھچ وڑیں سْیادی نیست پمیشکا نیکراھی گل ٹی ٹی پی ءُ بلوچ راجدوست ءُ سرمچارانی پگر ءُ سسّا جُتا اَنت۔
پاکستان ءِ انیگیں مُلکاری، گوں اوگان تالبان ءُ ھندوستان ءَ زھر ءُ جنگی جاور پنجاب ءِ تہ ءَ پوج ءِ ھلاپ ءَ نپرت ءُ ٹی ٹی پی ءِ جنگ اِے دْراہ بلوچ ءَ پائدگ دے اَنت۔ زوت ٹی ٹی پی جنگ ءَ ھم پنجاب ءِ تہ ءَ بارت۔ پاکستان ءِ اِے نگیگیں جاور پہ بلوچستان ءِ آجوئی ءِ مستاگے۔ باید اِنت بلوچ راج پہ راجی آجوئی ءَ وت ماں وت یکجاہ ءُ یکمُشت بہ بیت۔ بی ایل اے ھم جنگ ءَ تْرُند کنان کنت۔ پد ءَ پاکستان ءِ لشکر چہ بلوچستان ءَ درکپ ایت ءُ بلوچ راج ڈیرہ گازی ھان ءَ بِگر داں سند ءِ ایردستیں بلوچ دمگ ءُ کراچی ءَ ھوار وتی سرجمیں بلوچستان ءَ دستیگ ءُ واجھی کنت۔ باید اِنت راجی لشکر بی ایل اے کوہ سلیمان ءِ دمگ انچوشکہ ڈیرہ مُراد جمالی، جھل مگسی، ڈیرہ بگٹی، جیکب آباد ءُ ڈیرہ گازی ھان ءِ دمگاں ھم بلوچ راجدوستی آشوب ءُ سرمچاراں ودی کنگ ءِ جُھد بہ کنت پرچا کہ مارا وتی سرڈگار ءِ ھمُک انچ آجو کنگ اِنت۔
شالا بلوچ راج وت ماں وت تپاک ءُ بلوچستان آزات بات۔
***
