دنیا ءِ گیرتمندیں راج بے رھشون نہ بنت، ھر راجے ءِ راجی بامرد(نیشنل ھیرو)، راجکار(سیاستدان) ءُ راجی ھستی بوتگ اَنت کہ آیاں وتی راج چہ گُلامی ءَ رکینتگ اَنت یا وتی گُلامیں کوم ءِ راجی آجوئی ءِ راہ ءَ سرگِران کتگ اَنت۔ چہ ھمے وڑیں راجی ھستیاں یکے مئے بلوچ راجی رھشون شھید اکبر ھان بگٹی اَت ماں دمگی ٹَکاں(علاقائی قبائلاں) بھر ءُ بانگیں راج ئِے پہ بلوچستان ءِ آزادی ءُ بلوچ راج ءِ وتواجھی ءَ یکجاہ کتگ۔
شھید اکبر ھان بگٹی 12 جولانی 1926 ءَ بلوچستان ءِ دمگ بارکھان ءَ نواب مھراب ھان بگٹی ءِ لوگ ءَ پیدا بوت۔ کراچی ءَ دہ تبک(جمائت) ونت ءُ پد ءَ گوں دگہ بازیں بلوچ راجدوستیں ھمتبکاں لاھور ایچیسن کالج ءَ ونت ئِے۔ دیم ءَ ھائیر ایجوکیشن ءِ واست ءَ انگلینڈ ءَ شُت ءُ اوکسپورڈ یونیورسٹی ءَ ھم گریجویشن ئِے کت۔ چوناھا شھید اکبر ھان بگٹی بلوچ کوم ءِ بگٹی ٹکر ءِ پاگواجہ اَت بلے آئی ءَ مُدام بلوچ ءِ درد ھست اَت پمیشکا راجکاری ءِ تہ ءَ بلوچ راج راجدوستیں رھشونے ءِ نام ءَ زانگ بیت۔ شھید نواب اکبر ھان بگٹی 1973 تا 1974 ءَ بلوچستان ءِ گورنر ءُ 1989 تا 1990 ءَ بلوچستان ءِ سروزیر(وزیرآلہ) بوت. چہ وتی سروزیری ءَ بلوچستان ءِ تہ ءَ ماں وانگجاھاں براھوئی ءُ بلوچی وانینگ ءِ رواج دات ئِے کہ بلوچ راج ءِ تہ ءَ زبان دوستی ءُ راجدوستیں ءِ مارشت(اھساسات) ودی بہ بنت پرچا کہ زبان دوستی راجے ءِ تہ ءَ راجدوستی ودی کنت ءُ گلامی ءِ ھلاپ ءَ پاد آیگ ءِ سسا دنت۔
پد ءَ گوں وپاک ءُ سینٹر ءَ جیڑھانی سوب ءَ بگٹی ءِ سرکار پْروشینَگ بوت۔ شھید نواب اکبر بگٹی بلوچ راج ءِ یک آزات ھیال ءُ راجمستری ءِ منّوگریں رھشونے اَت ءُ شھید اکبر ھانی بگٹی ءِ نز ءَ بلوچ زالبولانی یک بلاھیں ازتے ات پمیشکا آئی ءَ وتی دمگ ڈیرہ بگٹی ءَ گرلز اسکول ءُ کالج ھم پچ کنائینتگ اَنت کہ بلوچ زالبول ھم وانگ ءُ زانگ ءِ پڑ ءَ بیا اَنت۔ شھید اکبر بگٹی یک زبان دوست ءُ راجدوستیں رھشونے اَت، بلوچی وانگ ءِ بلاھیں شوک ئِے ھست، وتی گپ ءُ تران ءِ وھد ءَ اردو ءُ دری زبان ءِ لبز ئِے ھوار نہ کت اَنت۔ بلکیں مُدام بلوچی ئِے زگر داشت۔ گْوش اَنت کہ نواب اکبر بگٹی ءَ ڈیرہ بگٹی ءِ تہ ءَ بلوچ راج ءِ ھر وڑیں جیڑہ بلوچی رسم ءُ رواجانی تہ ءَ وت شیر ءُ شَکل کت اَنت ءُ پیسلانی وھد ءَ مُدام بزگ ءُ مزلومانی ھمدرد اَت۔
پاکستان ءَ 2002 ءَ بلوچستان ءِ لُٹ پُلگ ءُ بلوچ راج ءِ چُکچنی(نسل کُشی) ءِ پندل سا اتگ۔ بندرگاھیں شھر گْوادر، ریکوڈک، سوئی گیس، سینڈک ءُ دگہ بازیں بلوچ راج کدرتی گنجانی لُٹپُل ءِ پرمان دات گُڑا شھید اکبر بگٹی ءَ دژمن ءِ دیم ءَ رکشان، مکُران تا کوہ سیلمان سرجمیں بلوچ راج ئِے یکجاہ کَت۔ پد ءَ 2003 ءَ بلوچستان ءِ آجوئی واست بلوچی راجی جنگ بندات بوت ءُ داں مرچیگ ءَ ھمے راجی جنگ شریں دْروشمے ءَ جُنزان اِنت۔
دژمنیں پاکستان ءَ 26 اگست 2006 ءَ پیرسالیں بلوچ راجی رھشون اکبر بگٹی گوں دگہ بازیں سرمچاراں کوھلو ءِ ھند بھمبور کوھاں شھید کنگ۔ دژمن ءَ شھید نواب اکبر ھان بگٹی ءِ بے توارکنگ ءِ جھد کُرت کہ بلوچ راج بے رھشون بہ بیت، پاکستان ءِ گلامی ءَ بہ منّ ایت، بلوچ ءِ راجی جنگ ھلاس بہ بیت بلے آ بے سوب بوت۔ شھید اکبر ھان ءِ دیمونی(کُربانی) ءَ پہ بلوچ راج ءَ ایک انچیں راھے جوڑ کرت که مروچی ما ھمے راه ءَ جنزان اِیں۔شھید نواب اکبر ھان بگٹی ءَ دژمن ءِ دیم ءَ سر جھلی ءِ جاه ءَ په وتی راج ءُ سرڈگار ءَ ندر بوگ گچین کرتگ ءُ وت ءَ ماں بلوچ راجدپتر ءَ نمیران کتگ۔
بلوچ راج ءَ منّگ لوٹ ایت کہ ما بلوچ ایک راجے نہ بوتگ ایں، ما وت ءَ ماں دمگ ءُ ٹَکراں بھر ءُ بانگ کت۔ دژمن ءَ بلوچ راج وتگڑ ءُ کاسگچٹیں دمگی سردار، نواب ءُ میرانی گُلام داشتگ کہ بلوچ راج یکجاہ ءُ یکمُشت مہ بیت۔ بلوچ راج وت ءَ راجے مہ لیک ایت بلکیں ھرکَس وت ءَ مینگل، زھری، بگٹی، لھڑی، شاھوانی، مری، رھیسانی، جمالی، مگسی، بُزدار، لیگاری، رِند ءُ لاشار بہ گْوش ایت۔
ما گِند اِیں وھدیکہ 1948 ءَ پرنس ابدلکریم، 1956 ءَ بابو نوروز ھان ءُ 1973 ءَ اتااللہ مینگل ءُ نواب ھیربکش مری ءَ پہ راجی آجوئی ءَ جنگ کُت گُڑا نزیکیں کِر ءُ کش ءِ ھچ بلوچ راج ءِ ٹَکر ءَ ھمیشانی کُمک
نہ کت ءُ کَس ھمے راجی جنگاں ھوار نہ بوت۔ بزانکہ اے راج ءَ شھید اکبر بگٹی ءِ وڑیں یک بلاھیں رھشونے پکار اَت کہ دیم ءَ بیا آتکیں ءُ راج ءَ آجوئی ءِ راھے پیش بہ داشتیں۔ یک انچییں رھشونے کہ راج ءَ پہ بلوچستان ءِ آجوئی ءَ آئی ءِ گْوانک ءَ لبیک بہ کُتیں۔ گُڑا ھمے رھشون ءُ راجی ھستی شھید اکبر بگٹی اَت کہ وتی راج ئِے پہ راجی وتواجھی ءُ بلوچستان ءِ آجوئی ءَ یکجاہ ءُ یکمُشت کُتگ ءُ مرچاں رکشان تا مکران ءَ بلوچ راجی سرمچار دژمنیں کبزہ گیر ءَ پْروش دیگ ءَ اِنت۔
بلے اے راجی جُھد ءِ لھتیں کمزوری ھم ھست اَنت۔ مرچاں شھید اکبر بگٹی، شھید بالاچ مری، جنرل اسلم بلوچ، شھید بانُک کریمہ بلوچ ءُ زِندانیں بانُک مھرنگ بلوچ وڑیں راجی رھشوناں بلوچ راج آگاہ ءُ سرپد کُت ءُ ماں ٹَکراں بھر ءُ بانگیں بلوچ راج یکجاہ اِنت۔ ما بزان ایں کہ مرچیگیں جنگ 2003 ءَ شھید اکبر بگٹی ءُ شھید بالاچ مری ءَ بُنگیج کت گُڑا بی ایس او ءِ وانِندھیں سسائی بلوچ تبک ءَ جنگ وتیگ کت۔ پد ءَ وھد ءُ جُھد ءِ ھمراھی ءَ بلوچ راجی آجوئی جنگ یکشل ءَ دیمروئی کنگ ءَ اِنت ءُ مرچاں لس بلوچ وانِندھیں ورناھانی دست ءَ شُت، مرچاں بلوچ زالبول ھم اے جنگ ءِ بھر اَنت۔
ما گِندگ ءَ ایں کہ مرچاں اے تْرُندیں جنگ ءَ رکشان تا مکُران ءَ بلوچ راجی سرمچار پاکستانی پوج ءَ پْروش دیگ اَنت بلے کوہ سلیمان ءِ سردار ءُ نوابانی بازیں دمگ انچوشکہ بولان، ڈھاڈر، سبی، بارکھان، کوھلو، ڈیرہ بگٹی، ڈیرہ مراد جمالی، جھل مگسی، جیکب آباد کشمور، راجنپور تا ڈیرہ گازی ھان ءَ ھاسیں جنگ نیست گُڑا مارا اے راجی جنگ سردارانی دمگاں ھوار سندھ ءُ پنجاب ءِ بلوچ دمگاں ھم سر گنگی اِنت۔
شالا بلوچستان آجو، بلوچ راج وتی ڈیھ ءِ وتواجہ بات۔ راجمستری بلوچستان دیمروی بکنات۔
***
