جنگ آماچیں ءُ ایردستیں ڈیھ ءِ سر ءَ وھدے کسے ودی بیت آئی اُمبر ءِ گوْزان ءَ آئی دل ءَ لھتیں جُست ودی بنت۔ اِستان چی یے؟ زورگیر کئے اِنت؟ گُلامی چی یے؟ راج چی یے؟ راجدوستی چی یے؟ گھگیری چی یے؟ گھگیری چوں بیت ؟آشوب چی یے؟ آشوبی جُھدکار چی یے؟ آشوب چوں کئیت؟ آشوب چوں آؤرت کنئے؟ آشوب ءِ بنکی لوٹ چی اَنت؟ جنز چی یے؟ جُنز چوں یکشل ءَ دیم ءَ شُت کنت؟ جُستانی امبارے۔۔۔
گوں ھمے جُستاں ھوار جَنگ، جُنز، ءُ آشوب گوں وتی گشادیں گاماں دیم ءَ روان اَنت۔ جنگ روچ پہ روچ، سال در سال گیشتر مُھکم تر ءُ گوں ترندی ءَ آجوئی ءِ منزل ءِ نیمگ ءَ پند جنان اِنت۔ ھمے جنگ ءِ ھمگامی ءُ آجوئی سپر ءِ تہ ءَ لھتیں انچیں سنگت بنت کہ پہ آشوبی گل ءُ وتی ڈیھ ءِ ھاتر ءَ وتی ساہ ءَ ندر کنگ ءَ یک ساھتے ھم چک ءُ پد نہ بنت، ھمک زمہ واری ءُ ھروڑیں گل ءِ کارے ءَ پہ ساڑی بنت۔ ھر وڑیں ڈُبہ ءِ پیلو کنگ ءَ گوں بچکندے ءَ ساڑی بنت۔
چمیشاں یکے سنگت مقبول (حسنین) اِنت۔ دنتان درشیں زمستان ءَ، کہریں تیرماہی لِواراں، ھار ءُ ھیروپاں بگر داں ترونگل ءُ انگر ءُ اگریچاں، آ سنگر ءَ ساڑی اَت۔ پہ یک آشوبی جُہدکارے ءَ چِزّے کہ پہ آئی ھژدری اِنت آ پہ وتی گل ءُ وتی راج ءَ گوں کمیٹیڈ، ڈسپلن، ءُ آئی تہ ءَ سیاسی جرت بوھگ اِنت۔ کمٹمنٹ بزاں گوں وتی مکسد ءُ لوٹ ءَ گوں ایمانداری، ھُب ءُ دل ء سِتک گوں داں گڈی ساہ ءَ اوشتگ۔ ءُ مقبول ءَ کمٹمنٹ وتی دست ءُ دلاں بوتگ ءُ تلارانی کنڈگاں ترّگ ءَ بوتگ۔
ڈسپلن ءُ جرت ءَ گوں اوتاگ روک اَت۔ توکل ءَ چہ ھُشکاوگیں ڈگار چہ آشوبی پگر ءَ سیر آپ اَت۔ انچوش کہ ڈاکٹر ھیبتان بشیر پہ نمیرانیں گَنجل ءَ گوْشیت کہ گنجل ءِ نام ءَ بلکیں بازیں جُہدکارے بہ زانت، بلے چہ آئی کِرد ءَ باز کم مردم آشنا اِنت۔“ بگندئے سنگت مقبول ءَ ہم بازیں سنگتے زانت، ہمراہ ءُ یک اوتاگ بوتگ اَنت، ءُ بازینے نہ زانت ہم بلے آئی جوزگ، توکل ءُ جرت، ءُ ھاسکر آئی کرد ءُ آئی جہد ءَ الم بہ زاننت، ءُ آئی کوھیں توکل ءَ ماں وتی جبین ءَ ایر بہ زُور اَنت۔ چیا کہ تؤ گوْشتگ اَت گپ تہنا توکل ئیگ اِنت۔
چوشکہ فلسطینی شائر محمد موسیٰ ءِ کسانیں لچہے، مدتے بیت کہ منی مَجگ ءَ چہ در نئیت
A pain that not
even the death
of a thousand
tyrant can
erase.
بزاں ”انچیں دردے کہ ھزار زوراکانی مرگ ءَ پد ھم شات نہ بیت۔“ ھؤ، سنگتانی رد ءَ آئی ءَ گْوشتگ اَت کہ ”من ءَ گُلامی ءَ ابید دگہ مستریں درد نیست.“ بگندئے کہ گُلامی ھم ھنچو تُرسناک اِنت کہ آئی ءَ وتی کمفرٹ زون پادمال کُت ءُ آجوئی ءِ گرانیں سپر ءَ اوار بوت۔ ھؤ، اگاں من نمیریں سنگت ءَ آشوب ءِ یک پچیں ھیلکاری کتابُکے بُہ گش آں داں رَد نہ باں۔ گوشنت کہ پُھلیں شہیدانی رندگیری کنگی اِنت ءُ اگاں شہید ھیلکاری کتابُکے بہ بیت داں باج مئیگ اِنت، ءُ مئے بیت۔
***
