وھدیکہ یک راجے ءِ سر ءَ اُرش بیت، آئی ءِ آزات ءُ وتواجھیں ڈیھ کبزہ کنگ ءُ گُلام جوڑ بیت گڑا آ گیرتمندیں راج کبزھگیر ءِ گلامی ءَ نہ منّ ایت بلکیں پہ وتی راجی آجوئی ءَ جنگ کنت۔ بلے بژن اِنت کہ ما بلوچ یک راجے نہ بوتگ ایں، ما وت ءَ ماں دمگءُٹَکراں(علاقہ و قبائلاں) بھر ءُ بانگ کتگ۔ دژمن ءَ بلوچ راج وتگڑ ءُ کاسگ چٹیں دمگی سردار، نواب ءُ میرانی گُلام داشتگ کہ بلوچ راج یکجاہ ءُ یکمُشت مہ بیت۔ بلوچ راج وت ءَ راجے مہ لیکھ ایت۔ ھرکَس وت ءَ مینگل، زھری، بگٹی، لھڑی، شاھوانی، مری، رھیسانی، جمالی، مگسی، بُزدار، لیگاری، رِند ءُ لاشار بہ گْوش ایت پمیشکا بلوچ راج یکشل ءَ سرکاری سردار، میر ءُ نوابانی گلام اِنت۔
ما گِند ایں وھدیکہ 1948 ءَ پرنس ابدلکریم، 1956 ءَ بابو نوروز ھان ءُ 1973 ءَ اتااللہ مینگل ءُ نواب ھیربکش مری ءَ پہ راجی آجوئی ءَ جنگ کُت گُڑا نزیکیں کِر ءُ کش ءِ ھچ بلوچ راج ءِ ٹَکر ھمے راجی جنگاں ھوار نہ بوتگ اَنت۔
بزانکہ اے راج ءَ یک بلاھیں رھشونے پکار اَت کہ دیم ءَ بیا آتکین ءُ راج ءَ آجوئی ءِ راھے پیش بہ داشتیں۔ یک انچییں رھشونے کہ راج ءَ پہ بلوچستان ءِ آجوئی ءَ آئی ءِ گْوانک ءَ لبیک بہ کُتیں۔ گُڑا ھنے رھشون ءُ راجی ھستی شھید اکبر بگٹی اَت۔ شھید اکبر ھان بگٹی ھما راجی رھشون ءُ آجوئی جُھد ءِ سرمچار اِنت کہ وتی راج ئِے پہ راجی وتواجھی ءُ بلوچستان ءِ آجوئی ءَ یکجاہ ءُ یکمُشت کُتگ ءُ مرچاں رکشان تا مکران ءَ بلوچ راجی سرمچار دژمنیں کبزھگیر ءَ پْروش دیگ ءَ اِنت۔
شھید اکبر ھان بگٹی 12 جولانی 1926 ءَ بلوچستان ءِ دمگ بارکھان ءَ نواب مھراب ھان بگٹی ءِ لوگ ءَ پیدا بوت۔ کراچی گراٸمر اسکول ءَ دہ تبک(جمائت) ونت ءُ پد ءَ گوں دگہ بازیں بلوچ راجدوستیں ھمتبکاں لاھور ایچیسن کالج ءَ ونت ئِے۔ دیم ءَ ھائیر ایجوکیشن ءِ واست ءَ انگلینڈ ءَ شُت ءُ اوکسپورڈ یونیورسٹی ءَ ھم گریجویشن ئِے کت۔
چوناھا شھید اکبر ھان بگٹی بلوچ کوم ءِ بگٹی ٹکر ءِ پاگواجہ اَت بلے آئی ءَ مُدام بلوچ ءِ درد ھست اَت پمیشکا راجکاری(سیاست) ءِ تہ ءَ بلوچ راج راجدوستیں رھشونے ءِ نام ءَ زانگ بیت۔ شھید نواب اکبر ھان بگٹی 1973 تا 1974 ءَ بلوچستان ءِ گورنر ءُ 1989 تا 1990 ءَ بلوچستان ءِ سروزیر(وزیرآلہ) بوت. چہ وتی سروزیری ءَ بلوچستان ءِ تہ ءَ ماں وانگجاھاں براھوئی ءُ بلوچی وانینگ ءِ رواج دات ئِے۔ پد ءَ گوں وپاک ءُ سینٹر ءَ جیڑھانی سوب ءَ بگٹی ءِ سرکار پْروشینَگ بوت۔
شھید نواب اکبر بگٹی بلوچ راج ءِ یک آزات ھیال ءُ راجمستری ءِ منّوگریں رھشونے اَت ءُ شھید اکبر ھانی بگٹی ءِ نز ءَ بلوچ زالبولانی یک بلاھیں ازتے ات پمیشکا آئی ءَ وتی دمگ ڈیرہ بگٹی ءَ گرلز اسکول ءُ کالج ھم پچ کنائینتگ اَنت کہ بلوچ زالبول ھم وانگ ءُ زانگ ءِ پڑ ءَ بیا اَنت۔ شھید اکبر بگٹی یک زبان دوست ءُ راجدوستیں رھشونے اَت، بلوچی وانگ ءِ بلاھیں شوک ئِے ھست، وتی گپ ءُ تران ءِ وھد ءَ اردو ءُ دری زبان ءِ لبز ئِے ھوار نہ کت اَنت۔ بلکیں مُدام بلوچی ئِے زگر داشت۔ گْوش اَنت کہ نواب اکبر بگٹی ءَ ڈیرہ بگٹی ءِ تہ ءَ بلوچ راج ءِ ھر وڑیں جیڑہ بلوچی رسم ءُ رواجانی تہ ءَ وت شیر ءُ شَکل کت اَنت ءُ پیسلانی وھد ءَ مُدام بزگ ءُ مزلومانی ھمدرد اَت۔
پاکستان ءَ 2002 ءَ بلوچستان ءِ لُٹ پُلگ ءُ بلوچ راج ءِ چُک چینی (نسل کُشی) ءِ پندل سا اتگ۔ بندرگاھیں شھر گْوادر، ریکوڈک، سوئی گیس، سینڈک ءُ دگہ بازیں بلوچ راج کدرتی گنجانی لُٹپُل ءِ پرمان دات گُڑا شھید اکبر بگٹی ءَ دژمن ءِ دیم ءَ رکشان، مکُران تا کوہ سیلمان سرجمیں بلوچ راج ئِے یکجاہ کَت۔ پد ءَ 2003 ءَ بلوچستان ءِ آجوئی واست بلوچی راجی جنگ بندات بوت ءُ داں مرچیگ ءَ ھمے راجی جنگ شریں دْروشمے ءَ جُنزان اِنت۔
گْوش اَنت کہ راجی آجوئی ءِ جھد ءَ کُربانی ھم دیگ لوٹ ایت، پد ءَ 26 اگست 2006 ءَ بلوچ راجی رھشون پیرسالیں اکبر بگٹی گوں دگہ بازیں سرمچاراں کوھلو ءِ ھند بھمبور کوھاں شھید کنگ بوت۔ دژمن ءَ شھید نواب اکبر ھان بگٹی ءِ بے توارکنگ ءِ جھد کُرت کہ بلوچ راج بے رھشون بہ بیت، پاکستان ءِ گلامی ءَ بہ منّ ایت، بلوچ ءِ راجی جنگ نزور ءُ ھلاس بہ بیت بلے آ بے سوب بوت۔ شھید اکبر ھان ءِ دیمونی(کُربانی) ءَ پہ بلوچ راج ءَ ایک انچیں راھے جوڑ کرت که مروچی ما ھمے راه ءَ جنزان اِیں۔شھید نواب اکبر ھان بگٹی ءَ دژمن ءِ دیم ءَ سر جھلی ءِ جاه ءَ په وتی راج ءُ سرڈگار ءَ ندر بوگ گچین کرتگ ءُ وت ءَ ماں بلوچ راجدپتر ءَ نمیران کتگ۔
بلے اے راجی جُھد ءِ لھتیں کمزوری ھم ھست اَنت، باید اِنت ما ھمے کمزوریاں ھلاس کنان ءَ جنزان بَہ ایں۔ مرچاں شھید اکبر بگٹی، شھید بالاچ مری، جنرل اسلم بلوچ، شھید بانُک کریمہ بلوچ ءُ زِندانیں بانُک مھرنگ بلوچ وڑیں راجی رھشوناں بلوچ راج آگاہ ءُ سرپد کُت ءُ ماں ٹَکراں بھر ءُ بانگیں بلوچ راج یکجاہ اِنت۔ ما بزان ایں کہ مرچیگیں جنگ 2003 ءَ شھید اکبر بگٹی ءُ شھید بالاچ مری ءَ بُنگیج کت گُڑا بی ایس او ءِ وانِندھیں سسائی بلوچ تبک ءَ جنگ وتیگ کت۔ پد ءَ وھد ءُ جُھد ءِ ھمراھی ءَ بلوچ راجی آجوئی جنگ ءَ سک دیمروئی کت ءُ یکشل ءَ دیمروئی کنگ ءَ اِنت۔ پیسر ءَ بلوچ آجوئی جنگ لھتیں دمگی سردار ءُ نوابانی دست ءَ ات مرچاں لس بلوچ وانِندھیں ورناھانی دست ءَ شُت، مرچاں بلوچ زالبول اے جنگ ءِ بھر اَنت۔
ما گِندگ ءَ ایں کہ مرچاں بلوچ راجی جنگ سک تْرُند اِنت۔ رکشان تا مکُران ءَ بلوچ راجی سرمچار پاکستانی پوج ءَ پْروش دیگ اَنت بلے کوہ سلیمان ءِ سردار ءُ نوابانی بازیں دمگ انچوشکہ بولان، ڈھاڈر، سبی، بارکھان، کوھلو، ڈیرہ بگٹی، ڈیرہ مراد جمالی، جھل مگسی، جیکب آباد کشمور، راجن پور تا ڈیرہ گازی ھان ءَ ھاسیں جنگ نیست۔
باید اِنت راجی لشکر بی ایل اے ھمے دمگاں جنگی کیمپاں اڈ کنگ ءُ راجی جنگ ءَ سردارانی دمگاں ھوار سندھ ءُ پنجاب ءِ بلوچ دمگاں ھم سر بکنت۔
شالا بلوچستان آجو بات، بلوچ راج وتی ڈیھ ءِ وتواجہ بات۔ راجمستری ءُ آزاد ھیالیں بلوچستان دیمروی بکنات۔
٭٭٭
