لالا رھم پُل۔۔۔۔۔۔۔!!
تو زان ئے گْوھار ءَ پہ برات ءَ کُجام مُرادانی دوچی ئیں ھُل دُتکگ ءُ زِرد ءِ بُوستان ءِ پُلّاں چہ وشبو جتگ، کُجام زاگیں واھشتانی امبار سینگارتگ ءُ زِندگی ءِ ارمانانی چراگ روک کُتگ ءُ رُژن ءَ تالان کنگ لوٹ اِیت۔۔۔۔۔۔۔۔۔، ءُ ھمے رنگ ءَ ھزار مُرادیں مات ءَ ھم پہ مُرادے ھزاراں واھگ گْوپتگ ءُ مھرانی بیرکے گْوات ءَ داتگ کہ منی ناز ءُ لاڑیں بچّ پہ بچکندان کَیت ءُ وتی جنگ ءِ کِسّھاں کار اِیت۔۔۔۔۔۔۔۔۔۔
بلے! ھست دِگہ کسے کہ آ ھم ودارانی ساھگ ءَ گوں وتی گُل ءُ پُلّاں نِشتگ برے ترانگے گْوپ اِیت ءُ واھگے پرّیچ اِیت ، نوں رھم پُل من چے نوشتہ بِہ کن آں۔۔۔۔۔۔۔؟
چی ءَ کہ نوں آھگی وابانی سھتمان ڈُرینگ ءُ ارسانی ھارے ملّینگ بوتگ ، بلے جزمّاں اے ارسانی ھار دُژمِن ءَ کدی موہ نہ دنت کہ پہ گیگ بِہ بیت ، بلکیں آئی ءَ چہ ھُنڈالاں ولگوج کنت ءُ پہ مُدامی بیگواہ۔۔۔۔۔۔۔۔۔۔
رھم پُل۔۔۔۔۔! پمیشکا من پہ سِتک اے ھبر ءَ نوشتہ کن آں کہ تئی ھونانی ملپد داں بلیدہ جاڑین ءَ بگر میرو ءِ بالگتر ءُ بھشتیں گڈّگی ءَ ھوار کولواہ ءُ تیوگیں ڈیھ ءَ تان دنت ءُ کَوش ءِ زُبان ءَ آشوبی سَوتے الھان بیت ءُ ترا پہ ھالو ھال نازینیت ، تئی سرمچنڈی ءِ داستان ءَ راجدپتر ءَ ھوار ھر زِرد ءِ رگ ءُ ریشگاں نوشتہ کنت ءُ کُربانی دَیَگ ءِ پلسپہ ءَ ڈسّ اِیت کہ راج گوں کُربانیاں زِندگ مان اَنت۔۔۔۔۔۔۔۔۔
پرے ھاتِر ءَ من گْوش آں تو نہ مُرتگ ءُ زِندگ ئے، چی ءَ کہ تئی داتگیں دیمونی تھنا پہ وتی زھگ ءُ کھول ءَ نا ، پہ وتی ھند ءُ دمگ ءِ واستا نا ، بلکیں پہ گُلیں ڈیھ ءُ راج ءِ ھاتِر ءَ بوتگ۔ کسے کہ پہ راج ءُ ماتیں وتن ءِ ھاتِر ءَ ندْریگ بیت ، آئی ءَ مرگ کدی گار ءُ بیگواہ کُت نہ کنت ، راستے کہ جسمانی دْروشم ءَ مئے دیوان ءُ مْیان ءَ ساڑی نہ بیت ، بلے آئی ءِ پہ راج ءَ کولیگی ءُ بودناکی ءِ کِسّہ داں راج ءِ زھگے مان اِیت۔۔۔۔۔۔۔۔۔۔ھست مان اِیت۔۔۔۔۔۔۔۔۔۔
رھم پُل۔۔۔۔۔! اے ھبر کہ من سنگتانی دپ ءَ مُدام اِش کُتگ ترا گنوک ءِ نام ءَ توار اِش جتگ ءُ تو پہ ٹھک ءُ بِچکنداں بوتگ ئے ، زِی بِہ گِندئے من اے ھبر نہ پھم اِتگ کہ تو پہ راستی گنوگے ئِے!
بلے مرچی من ھم ترا گنوک گْوش آں۔۔۔۔۔۔۔۔۔! چی ءَ کہ تو پہ ماتیں گُلزمین ءَ گنوک اِت ئے ، تئی مھرانی کیاس کنگ زِی الم گْران بوتگ ، چوش کہ مرچی من پہ پھر گْوش آں کہ تو وتی ھکّ ادا کُت ءُ رپت ئے۔ ترا سنگتاں کہ گنوکی ءِ پنّام داتگ اَت ، تو پہ گْواچن ءُ راستی وتی گنوکی ءِ گْرانیں بار ءُ ڈُبّہ پہ گنوکی پیلو کُت۔۔۔۔۔۔۔۔۔
چہ تئی داتگیں دیمونیاں من دِل ءَ دائم سِدکاں کہ تئی کاروان ءِ تہ ءَ ھست چوشیں گنوک کہ چو تئی داب ءَ وت ءَ پہ ڈیھ ءَ کولیگ بَہ کنت ، وتی گنوکی ءِ ھکّ ءَ پیلو بِہ کنت ءُ آجوئی ءِ کلوہ ءَ گوں وتی ھوناں بِہ شِنگینیت۔۔۔۔۔۔۔کہ من گنوکاں، ھو گنوکاں! بلے پہ مھلبیں ھاک ءَ۔۔۔۔۔۔۔۔۔۔۔
جزّماں۔۔۔۔۔۔! رھم پُل جزمّاں! تئی کاروان چو تئی داب ءَ بے گنوک نہ بیت۔۔۔۔۔۔۔۔۔۔نہ بیت۔۔۔۔۔۔۔۔۔نہ بیت۔۔۔۔۔۔۔۔۔
