سیکل ءَ پورت پورت شروع(بنا) کُت اِمداد ( ارپان ) ریس گپت بلکیں کنڈگ ءَ سر بِہ کپ اِیت بلے تیل کم اِت اَنت ۔ اِمداد دات کو کارے پہ برمش (نورخان ) ءَ کہ جلدی دَور کن آئی پاد جنان پاد جنان پہ زورے سیکل ئِے سر گیتک۔
انچُش دم بُرتگ اَت ئِے کہ بیرک ءِ لگت دیگ ئِے ھم واک ءِ نہ بوت۔ آئی گوں وتی بچکی آں پاد گِرّ کُت اَنت دانکہ سیکل اوشتات ۔شھر ءِ مِرمراکین لیٹ زاھر اِت اَنت ۔ آئی ءَ جیگ ءِ بٹن پچ کُت اَنت سرد سردُکیں کئوشے کشگ ءَ اَت ۔ اِے کئوش گُش ئے آئرا صفیہ (مات) ءِ مھراں بکشاھگ ءَ اَت ءُ توار کنگ ءَ اَت بچی بْیا نوں ترا سک دیر اِنت کنشکلات بے تو مونجا ءُ ابیتک اِنت۔
آئی سر ماں سیکل ءِ اینڈل ءِ سر ءَ ایر کُت سُچ ءِ شونزیں لیٹ آئی چمّاں سک اَت بہ گِندئے تھمبل ئِے نہ کُت کہ آ سوچ ءَ بند بہ کنت۔ آئرا گُش ئے بے واکی دِگہ لِزتے دیگ ءَ اَت۔ آئی سوچ ءِ نبد کنگ ءِ بدل ءَ گیرے مان کُت۔
توپک ئِے چہ کُپگ ءَ ایر لگوشت ءُ سیکل ءَ تِکہ ئِے دات نوں بس بْرمش ءِ وادر ءَ اَت ۔
آئی گشتی (موبائل) ءِ کُلوہ(میسج) ءِ توار ءَ گوں پُشتی نیمگ ءَ لیٹے ءِ بْرمش زاھر بوت۔ آئی ھکّل کُت ۔ تو کئے ئے ءُ دست اشتاپ اشتاپ ءَ پہ توپک ءَ دَور دات اَنت۔ چہ لیٹ ءِ شھمانی نیمگ توارے چِست بوت
من بْرمش آں اڈئے ۔
آئی پد ءَ سر ماں اینڈل ءِ سر ءَ ایر کُت ءُ اُبینگ بوت ۔ بْرمش سوتے جنان ءُ پیداک اَت آئی پد ءَ پہ کُنّتی گُشت کئے ئے تو ۔ درد ءُ کئے ئے تو من اوں دِگہ کئے اِنت تو دِلپٹّ ئے ۔آئی سر انگت چہ اینڈل ءِ سر ءَ چِست نہ اَت ءُ کَندگ ءَ اَت ۔ پد ءَ زان ءَ دل ءَ اَت ئِے کہ بہ گُش اِیت کئے ئے تو ؟
تناں وھد ءَ بْرمش اَتک آئی پُشت ءَ پہ مھر شھماتے جت ئِے ھاں امدو چُش ئے تو ؟
سکّ دمبرتگ یار ۔ آپے واریں
منی چاگل ءِ آپ ھما پنچر ءِ جاگہ ءَ کُٹ اِت اَنت ۔ گُڑا چہ کچی ءَ منی آپاں در کن بہ دئے کہ من ءَ ھِچّ واک نہ کنت باور کن ئے ۔ برمش پہ آئی آپ ٹال کُت اَنت بزیر جگر
باریں سنگتاں ھال نہ کُتگ ؟ اِد ءَ وَ نِندگ نہ بیت زوت وتی ھال ءُ ھبراں کن اِیں رَو اِیں اِد ءَ نندگ وش نہ اِنت ۔
ھو راست گُش ئے بلے مئے پٹرول ھلاس اَنت من تو کُجا رو اِیں ؟
نوں وَ شپ اِنت ھرچیز بیت ھما سھب ءَ ۔ شپی کمّو ھالے ھبرے کن ایں وتی جاگہ ءَ بدل کن ایں باندا ھُدا کاراں شرّ کنت ۔ در کا اِیں ۔۔۔۔۔ انشااللہ ۔
من وتی کمّو پیسر ءِ اَ تکگیں کلوھاں چار آں سنگتاں کُلوہ کُتگ اَت مارا جاگہ ءَ بہ گُش اِت ۔ من شمئے مڈی ءَ شمارا دست ءَ دیاں۔ سنگت ءَ کجا بہ گُش آں باریں؟ ھما شمبے گنجی والا جاگہ چون اِنت ؟
شرّ اِنت ۔
بلے بہ گُش ئِے کہ
پیڑول بیار اِت گوں ءُ گُداں بے ھال نہ کن اِت ۔ تئی ءُ منی ھر دوکانی شلوارانی پادگ چاک اَنت ۔ ھھھھھھھ
ھو با ترا کئے گُشت بْیا کوہ ءَ اد ءَ پادگ ءُ جامگ دْراھ دِر اَنت ۔
کمبہ تو وتی ماس ءِ یکیں چُک اَت ئے ترا کئے گنوک کُت
اِمداد پہ توازا گُشت
بلے بْرمش پہ سنگینی درائینت
من ءَ!!! زمین ءِ مھراں ۔
امداد ءِ سر انگت اینڈل ءِ سر ءَ ایر اَت ۔
بْرمش ءَ نمبرے جت ءُ گپ ءَ بوت ۔
امداد سر چست کُت ءُ شھر ءِ لیٹاں پہ شیدائی چارگ اَت۔
گُش ئے امداد ءَ وتی زمیں بے کساس دوست بَوّگ ءَ اَت ۔ بہ گِند ئے دل ءَ ھمے جیڑگ ءَ اَت۔ باریں کدی بیت اے دَیار ءَ مارا کسّے ءِ تُرسے چیر مہ بیت کسے مارا اِے جست کُت مہ کنت کجا بوتگ ئے کجا رَوئے ۔ پد ءَ نہ دست رسیں گین سارتے کَشّ اِت ئِے ءُ موبائل ءَ گوں دلگوش بوت ،
آیاں ھالے رست کہ مزنیں فوجے کچ ءَ چِہ جھلی کوہ ءَ شُتگ ۔آئی بْرمش ءَ را گُشت بْیا اِد ءَ چہ در کپ اِیں سیکل ءَ جاھے ایر کن ایں سھب ءَ کا ایں شپ زانگ نہ بیت روچ وتی اِنت۔برمش ءِ آیگ ءَ گوں آیاں وتی جاہ بدل کُت ۔
امداد جُست کُت باریں پہ ورگ ءَ چیزے گون
زیکیں پُرانی یے گون اِنت دِگہ ھِچّ نیست
نیم ساھت ءِ پند ءَ پد آ آپے ءِ سر ءَ سر بوت اَنت وتی چاگل اِش آپ کُت اَنت۔ واب جاہ اِش جوڑ کُت۔
امدو چاھے مہ بوتیں؟
من وپس آں کہ سک دم بُرتگ زیکین اِنت راہ اِیں من ءُ تو ۔ ھمے گپاں گوں سِکّ ءِ دل ءَ جوڑ کُتگیں واب جاہ ءَ سِنگیں سر جاہ ءَ سر ئِے ایر کُت۔
برمش ساری ءَ تو گاٹ دی ئے من بہ دیاں ؟
برمش ءَ پہ کندگ گشت مزاک چیا کنے تو گاٹ ءِ وَڑ ءَ ئے اُوشتکائی واب ئے ھھھھھھ
من نشتگ آں تو آرام کن پد ءَ ترا پاد کن آں ۔
گوں ھمے ھبراں ۔ امداد اِے واب ءُ پرا واب شُت ۔
امدو پاد ءَ من ءَ نوں واب ءَ بے وار کُتگ کمّو وپساں باندا پد ءَ سپر اِنت
امداد پاد اَتک چمّ شوشت اَنت۔
سْہ ساھت ءَ رند برمش ئِے پاد کُت ۔ بام ءَ نوکی ساپی داتگ اَت۔
تو ڈے بل کمّو وپساں من اَنوں واب کپتگ آں۔ زان ءَ ماس ءِ دوشیگیں ھبر ءَ من ءَ وابی کُتگ!!!! ۔
چونیں ھبرے ؟
نزان آں من ءَ گُشت ئِے انوں مردم ھست باندا اَلّم بْیا من ءَ گوں تو ھبرے ھست
من ھما اِنت جیڑگ ءَ بوتگ آں ۔ چونیں ھبرے بیت ماس ءَ منی گوما پیسر ءَ ھِچّ چُشیں ھبرے نہ کُتگ
امداد پہ کُنّت گُشت۔۔ برمشو بلکیں ماس تئی زاماسی ءَ دلمانگ اِنت ؟
تو ڈے بل یار چُشیں وشیں ھبر مہ کن اِے شپ ءِ نیم ءَ
شپ تئی ٹیلاگان بوت نوں روچ در کئیت تو پاد ءَ چاھے بِر کن من رو آں۔دُور گندے کن آں کا آں ۔
روچ ءِ ساپی ءَ امداد شُت کوہ سر ءَ ھلاکہ الکاپی ءَ چار اِت ءُ اتک چاھے وارت ئِے پد ءَ پہ نیٹورک ءَ شُت اَنت
شھر ءِ سنگتاں گوں ھال اِش بوت ۔
آ شمبے گنجی والا جاگہ ءَ شُت اَنت دانکہ سنگت آتکگ اِت اَنت ۔
آ سلام ءُ دروت بوت اَنت۔ آیاناں بزیں شیر چاہ گوں بسکوٹ ءَ وارینت اِش ۔ بلے آ اشتاپ اِت اَنت کہ آیاں بیگاہ ءَ پد ءَ سنگتانی کِرّ ءَ روگی اَت ۔ آیاں زوت زوت سنگت کُلوہ ءُ ھال کُت اَنت ۔ سنگتے ءَ گُشت امداد تو مرچی سک اشتاپی ئے چون اِنت ترا نِند دیوانے کن اِیں۔ آئی پہ توازائی گُشت یار مرچاں من سکّ زمہ دار اوں جلدی واتر کنگی اِنت زندگ بَہ ایں گندگ بَہ ایں ۔ آیاں مڈی چار بڈی کُت اَنت ۔ پہ سیکل ءِ جاہ ءَ رپت اَنت۔ کِساس 10 بج ءَ آ سر بوت اَنت سنگتاں روگنی نانے گوں ھیک ءَ آرتگ اَت آیاں اِے وارت اَنت ءُ وتی سواری ساڑی کُت ۔ آ نیٹورک شُت اَنت کہ گُڈّی ءَ ھالے کن اِیں پد ءَ رو اِیں پہ سنگتاں ۔
امداد ھمّل ءِ ماس ءَ گوں ھم تران اَت ءُ ھمّل ءِ جُست ءَ اَت ۔
ھمل کج اِنت۔؟
ھمّل انوں من واپینتگ
ماس کجا اِنت اد ءَ تُرو ءِ لوگ ءَ شِتگ توارے کناں۔
اِنّاہ پد ءَ دِگہ وھدے ھال کناں انوں ما اشتاپ ایں روگی اِیں راہ دور اِنت۔بلے ھمّل ءِ ماس باز ھبر ءَ دلمانگ اَت۔ امداد اشتاپ اَت کہ آئرا وتی کار گیشینگی اِت اَنت ۔آئی برمش ءَ را سِنگ ئِے جت ءُ گُشت وتی ماسے ھالے بہ گِرّ گوں شپی پد ءَ ترا واب نئیت ۔ ھاھاھاھا
ھو من گپ ءَ آں ۔
جلدی کن پد ءَ گرم بیت
بْرمش گل گل اَنت ۔
بس کمّو …… ! دیر نہ کن ایں
ساھتُکے ءَ رند گِشت ئِے امداد منی چاگل ءَ بزور گوں بیا من اِد ءَ چہ ایر کپاں
آ سیکل ءَ سوار ءُ رھادگ بوت اَنت
نیم روچ ٹاک ءَ نوں سر بوت اَنت ۔ سکیل اِش چیر دات شُت ساھگے ءَ نشت اَنت دم اِش بال ءَ کُت ۔ ڈیوے پچ ئِے کُت
بہ گِند ئے اِے ڈیو چہ داوتے ءَ کمتر نہ اَت کمّو ساسارگ ءَ رند آیاں وتی مڈی بڈّ ءَ کُت ءُ در اَتک اَنت۔ روچ گرم اَت بلے آیاں راوگی اَت
برمشو چے ھال ھست اَت ھلاکہ ءَ نوکیں باریں ؟
ھال ھاسیں نیست اَت
ماس گُشیت بیا ترا زاماس کناں ترو ئیگ ءَ۔
گُڑا تو چے گُش ئے ؟
من ءَ یار وتی ناکو زتک دوستّر بیت، گڑا تو ماس ءَ را گُشت
ھو منا گُشت ئِے شرّ باندا باریں ناکو ءَ را پونے کن آں ۔
ناکو زان ءَ کجا اِنت ؟
ناکو اِد ءَ نہ اِنت بھرین ءَ اِنت ۔
بلے ناکو ءِ جنین باریں من ءَ زور اِنت یا اِنّاہ
اڈے ناکو ءِ جنین ءَ را چہ تو شرّتریں بچکے رس اِیت ؟
برمش پہ پَہرئے گُشت ھرام بات
اِے دل پٹ اَنت کہ شما جلدی مِر اِت مَرگ وَ ھر کسی سر ءَ ھست اِنت مئے مرگ ءَ انگت مڑاھے گون چے گُش ئے تو ؟
بے شک ۔
شرّ اِنت کہ ما ھمے گم چہ وتی سر ءَ دُور کُت
کککککک
بْیا منی بڈّ ءَ کمّو راست کن یک کوپگے ءِ سر ءَ گیش زور اِنت ۔
رو اِیں اودا ڈکّ ءِ بُن ءَ دمے کن اِیں پد ءَ بڈّ ءَ شَرّ بند اِیں ءُ رو ایں ۔۔۔۔۔ شرّ
اِے ڈکّ آیانی سپر ءِ مستریں چکّاس اَت ۔ ایشی آ دیم ءَ دِگہ سے چار گنٹہ ءَ رند اوتاگ اَت
آ اَتک اَنت ڈکّ ءِ بُن ءَ نِشت اَنت امداد دُور گند کُت چپ ءُ راست ساپ چار اَت اَنت ۔ آیاں کمّو دم بالاد کُت پد ءَ ڈک ءَ سر کپان بوت اَنت۔ ڈکّ بُرز اَت۔
آ یکّے دومی ءَ کُنّت ءُ توازا کنان ءَ سر کپت اَنت۔
برمش اگاں تئی ناکو ءِ جنین ترا مہ زور اِیت گُڑا۔۔ ؟
گُڑا بلوچستان ءَ جنک باز اِنت ۔۔۔ من ءَ باریں سور ءُ سانگے نسیب ءَ بیت یا اِنّاہ۔ بلے جنک بلوچستان ءَ باز اِنت۔
اے ڈک ءَ مارا سُوری نہ کُت ۔ ککککککک
دُور گند ءَ بہ زور دُورگند کن من پارلمنٹ ( پیشاپ) ءَ رو آں ۔
امداد اَتک۔۔۔۔ دیست ئِے کہ بْرمش چیزے جیڑگ ءَ اِنت
ھاں برمشو تو چے جیڑگ ئے؟
چُک یار سکیں دوستیں چیزے اِے ھبر ءِ من ءَ مرچی سما بوتگ ۔ ماس مرچی منی گوما انچو گپ ءَ اَت گُش ئے من گُڈّی رند ءَ گوں آئی گپ کنگ ءَ اِت آں ۔ پہ من سکّ ھدوک اَت منی آروس بہ گِند ئے آئی زند ءِ مستریں واھگ اِنت
امداد ھیران اَت ءُ برمش ءِ ھبراں گوشدارگ ءَ اَت۔ پد ءَ دْرائینت ئِے
ھو چُک ترا بیت گڑا تو چُک ءِ دوستی ءَ زان ئے چوناھا ما نزان ایں ما مات ءُ پت ءَ چون دوست ایں۔
ھو گند ئے
برمش بلے کن رَو ایں کہ سنگت مئے وَدار ءَ نِشتگ اَنت مارا شپ کپ اِیت انگت سپر دُور اِنت ۔
تو دمبرتگ بْیا وتی چیزے منی بڈّ ءِ توک ءَ بہ کن
اِنّاہ جگر منی بڈّ برابر اِنت تو ساری ءَ بُو من تئی پُشت ءَ گون آں ۔
آ سر ءُ دُمب داں یک ساھت ءِ راہ ءَ شُت اَنت داشت اِش دمے کُت پد ءَ پہ اشتاپی در اَتک اَنت ۔
شُورّ وَڑیں لگوشتانکے ءَ سر کپ اَنت سر کپ ءَ برمش ساری اَت امداد پُشت ءَ ۔امداد سر کپ دم ئِے راست کُت داں دُور سُر ءُ پُرے دیست ئِے ۔امداد جلدی دُور گند ماں چمّاں کُت ۔ ھِچّ ئِے نہ دیست۔ بلے بْرمش ءَ را ھال ئِے دات کہ من چیزے دیست گار بوتگ ۔ آئی ھم جُست کُت کجا ؟ آ درچک ءِ پُشت ءَ۔آئی ءَ کندگے جت ءُ گُش ترا وھم اِنت ۔ اِد ءَ ھِچّ نیست ۔ ھمے دمان ءَ آیاں چہ کوہ ءَ سنگانی کپگاجلینگ ءِ توار اِشکُت ۔ برمش دیم گوں امداد کُت ءُ گِشت ئِے اِے توار کجا ءَ اِنت ؟ آیاں توپک تیر کُت اَنت ءُ زوت زوت پہ جھلادی رھادگ بوت اَنت۔
نتاں وھدی کوہ ءِ نیمگ ءَ چہ تیر جَنَگ بنا بوت
آیاں نزیک ءَ سنگر گپت ءُ پہ تھمبُل جنکوانی جاگہ ءَ چاران ءُ دانگے دانگے تیر آس دیان اِت اَنت۔
بْرمش ٹک کن ءُ بہ جن مردم زاھر اَنت وتی جند ءَ سمبال ۔
من ترا Cover دیاں تو برو دیم ءِ کٗور ءِ توک ءَ پد ءَ تو جناں بُو من کا آں ۔ مہ گبرائیں اے لگور ھِچّ کُت نہ کن اَنت تو برو جھل ءَ من ءَ cover بہ دئے من کا آں چو من ءُ تو جَنَگ بَہ ایں ۔
تیر بے ھساب پیداک اَت اِے وھد ءَ امداد دو پوجی جتگ اَت۔
برمش ءَ پہ کوکار گُشت اِد کٗورے توک ءَ ھست من ایشان جن آں یکے من جَتگ
بہ جن بہ جن ھِمّت کن
امداد ءَ چہ وت ءَ گیش برمش ءِ ھیال گور اَت بلے گندگ ءَ برمش بے ھِمّت نہ اَت شوکیں وڑے ءَ جَنگ ئِے داشتگ اَت
بْرمش ءَ امداد توار کُت
من اِد ءِ جتگ اَنت بِہ رو آں جھل ءَ ؟
ھو بہ رو بہ رو امداد برمش دیست آئی ھِمّت ءُ جزبہ گیش بوان بوت ۔
کہ آئی ھمراہ جنگولے اَت بلے کسان سالے اَت
برمش ماں کور ءِ نزیک ءَ سر بوت ءُ کپت امداد ھمے سرپد بوت بلکیں جنگ بوت
تیرانی کِساس چہ پیسر ئیگ ءَ کمّتر اَت کساس 7 8 مردم جَنَگ بوتگ اَت۔ بلوچی پوشاکانی توک ءَ ھم مردم گون اَت ۔ کہ آیاں جَنَگ اِت اَنت ۔
آئی برمش ءَ کوکار دات چون ئے ۔ بْرمش ءَ پسّہ دات
بلے آ بْرمش ءِ ھبراں سرپد نہ بوت
بس آئی اِنچو زانت منی شیریں ھمراہ زندگ اِنت ۔
لھزے ءَ رند آئی دیست برمش ءَ سنگر کُتگ ءُ جَنَگ ءَ اِنت ۔
آئی برمش توار دات من ءَ cover بدئے من اِیرکپاں جھل ءَ
بْیا بْیا من ایشانی دیم داشتگ آئی وتی بڈّ ءِ توشگ دور دات اَنت آپ ءِ چاگل زُرت تیر جنان ءُ جھل ءَ روان بوت ۔
آئی پادانی بُن ءَ یکے تیر جَنَگ ءَ اَت آ یک رندے پد ءَ نِشت سنائپر ءِ دورگند سر ءَ نِزر ئِے گپت ٹِکُ کُت ءُ جت اے مردے تیرانی آیگ بند بوت
آ دیم پہ برمش ءَ شُت ھمائی نزیک ءَ سِنگے سنگر ئِے کُت نِشت میگزین ئِے لوڈ کُت اَنت آئی دیست دانکہ برمش ءَ پاد ءَ تیر وارتگ۔ آئی چادر دور دات ءُ دْرائینت ئِے کہ۔ بہ زور پاد ءَ بند برمش ءَ آئرا ھال دات آ کوھے سر ءِ فوجیاں جنان کن آئی تیر پرداشت ءُ جت اَنت۔
نوں جنگ نِزور تر اِتگ اَت ۔ آئی برمش ءَ چہ جُست گپت تئی پاد سلامت اِنت شُت کن ئے ؟
ھو شُت کن آں کہ تیر ءَ بزگوشت ءَ را گپتگ تو تیراں جناں بو من جھل ءَ رو آں کور ءَ ایر کپت آں گُڑا مارا کس گپت نہ کنت۔۔ ھو ھو ایر کپ ایر کپ ۔ یک مزنیں تُپکے ءِ دپ پہ آیاں پَچ بوت بلے آیانی سنگر سِنگ اِت اَنت تیراں آیاناں گپت نہ کُت ۔ آ دلجم ءِ اِت اَنت یزیدی لشکر مرچی بے سوب بوتگ ما در کپ ایں ۔ کساس دو گنٹہ جَنگ جُنز اِت۔نوں تیر پھک نبد بوت اَنت بہ گِند ئے دژمن ھمے سرپد بوتگ اَت ۔ کہ اِے جَنَگ بوتگ اَنت۔ بلے آیانی جھد ھمیش اَت آ داں کور ءَ سر بہ بنت ۔ آیان گْرانی یے توار ھُش کُت۔
امداد برمش ءَ چہ جُست کُت ہیلی ءِ توار نہ اِنت ؟؟ ھو بچار ئِے باریں کجام نیمگ ءَ اِنت
زانگ نہ بیت بلے پیداک اِنت۔بلے وتی میگزین ءَ تیر مان کن تیار بو ۔
آ گوں ھمے ھبراناں اِت اَنت ۔ ہیلی سر بوت ۔گوں سر بَوّگ ءَ ھمے کورے توک ءَ جَنَگ ئِے بنا کُت
امداد وتی سنگر مٹّ کُت .
ءُ برمش ءَ را ھال دات کمانڈو ایر کنگ اَنت ۔
کُجا؟؟؟؟؟؟
ھمیش اِنت نزیک ءَ
بہ جن اِش آسر ءَ مہ کن نوں وتن یا کپن دِگہ راہ نیست
امداد سر کش اِت گُش ئے آئرا انگلیش فلم ءِ سینے دل ءَ اَتک کہ کمانڈو چیٹ ءِ سر ءَ چہ ہیلی ءَ ایر کپگ ءَ اِت اَنت آئی سنائپر سِنگ سر ءَ ایر کُت پد ءَ جَنَگ وت بنا کُت گُڑا چہ ھر نیمگ ءُ ھمک کنڈ ءَ بس تیر ماٹر ہیلی آنی جَنَگ اَت ۔ اے نِدارگ world war 2 ءِ یک ویڈیو ءِ چھرگ ءَ اَت پہ آئی ءَ ۔
آئی اے نہ دیست برمش چون ءُ چیتور شھید بوتگ۔ آئی بس ھمے دیست سنگت کپتگ پیشانی گردن ءُ زنوک ءَ تیر ءِ ٹپے مان اِت اَنت
آئی بڈّ ءِ اُرد شینگ اِتگ اَنت
آئرا برمش ءِ سھبی ئیں ھمے ھبر دل ءَ اَتک کہ من ءَ کسان کالر والا گُداں نہ زور آں ۔ امداد ءَ پہ کُنّت گُشتگ اَت من ھم ایشاں نہ زور آں .
بلے آئرا پہ دل ءَ دوست نہ بوتگ اِت اَنت ۔ ھمے گُد برمشوک ءِ کِرّ ءَ چو ملور ملور ءَ کپتگ اِت اَنت۔
لشکر گیش نزیک بُوھان اَت ءُ ھمے ھکّل ءَ کنگ اَت (ہاتھ اوپر کرو نہیں مارینگے )
امداد ءَ ھمے ھبر ءِ ھِچّ تب نیست اَت۔ آ پہ زمین ءَ مرک ءَ تیار اَت چہ لگویں زند ءِ گوازینگ ءَ ۔ اے پر مڑاھیں مرک ءَ ھزار برا وش اتک کنگ ءَ اَت ۔ آئی پہ دلجمی آپے وارت ھر کس ءَ کہ سر چست کُت۔ امداد ءِ تیر آئی ءِ کاپول ءَ اَت ۔
آئی دل ءَ مرگ ءِ بیم ھلاس اَت ۔
مرچی زانتگ اَت ئِے۔ اِے ریاست ءَ پہ من ءُ برمش ءَ دْراھیں جھان سر ءَ زورتگ اِے باج ءَ اَچ ما کس بُرت نہ کنت ۔ اِنچو تُرس گُڑا ۔ ھمے ھیال ءُ بُرز توکلی ءَ آئی دیست ہیلی منی سر ءَ اوشتگ ۔ آئی دیم گون ہیلی ءَ کُت جنگ بنا کُت ھمے ساھتاں رمے تیر ءَ آئرا گون وت بُرت ۔ آ چہ سنگر ءَ ڈنّ کپتگ اَت بلے دست ئِے انگت سنائپر ءِ زَد ءَ سک اَت ۔
