مَلاریں شپ ءِ دامُن ءَ سارتیں کَوش ءِ چِڑکّہ ماھل ءِ مِسکیں مھپراں پیڑاتگ اَت ، بلے من پہ زِرد ءِ سھڑینگ ءُ زیمیں چیھالانی کماھگ ءَ ڈیوا ءِ ساہ کندنیں آس ءِ کشّ ءَ گوں ند ءُ رودپتر ءَ ھیالانی زِر ءَ اُوژناگ اِت آں کہ پادبْرمشے ءَ پچگُڑینت ءُ ھلوت ءِ زیملے تالان بوت۔۔۔۔۔۔۔۔۔
من پہ اجکّھی چکّ ترّینت۔۔۔۔۔۔۔۔۔۔۔۔، چاراں نازُل اِنت کہ منی پدی نیمگ ءَ اُوشتاتگ ءُ ارس تْرمپ تْرمپ ءَ چہ انارکاں دیم پہ جیگ ءَ سرجھلاد اَنت۔۔۔۔۔۔۔
من پہ ھلاھُوشی جُست کُت ، ھاں نازُل۔۔۔۔! ترا ھَیر اِنت۔۔۔۔۔؟
چاراں نازل ءِ ارسانی شھکور چہ کمّی ءِ بدل ءَ ودّان بوت ، من ھم گم ءِ جُھلانکی ءَ کپت آں ءُ پد ءَ پُرس اِت ،
ھاں نازُل! بِہ گْوش باریں۔۔۔۔۔۔ترا ھَیر اِنت تو شپ ءَ گِریوگ ءَ ئے؟؟
نازُل ءَ وتی گُل ءُ مُروارِدیں ارس پھک کُت اَنت ءُ گْوشگ ءَ لگّ اِت ، لالا منی دِل چون نہ تْرکّ اِیت ءُ جگر آبلہ نہ بیت۔۔۔۔کہ تو ساہ کندنیں ڈیوا ءِ کشّ ءَ نشتگ ئے ءُ ماھل ءِ مھلباں تانسریں میتگ، سر ءَ زُرتگ۔۔۔۔۔۔
گوں نازُل ءِ نمبیں چمّانی گریواسکیں جُست ءَ من ءَ زِند ءِ ھما پدیانکاں سر کُت کہ من ءَ آ لد ءَ پہ سرکپتی ھم رَوگی نہ اَت، بلے نازُل ءِ ارساں من ءَ پہ ابکّھی وتی گْوست ءِ آپبنداں سر کُت ءُ واتر بوت، چی ءَ کہ من وت ءَ چرے ھیالاں سِندگ ءِ ھاتِر ءَ رودپتر ءُ ساہ کندنیں ڈیوا ءِ میار کُتگ اَت ،
پمیشکا من ھیران اِت آں کہ نازُل ءَ چے پسّو بِہ دے آں۔۔۔۔۔، ءُ نازُل گوں گِریتگیں چمّاں ودارِیگ اَت کہ لالا چے گْوش اِیت ، بلے منی لُنٹاں گْوش ئے اے ڈگار ءِ کابیل ءَ کدی جان نہ شُشتگ اَت۔۔۔۔
چو سِنگ ءُ گِل ءِ بُت ءَ گُنگ ءُ بے توار اِت آں ءُ ماھل ءِ شکساتگیں زھیرانی بار کُوپگاں کترہ کترہ ودّان اَت۔۔۔۔۔
شرّیں ساھتے ءِ گْوزگ ءَ پد من نازُل ءِ پسّو ترّینت ءُ گْوشت ، نازُل تو آ گپّ ءَ بِل! چے کہ مئے تالہ ءَ نبشتگ بوتگ۔۔۔۔واجہ ھُدا ءَ ھما کُتگ۔ پرے گپّ ءَ ما پرچا وت ءَ وت سر ءَ چو منجل ءَ بِہ جوشین اِیں ءُ کس سھیگ نہ اِنت۔۔۔۔۔۔
مات بیچارگ اگاں اے دُگنیا ءَ بوت اِیں مرچی اے تبد ءُ لِواریں ساھتاں مئے ھونکّیں ساھگ اَت ، بلے گپ پد ءَ ھما کَیت کہ چے واجہ ھُدا ءَ شات بیت۔۔۔۔۔۔۔
منی گپ ءِ ھلاسی ءَ پد نازُل ءَ پہ ارسیگیں چمّے درّائینت ءُ گْوشت، نا لالا نا!
من ءَ اے گپ کدی باور نہ بیت کہ اے کُل واجہ ھُدا ءِ کار اَنت، بلکیں اے پندل سازیں ناکو بھرام ءِ جنین سازین ءِ کار اَنت کہ مرچی ماھل ءِ سُھریں بشانگ تئی بدل ءَ میر ءِ بچّ تھلگ ءِ واستا سمبھینگ بوتگ، دومی منی مات ءِ کُشندہ ھم ھمے کلپیں سازین اِنت۔۔۔۔۔۔۔
اگاں کلپیں سازین ءَ من ءَ مُپت ء ھُدا بُھتام مہ جت اِیں۔۔۔۔۔۔مرچی مئے مات پہ دِلترکّی نہ مُرت ، زِی من گُنگ بیتگاں ءُ وتی مات ءِ کبر چار اِتگ ، بلے مرچی تیوگیں گپّاں تئی دیم ءَ درشاناں کہ ھبر چی اِنت ءُ واجہ ھُدا پرچا مُپت ءَ بنّام اِنت۔۔۔۔۔
ءُ ماھل بیچارگ بے میار اِنت ، ماھل ءَ من جزمّاں انگت پہ ترا مھر ھست ءُ تئی ھُدوکی اِنت ، بلے کھریں سازین ءِ پندلاں اے کارپد سازینتگ اَنت۔۔۔۔۔۔۔
دومی پِت ءِ باریگ ءَ ما ھما روچ ءَ چورہ بوتگیں کہ مئے لکّ ءُ بیرکیں مات وتی مُدیمی ئیں ھنکین ءَ رپتگ ، آ گوں ماتُو ءَ نہ زانت کہ من ءَ بچّ ءُ جِنکّے ھست ، کریمداد ءِ گِس ءَ پانگ اَنت۔ اگاں کریمداد ءَ مات ءِ براتی ءِ نام پِر مہ بوت اِیں! باریں مئے چے ھال بوتگ اَت۔۔۔۔
نازُل ءَ من ءَ وار نہ دات ءُ جُستانی مزنیں لڑے پرّیتک ، بلے یک گپّے ءَ من ءَ گیش اجکّا کُت۔ آ ھبر ھمیش اَت کہ نازُل ناکو بھرام ءِ بچّ گزابیگ ءِ چہ درکسانی ءَ نام ءَ اَت ءُ ناکو بھرام ءِ جِنکّ ماھل منی۔۔۔
من پہ تھلیں بِچکندے نازُل ءَ پسّو دات ءُ گْوشت ، نازی! گْوست ءَ شموش ءُ گاماں دیم ءَ شھار۔۔۔۔ھُدا ھیر کنت، ما بِہ نِند اِیں ءُ بِہ جیڑ اِٰن گْوست ءِ سر ءَ۔۔۔مِنزل پند نہ بُرّ اِیت ، چے کہ بوتگ آیاں ویل کن ءُ پہ آیوکیں زِندمان ءَ بِہ جیڑ۔۔۔۔۔
منی ھبر نازُل ءَ وش نہ بوت اَنت ءُ چِست ءُچابُک ءَ درّائینت ئے
نا لالا نا! اگاں ما گْوست ءَ چو آدینک ءَ وتی دیم ءَ اِیر مکن اِیں ، گُڑا مار مارا دوبر یکّیں ھونڈ ءَ وارت۔ اگاں ما گْوست شموشت ، بزان کہ وت ءَ شموشتگ ، ءُ وتی شموشگ زوال ءِ نِشانی اِنت۔
زِی بِہ گِندئے تو سرپد نہ بوتگ ئے مات ءَ ھبر ڈب اِتگ ءُ وت ءَ باتِن ءَ جوشینتگ ، بلے مرچی من ترا سازین ءِ تانسریں رِپک ءُ پندلانی بابت ءَ آشنا کن آں کہ گپ چی اِنت۔۔۔۔۔۔
ماھل ءِ سُھریں بشانگ تئی بدل ءَ پرچا پہ میر ءِ بچّ تھلگ ءَ سمبھینگ بوتگ۔۔۔؟ منی ءُ گزابیگ ءِ سانگبندی پرچا پُروشگ بوتگ۔۔۔؟ منی مات ءَ پرچا اے دُگنیا بدل کُتگ۔۔۔؟ پِت ءَ مئے مات گلّو چار ءُ دومی سیر پرچا کُتگ۔۔۔؟
اے کُلیں جُستانی تیرکمان ءِ نِشانگ من بیتگ آں ، بلے تیر ءَ منی ھمراھی ءَ تئی ءُ مات ءِ بالاد ھم سان داتگ۔ مات ءَ زانتگ ، بلے من مرچی ترا ھم سھیگ کن آں کہ سازین پہ میر ءِ مِلکت ءُ میراساں من ءَ مُپتیں بُھتام جنت ءُ گزابیگ ءِ دِل ءَ ھراب کنت ، ماھل ءَ چہ ترا پُلّ اِیت ، مات ءَ پِت ءِ دست ءَ گلّو چار کنت ءُ دِگہ سیرے ءَ پرمائیت ، اے کُل نابکاریں سازین ءِ پندل اَنت کہ مرچی من ءُ تو ، ماھل ءُ گزاینگ۔۔۔۔۔۔۔۔یکّیں آس ءَ سُچگ ءَ اِیں۔۔۔۔۔۔۔۔
ھمّل پمّن تئی درور بوتگ ، بلے تو سرپدے مرچاں پرچا پیش ءِ وڑ ءَ مئے گِس ءَ نئیت۔۔۔۔۔۔۔۔؟
ھمے سازین ءَ منی پاداں بستگ ءُ من ءَ میتگ ءَ رُزوا کُتگ کہ ” ھمّل شاھی ءُ نازاتون ءِ جِنکّ نازی ءَ گنوک کُتگ ءُ پُشت ءَ کشّ اِتگ ، من ءَ شات نہ بیت کہ من گزابیگ جان ءَ اے نازاتون ءِ کھبگ ءَ بِہ دے آں ، نیکہ ماھل من ءَ آ گِس ءَ شات بیت۔۔۔۔۔۔۔”
اے مرچی سازین ءِ آپ داتگیں کرگانی جوریں برورد اِنت کہ منی ءُ تئی ھمراھی ءَ ماھل ءُ گزابیگ ھم وڈلاں کُتگ ، پِت ءِ وَ گپ نہ بیت ، بلے ناکو بھرام ءَ ھم سازین ءِ جنگجاہ ءَ وتی سِلاہ چگل داتگ اَنت۔ گزابیگ مات ءِ پندلانی کورچات ءَ کپتگ ، بیچارگیں ماھل تیوگیں گپّاں زانت۔۔۔۔۔۔، بلے گُنگ اِنت۔ اگاں ناگت ءَ گپّے بِہ کنت گُڑا ھُدا ءَ نہ کُت ، ھما دمان ءَ ھمے گپ دیم ءَ کَیت۔۔۔۔۔۔اے نازی ءِ ناکوزتک اِنت ، پہ پِت ءِ ھاندان ءَ کشّ اِتگ ئے ۔ اِیشی ءَ نازئ ءِ تاس ءَ آپ وارتگ کُجا شر بیت ، دِگہ باریں چے چے گْوشگ بیت۔۔۔۔۔۔۔۔
چہ نازُل ءِ چرے گپّاں پد ، منی دیدگانی آپریچ ءَ نیزگاری ءِ آس مینتگئں نِوان ءَ چو ساہ کندنیں ڈیوا ءَ منی سْیادی ءِ رگ ءُ ریشگ۔۔۔۔۔۔۔۔۔۔۔۔، زِرد ءِ ھزاری ئیں واھگ ءُ ارماناں ھوار ننگ ءِ بیرک ھم پہ بْرھنگی گْوات ءِ دست ءَ چنڈّگ ءَ اَت۔۔۔۔۔۔۔۔۔۔۔۔۔۔۔۔۔۔۔کہ نازی ءَ پہ گِلّوتگی چِڑکّہ کُت ،
اِنساپ ھما روچ ءَ کہ سبا ءِ سارتیں سمین وتی اِشکیلاں بُوج اِیت ءُ زانگ ءِ شھکور ھار کنت۔۔۔۔۔۔۔۔۔، اگاں نا چو مئے داب ءَ ھزاراں ارمان انگراں پلپٹ اِیت۔۔۔۔۔۔۔۔۔۔۔۔۔
ھبر منی زُبان ءِ باھوٹ اَت کہ دِل ءَ پیسر ءَ پسّو دات ، ھو نازُل تو راست گْوش ئے۔۔۔۔۔۔! داں سبا ءِ سارتیں سمین وتی اِشکیلاں نہ بُوج اِیت ءُ زانگ ءِ شھکور ھار نہ کنت۔۔۔۔۔۔، چو مئے داب ءَ ھزاراں ارمان ءُ واھگانی مُساپِر ءِ واھشتانی بوجیگ زِر ءِ جُھلانک ءَ زِیراپ ءُ انگراں پلپٹ اِیت۔۔۔۔۔۔۔۔۔۔انگراں پلپٹ اِیت۔۔۔۔۔۔۔۔۔۔
ھمے ساھت ءَ بارگیں دردے ءَ باتِن ءَ سرکشّ کُت ءُ جیڑگانی واگ چہ دست ءَ لگوشت کہ من گوں نازی ءَ چے جیڑگ ءَ آں۔۔۔۔۔۔۔
بس زُبان ءَ ھمے دانک پہ ھیال درشُت ، ھو ڑئے نوائیں زِندگی چہ تو کَے اِنت کہ دِلرنج نہ اِنت۔۔۔۔۔۔۔۔۔۔ ؟؟؟
ءُ گُڈّی ءَ نازُل ءِ ھڈّیسکگانی توار گُوشاں ژونگگ ءَ اَت کہ دِل اِیربُڈّ اِت ءُ من ، چہ وت ءَ بے وت بوت آں۔۔۔۔۔۔۔۔۔۔
