ھون سنجیں بھار ءِ تپتگیں کِشار ھما وھد ءَ سبز اِیت کہ راج ءِ ڈیھ پاسپانیں سر مُجیں آکبت ءِ سمبرینگ ءَ پہ وتی ندْر ءُ کَولیگی ءَ کدی چک ءُ پد نہ بَہ اَنت ، مرچی کہ باھڑیں بْرمش ءُ پُل ورنائیں اِمداد ءِ شھیدی ءِ ھال سر بوت۔۔۔۔۔تہ زِرد ءَ ھمے ھیال تیجار بوت کہ سائجی ءُ مزن بند ءِ تلاریں بالاد انگت ھوشامی اَنت۔۔۔۔۔۔دانکہ آجوئی ءَ۔۔۔۔۔۔۔۔
چی ءَ کہ آجوئی ءِ بے بھائیں مُلّ دیمونی اِنت ، ءُ ھمے دیمونی ءِ پلسپہ بلوچ راج ءِ ورنایاں وتی زِند ءِ مکسد لیک اِتگ ءُ زِندگ داشتگ ۔ ھمے درگت ءَ یک کْواسے جاھے گْوش اِیت: ” گُژن اِنسان ءَ بگاوت ءِ پدیانکاں بارت ءُ سر کنت ، بلے زانت ءُ سسّا اِنسان ءَ دانکہ آشوب ءَ "
پمیشکا اے آشوب ءِ بچّ اَنت کہ آشوب اِیشاں ودی کنت ءُ پد ءَ وت وارت دانکہ بے بھائیں آزاتی ءَ ، چی ءَ کہ آزاتی ءِ موکگ ءَ زیر زِند ءُ اِیردستیں راجاناں مزنیں مُلّ ءُ کِیمتّے اَدا کنگی اِنت ۔ اے راستے نُگرّھیں بچّانی رَوَگ سک تُورناک اِنت ، بلے پہ یک ابدمانیں مُول ءُ مکسدے ءَ ندْریگ بوتگیں سرانی جوہ رستگیں ھونانی ملپد مُدام رھشُونی کنت۔۔۔۔۔۔۔
مرچی اے زگریں ھونانی شلگ کہ ڈیھ ءِ دِلبند ءَ گْوارگ ءَ اِنت ، اِیشھی ءِ پد پہ راج ءَ سنجیں بھارے کار اِیت ۔
پرے ھاتِر ءَ جاھے یک سسّا کارے گْوش اِیت : ” کسانیں مجگاں مُدام ” واھِشت ” ءُ مزنیں مجگاں دائم ” مکسد ” بیت۔۔۔۔۔۔۔
اے زمین شیدائیں سراں کہ وتی گْراں بهائیں سر بکشاتگ اَنت ، اِیشانی مکسد چہ زِندمان ءِ ھر وشی ءَ در گُلیں ڈیھ ءُ راجی آزاتی اِنت ، چی ءَ کہ راجی آزاتی ءَ ابید نہ زِند۔۔۔۔زِندے گْوشگ نہ بیت۔۔۔۔۔۔۔
ھمے زانت ءُ زانگ ءَ مرچی بلوچ ورنا چہ گْراں وابی ءِ بدل ءَ آگاہی ءُ ڈیھ پاسپانی ءِ درونت شکساتگ اَنت ، ءُ ھمے آگاہی راجی زِندمان ءِ رکّینُوک اِنت۔ اگاں کُجام راج چرئے آگاہی ءَ زِبھر بوت گُڑا آ راج ءَ پہ گارءُ سِیاہ بُوَگ ءَ ھِچّ تاکت داشت نہ کنت۔
بلے مرچی بلوچ راج گوں ھمے آگاہی ءِ رُژن ءَ دیم پہ وتی ھونکّیں مِنزل ءَ رھادگ اِنت ، ءُ راستے کہ اے سپر ءَ دیمونی دَیَگ ھژدری ءُ اولی پدیانک اِنت ۔ تو وھدے پہ وتی رکّینگ ءَ کُربانی دَیَگ ءِ پلسپہ ءَ زِندگ مدارئے ، گُڑا زُوت تئی رند پد چہ اے گیدی ءِ دگ ءَ بیگواہ بَہ اَنت۔
بلوچ راج ءَ اے مارِشت چہ ھپتاد سال ءِ گُلامی ءَ دربُرتگ ، آ سرپد اِنت کہ راجی آجوئی ءَ ابید زِندمان ءِ چے بِستار ۔ چی ءَ کہ آجوئی راجی زِندمان ءِ زیبائی اِنت ، ءُ اے زیبائی گوں دیمونیاں رجگ ءُ گوناپ دَیَگ بیت۔ اے پُلّ گونگیں ورنا کہ مرچی ترشتیں تلاراں وتی سنگر کن اَنت ءُ راج ءِ پھازگ ءَ سراں سوگات کن اَنت۔۔۔۔۔۔اے مئے راجی بامرد اَنت ۔
شھید اِرپان جان ءُ شھید نورھان جان وھدے وتی تِلاہ ءُ گوھریں سراں پہ مِسکیں ڈگار ءَ کولیگ کن اَنت ، ھمے پلسپہ مرچی ھر بلوچ پُسّگ ءَ وتی کُتگ ءُ جنگ ءِ میدان ءَ پہ جوان مردی اُوشتاتگ ءُ جنگ ءَ اِنت ۔
سِتکاں۔۔۔۔! بلوچ راج ءِ سوب بیت ءُ دُژمِن پہ مُدیمی بے سوب بیت ، بس مارا وتی جُھد برجاہ دارگی اِنت۔۔۔۔۔۔۔۔
