من دلجم آں تو واتر نہ بَہ ئے ، بلے چوں بِہ کن آں کہ اے دل تئی یاتاں یک دمانے در نئیت ۔ من اے گپّ ءَ ارمانی نہ آں، چی ءَ کہ تو پہ زمین سر داتگ۔ بلکیں من ھما اولی شپ ءَ زانت وھدے ترا زمین ءَ لوٹ اِت۔۔۔۔تو من ءَ گوں بانوری ادلساں یل دات ءُ شُت ئے۔
منی سرمچار۔۔۔۔۔!!!
تو زان ئے من ترا چہ پد باز بدل بوتگ آں ، منی ھیل ءُ آدت ، نِندگ ءُ پادآیگ کُل بدل بوتگ اَنت۔ اے دل ساری ءَ تئی بوتگ، من ءُ منی سرجمیں زند تئی نام ءَ بوتگ اَنت ۔ نُوں من وتی زِندگی چُکّانی نام ءَ کُتگ۔ من ءَ وَ گْوش ئے ھِچّ نیست۔ منی واھگ، وشّی ءُ زِند ءِ ارمان تئی مِسک آتاریں جون ءِ ھمراھی ءَ کلّ بوت اَنت گوں۔۔۔۔۔، نُوں چُکّاں ابید ءُ آجوئی ءِ دیستگیں واب ءَ پمّن ھِچّ نہ منتگ۔۔۔۔۔۔۔
اڈئے۔۔۔۔۔۔۔۔!!
نُوں منی لُنٹ پَن ءُ مُزواک نہ لوٹ اَنت ، چمّ بے سُرمگ ءُ کنجل اَنت، منی گُوشاں دُرّ مان نیست ، منی دُتکگیں دُرستیں گُد موکوئی تند ءُ کُداماں بُرتگ اَنت۔ برے برے ھما سُھریں گُداں چاراں، گِندئے ترا سک دوست بوتگ اَنت ، گْوش ئے نُوں گُدانی رنگ ھم شُتگ ترا چہ پد۔۔۔۔۔۔
تو اِد ءَ نہ ئے ، من ھر نوکیں تام ءَ پاتیا دے آں ءُ تئی ارواہ ءَ بکشاں، منی تہ ءَ مزنیں آشوبے اتکگ ترا چہ پد۔ بلے زان ئے من برے برے جیڑ آں کہ من بے تو نُوں زندگ آں، بے تو نُوں گْوش ئے زند ءَ سرپد آں۔ تئی جتائی ءَ من ءَ باز سر ءُ سوج کُتگ۔
منی کُنگُریں سرمچنڈ۔۔۔!!
تو بلکیں دل ءَ بِہ کن ئے کہ من ءَ یات نہ کنت کہ زی بے من نہ بوتگ ، ءُ مروچی چون زندگ اِنت۔ اسل ءَ منی ھما گْوست کہ تئی ھمراھی ءَ گْوستگ۔۔۔۔۔۔۔۔۔، من ءَ ھما شھدیں ساھتاں زندگ کُتگ۔ من ءَ تئی پُر مھریں بچکنداں زِندگ بُوَگ ءِ ھاٹیگ شکساتگ ۔من تئی نام ءَ ءُ گوں تئی یاتاں زندگاں۔ من برے برے ھیال کن آں تو گوں من بوتین ئے زند بے کِساس اِیمن ءُ وشھال بوتگ اَت، بلے نُوں وَ وشّی منی دل ءِ ویرانیں ھنکین ءَ کمّے ھم نہ جلّ اَنت۔ ھما اِنت تو کہ رپتگ ئے، نُوں بے تو وشیاں گوں چے گِلّہ بِہ کن آں۔۔۔۔۔۔۔
منی مُجّتی ھمراہ۔۔۔!!!
پہ من مہ جیڑ کہ بے تو من نُوں وت ءَ داشتگ ، تئی شِرکِنیں یاتاں منی ارس ھُشک کُتگ اَنت۔ من ترا ھمک ساھتاں کہ جیڑاں۔۔۔۔۔بلے ملور نہ بَہ آں، انچو گُمان بیت گْوش ئے تئی نیٹورک ءِ آھگ ءِ ودار ءَ شپاں روچ کناں ءُ روچاں شپ۔ تو منی زند گوں مھراں وتیگ کتگ ، منی دُوا۔۔۔۔۔۔۔۔۔انّاں اِنّاں۔۔۔۔۔۔منی ایمان اِنت تئی مھر انچو آباد ءُ نمیران باں داں زند ءَ منی۔ تئی یات منی مُجّتی ھمراہ اَنت۔۔۔۔۔ھما اِنت کہ تو رپتگ ئے۔۔۔۔۔۔۔
