من ھم سرمچارے آں
من گاڑی ءِ سر ءَ بُوَگ ءَ گوں چم آئی ءِ نیمگ ءَ شانک دات اَنت، آ گیٹ ءِ دپ ءَ اُوشتاتگ اَت ءُ مئے نیمگ ءَ چارگ ءَ اَت۔
گاڑی رپت۔ من پُشت ءِ پردہ پچ کُت آ چاران کُت داں گاڑی ءَ پیچ ءَ تاب کُت۔
من اولی رند ءَ تربت بھشت مار اِت، ھر درچک ءُ دار آئی ءِ چھرگ ءَ جَنَگ ءَ اَت۔ دل ءَ نہ گْوشت تربت ءَ چہ ءَ ٹِک بِہ کن آں، بلے۔۔۔۔۔۔۔۔۔۔
من ءَ اولی رند ءَ گُمان بوت کہ من اِشک ءَ کپتگ آں ءُ اولی رند ءَ من دل ءِ سِنگ ءُ ڈوک چِت اَنت یک بُرز ءُ مُھکمیں دیوارے ءُ شوکیں ماڑی یے پہ آئی ءَ بست ءُ دل ءَ جاگہ دات، چِد ءُ ساری اے دل پہ ھرکس ءَ سْیائیں ڈنّے اَت۔
گاڑی ءَ مارا ٹرانسپورٹ ءَ اِیر کُت، کترھے ءَ پد کوچ در اَتک، چہ بازار ءَ آست آست ءَ نَچّان بوت ءُ گِیشّ اِت۔ من گوشی جت اَنت کانچ ءَ ڈنّ نِدارگ کنان کُت، بلے چمّاں ھِچّ میم نہ کُت بید ء آئی ءَ۔ ھرچی ھمائی ءِ چھرگ ءَ جَنَگ ءَ اَت۔ آئی ءَ من ءَ چہ ھر چیز ءُ ھرچ جیڑہ ءَ بے ھال کُت، من نہ گْوست ءِ سما ءَ اَت اُوں نہ باندات ءِ پِگر ءَ۔
ھاں۔۔۔۔۔۔۔۔! کوچ در کپت شمئے؟ آئی ءِ میسج ءَ درْکّگ جت۔
ھو ما در کپت اِیں۔ من ھمے ودار ءَ اَت اُوں کہ کدی آ میسج کنت۔ من لوٹ اِت آ گپ کنان بِہ کنت دیم ءَ بلے، تھنا یکّیں گپ ئِے جت ءُ ھاموش بوت کہ سر بَہ ئے ھال بِہ کن اِت ، دِگہ ھِچّ۔ من وس کُت کہ گپ ئِے بداراں بلے من یک میسجے نبشتہ کُت ءُ را دات نہ کُت۔
من تُربت ءَ چہ شال ءَ باز سپر جتگ ، بلے منی زِند ءِ وشتریں سپر ھمیش اَت کہ من ھیالاں سوار ءُ بال اَت اُوں۔
جیڑان جیڑان ءَ کوچ ءَ وت ءَ پنجگور ءَ سر کُت کمو اُوشتات، دل ءَ گْوشت نُوں میسجے بِہ کن ءُ ھالے دئے کہ اِد ءَ سر بوتگاں، بلکیں گوں من راہ ءَ گپ کنان بہ بیت، بلے اُوکے ءَ ابید ھِچّ۔۔۔۔۔۔۔۔۔۔
کوچ در کپت، من ودار کُت کہ بلکیں دِگہ گپّے بِہ کنت ، بلے ھِچّے نہ گْوشت داں من واب شُت آں۔۔۔۔۔۔۔۔۔۔۔۔
تو مرچاں سک مزن بوتگ ئے سک شوک ئے، آ وھد ءَ کہ من ترا میتگ ءَ دیستگ تو چوش نہ بوتگ ئے، تو اے دوئیں روچاں من ءَ گنوک کُت، منی ارواہ گوں وت بُرت گوں، من تئی روگ ءَ پد چو بُت ءَ کپتگ ءُ اِیر آں۔ من وتی دست ءَ شھاراں پرتو، اُمیت اِنت تو دست ءَ دستے دئے۔۔۔۔۔۔۔۔۔۔۔۔
ھاں چون اِنت ترا کَے ءَ دست مِلّارینگ ءَ ئے، گنوک ئے، گنجی ءَ من ءَ واب ءَ پاد کُت ءُ گْوشت۔
من کہ چمّ پچ کُت اَنت ھچ نیست ، کوچ بائی پاس ءِ چیک پوسٹ ءَ اُشتاتگ۔
کش ءِ کانچ ءَ ڈنّ روچ اِیر روان اَت، من ھمے دمان ءَ جیڑ اِت، دِریگتیں روچ مُجتّی ھما ھند ءَ سانکل ءُ زمزیل کُتین ءُ چاریں نیمگ ءَ ننگر زمین ءَ سک داتین اَت اَنت کہ آ ساھت ءَ من ءُ آ نشتگ ءُ دیوان ءَ اَت اِیں، بلے روچ شُت دیم پہ منزل ءَ ما پہ شال ءَ۔۔۔۔۔۔۔۔
ما سر بوت اِیں ، من شال ءِ سر بُوَگ ءَ گوں آ میسج کُت ءُ ھال دات۔
سلامت بات ئے بانُک، بہ بکش اِت شُمارا باز جنجال کُت، آئی ءَ میسج ءِ پسّہ دات ءُ گْوشت۔
نہ چوشیں گپ مکن ، ھر وھد ءَ مئیگی کارے بیت، گُڑا بِہ گْوش الّم۔۔۔۔۔۔۔!!!
مِنّت وار۔۔۔۔۔شر زَرور کار بہ بیت شُمارا الّم ھال کن آں۔
ما کہ یونیورسٹی ءِ گیٹ ءَ پُتِرت اِیں نُوں شُومیں واڈران دیم ءَ اَتک، شُوم باریں چون کنت، من ءُ گنجی ءَ وتی گپ ھوار کُت اَنت توجیلے ساز اِت ءُ ھاسٹل ءِ گیٹ ءَ پُتِرت اِیں۔
ھاں کُجا وتی دیم سیاہ کتگ پیداک ئے، شُوم ءَ مارا بُلاک ءِ دپ ءَ دیست، اُوشتارینت ءُ توار دات۔
ما وتی ساز اِتگیں توجیل چِست کُت میڈم ءِ دپ ءُ دیماں جت، بلے شُوم ءَ ھِچّ گپ گُوش نہ داشت، دپ ئِے پچلگوشت ءُ کُوکار کُت۔
میڈم میڈم اے راست گْوشگ ءَ اَنت، اِیشی ءِ بْرات اتکگ ءُ نادُراہ جاہ ءَ اِنت گوں سرجمیں کھول ءَ۔ ھمے ھاتر ءَ اے ڈنّ ءَ شُتگ اَنت، دگہ ھِچّ جاہ ءَ نہ بوتگ اَنت، گوھر ءَ دَریگ ءَ چہ سر کش اِت، میدان کُت ءُ اتک مارا چہ شومیں واڈران ءَ کُچک رُزواہ گیشّینت اِش۔
ما بیگ ءُ چیز زُرت اَنت شُتاں، کمراہ ءَ۔۔۔۔۔۔۔۔۔۔
بلے شُومّاں شُما کُجا بوتگ اِت دو روچ ءَ ؟ گوھر تھت ءِ سر ءَ نِشت ءُ پول اِت۔
آ روچ ءَ من ھمد ءَ دَریگ ءِ دپ ءَ اُوشتوک اَت اُوں، شُومیں میڈم ھمے جاگہ ءِ جِند ءَ گُلناز ءُ شاری ءَ را ماں بند کنگ ءَ اَت کہ آئی ءِ فون اَتک۔
ھلو، چون ئے، جوڑ ءُ وش ئے، دزگوھار ءُ ھمراہ جوڑ ءُ وش اَنت، وانگ، زانگ چون اَنت؟ شال ءُ شال ءِ سارتی؟
ما کُل جوڑ ءُ وش اِیں، وانگ، زانگ شوک اَنت، شال ءِ سارتی ءَ دوزاہ کُتگ۔ تو ھال کن، مرچی چے کار ترا پہ من کپتگ؟
اے چونیں کُوکارے تئی کِرّ ءَ ، کَے ءَ وتی دپ پچ لگوشتگ؟
اے شُومیں ھاسٹل واڈران اِنت، جِنکّاں ھبر دیگ ءَ اِنت کہ کُجا بوتگ اِت شُما چے کُتگ ڈنّ ءَ۔ شُومّے اِیشی ءَ کلام بِجنت۔
پو اے وڈران کہ چوش اِنت! گُڑا منی کار تئی گوما نہ بیت، من دِگہ یکّے چار آں۔
تو کار ءَ بِہ گْوش، بلکیں بوت گوں من۔ اے میڈم ءَ من شرّیں دردے لیٹیناں۔
سنگتے ءِ کِرّ ءَ لھتیں سامان ءُ زرّ اَنت دست گِرگ ءُ آرَگی اَنت مئے نیمگ ءَ۔ تو بچار اگاں گوں تو نہ بوت گُڑا بل ئِے من دِگہ نیمگے وڑے کن آں۔۔۔۔۔۔۔۔۔۔۔
منی دل ءَ گْوش ئے ھُلّ کُت، بس ھمنچوکہ بال بِہ کناں برو آں، آئی ءِ کِرّ ءَ۔۔۔۔۔۔۔۔۔
آئی ءَ کُل گپ ءُ تْران کُت اَنت، من ءَ سرجمیں گپ ءُ ھبر سرپد کُت اَنت، کُجا رَوَگی اِنت، کَے ساماناں ترا دست ءَ دنت ، چوں کنگی اِنت، نُوں فون ئِے سِست۔
اے بلائیں سپر ءَ من کَے ءَ ھمراہ بِہ کن آں، لوگ ءَ چے بِہ گْوش آں، اِد ءَ دزگوھاراں چے بِہ گْوش آں، فون ءِ سِندّگ ءَ پد من نشت ءُ گوں وت ءَ جیڑ اِت۔
شپ پہ ھیال ءُ جیڑگ آسر بوت، سُھب ءَ من گنجی ءِ کِرّ ءَ سپر ءِ بابت ءَ گپ کُت، آ یکّیں دمان ءَ جاڑی بوت، ما وتی بیگ چِت ءُ نزّ آؤرت اَنت، ٹِکٹ کُت۔ شپ ءَ ھما سنگت ءِ کِرّ ءَ شُت اِیں کہ آئی ءَ مارا سامانانی دست گِرگ ءِ گْوشتگ اَت، سُھب ءَ بس ءِ سر ءَ بوت ءُ در کپت اِیں۔
سپر بندات بوت۔۔۔۔۔۔۔۔۔
من سرمچار وتی زند ءَ ندیستگ اَت، را رواجی ھم ھرام اِنت سرمچار ءِ گِندگ، باریں چوں بیت اِیشانی دیم ءِ نِندگ، باریں چوں کن اَنت، باریں چون اَنت، من گوشی جت اَنت ھیال کنان کُت ءُ بس ءَ جُنزان کُت دیم پہ مِنزل ءَ۔
گنجی وتی وڑ ءَ ھیالاں کپتگ اَت، باریں چے جیڑگ ءَ اَت، ھمے ھاتر ءَ مئے مْیان ءَ گپ سک کم بوت۔ بس ما چیک پوسٹانی سر ءَ گپ کُت وت ءَ مُشکُول کُت داں پیشانی ءَ کیامت مہ بیت۔
گُڑا اِنچو چوکی۔ اے رندی پہ منی ءَ چوکیاں چُک ءُ بر کتگ اَت، زاناں منی بیگ ءِ ساماناں چوکی گیشتر کُتگ اَت اَنت۔ ساھت ءُ دمان بچار چوکی یے ءِ سر ءَ گاڑی اُوشتاتگ، پوجی یے گاڑی ءِ تہ ءَ گردگ ءَ اِنت۔
جھل مگرب ءَ ما آیانی میتگ ءَ سر بوت اِیں، آئی ءِ ڈس ءُ نشان ءِ پد ءَ ما گْونڈیں گاڑی یے گِپت ءُ آئی ءِ داتگیں ڈس ءَ شت اِیں۔
ما کہ لوگ ءَ پُتِرت اِیں آ بان ءِ دپ ءَ اُوشتوک اَت، پُرّ رنگیں کاٹن ئِے گوْر ءَ اَت۔ آستونک ئِے لانتکگ اَت اَنت، سْیائیں گڑی ءُ ایل کُتگیں ریشاں انچوش زیبدار کُتگ اَت کہ چے بِہ گْوش آں۔۔۔۔۔۔۔۔۔۔۔۔
دْروت ءُ درھبات ءَ پد، شوکیں شیر چاہے زالے ءَ آؤرت، مارا وش اتک کُت ءُ نِشت، داں چاہ وری ءَ گپ ءُ تْران مَنڈ اِت۔
آ چوں مزن بوتگ، ھما لپش کہ زی کس ءَ گپ نہ کُتگ گوں، مرچی چوں گپّ ءَ بلد بوتگ، اے پھک ءَ پارٹی ءِ برکت اِنت، من ھیال کُت۔
روچ سر ءَ لیٹ اِت ، شپ ءَ میتگ ءِ سر ءَ اُرش کُت ءُ تھاری ءَ مانشانت ۔ آئی ءَ من ءَ دیوان ءَ چہ کش اِت ءُ جُتا بانے ءَ لوٹ اِت۔
چوں بوتگ شُما سپر، باز جنجال بوتگ اِت۔ آئی ءَ گْوشت۔
نہ ھِچ جنجالی نہ بوتگ، ھَیر بوتگ سپر وش بوتگ، من پسّہ دات۔
اے تئی سامان اَنت، من سامان پرس ءَ چہ کش اِت اَنت دات اَنت۔
آئی ءَ کہ سامان بُتک ءُ چار اِت اَنت، یک پِستُولے (پِرسٹلے) ات نائن ایم ایم، ڈبّی یے تیر ءُ چار دستی بمب اَت اَنت، منی چم سر ءَ شُت اَنت۔ پوووووووو من چوشیں بلائیں کارے ءَ سوبمند بوتگ اُوں۔۔۔۔۔۔۔۔۔۔۔۔۔۔
من وتی سر ءَ پھر بست کہ من سرمچاری یے کُتگ۔
اے پنچیں ھزاراں بزور باندا شمئے ٹِکٹ ءُ راہ ءِ ھرچ اَنت۔ آئی ءَ گپ ھلاس کُت اَنت ءُ ھما بان ءَ رَوَگ ءِ گْوشت کہ ما اولی سر ءَ نشتگ اَت اِیں۔
نی مارا زرّ گوں، مارا تو یک سرے ءِ ٹِکٹ ءُ ھرچ ءُ درچ داتگ اَنت بس اِنت، کمو مارا ھم بل راجی ھکّے پیلو کن اِیں۔
آ منی دیم پہ دیم اُشتاتگ اَت، زالم ءَ انچیں باڑی یے گون اَت گْوش ئے زاناں جون سینا اَت۔
تو وتی راجی ھکّ پیلو کُتگ، اِیشاں بزور منی ھاتر ءَ، شُما وتی زرّاں بل اِت، شُمارا دِگہ جاھے کار دے اَنت۔
آئی ءِ ھاتر ءَ من ءَ پْروش دات، من زرّ زُرتاں۔
آئی ءَ چَوٹ پاد ءَ کت اَنت پہ بان ءِ رَوَگ ءَ، من پُشت ءَ ءُ آ دیم ءَ ، من کہ چم آئی ءِ بالاد ءَ شانک دات اَنت گُڑا من کِرّ ءُ گْوراں ھِچّ نہ دیست بس ھمینچوکہ گوں آئی ءِ پاداں مان بِہ گیشّاں، داں بان ءَ سر بوتیں۔
پارٹی ءَ آ سک سنگیں کُتگ اَت، ابید چہ جنگ، سیاست، پارٹی، گُلامی ءُ آجوئی ءَ ھچ لس گپ ئِے نہ جت۔ چد ءُ ساری آ من چوش نہ دیستگ۔
بلے آئی ءَ گوں گپّاں من ءَ اَنچو وتی آماچ کُت ، کہ گپ نہ بیت، دل ءَ گْوشت تلک ءُ کپوت ئِے کن، بلے۔۔۔۔۔۔۔۔۔۔
بازیں گاڑی یے میتگ ءِ نیمگ ءَ پیداک اِنت، بیا بچار ئے، جنکے بان ءِ دپ ءَ اَتک ءُ آئی ءَ را ھال دات۔
گاڑیانی چارگ ءَ پد آیاں وتی تُپنگ ءُ ساز زُرتاں دَر شُتاں کَور ءِ نیمگ ءَ، مارا سرجمیں شپ واب نیاتک ۔ من سک آئی ءِ گم ءَ بوتاں۔ من چونا دُوا ءِ سر ءَ سِتک نہ کُتگ، بلے اے شپ ءَ من بے ھساب دُوا (دُعا ) کُت کہ آئی ءَ ھِچّ مہ بات۔
سُھب ءَ مھلہ آ اتک، ما ھوار ورگ وارت، بس آئی ءِ دیم پہ دیم ءِ نِندگ ءَ منی ھاٹیگ اتک۔ آئی ءَ گپ جت ءُ مارا کندینت داں ما بور مہ بَہ اِیں۔
من ءَ اے لوگ ءِ نیستگاری ءَ انچو تکانسُر کُت، من ھچّگی نہ بوتاں، گْونڈوانی دِرتگ پوچّی ءُ بے سواسی، ھما جِنکانی کور ءَ رَوَگ ءُ دار ءِ چِنّگ کہ آیاں مئے ھواری ءَ اے وھد ءَ یونی ءَ بوھگی اِنت۔ من بس ھمد ءَ آجوئی سما کُت کہ آجوئی چینچو الّمی اِنت۔
گاڑی آئی ءَ فون کُت لوٹارینت، منی دل ءَ نہ گْوشت کہ من شال ءَ واتر بہ بَہ آں ، من لوٹ اِت من ھم آئی ءِ ھمراھی ءَ برو آں ، آ ھر کُجا روت من گون بِہ بَہ آں بلے۔۔۔۔۔۔۔۔۔۔۔۔۔۔
گاڑی اتک ما سوار بوت ءُ در کپت اِیں، گاڑی ءَ کہ پیچ ءَ تاب کُت آ اندیم بوت۔ من پردہ بست۔۔۔۔۔۔۔۔
اچھا۔۔۔۔۔۔۔ گوھر ءَ بلائیں اچھایے کش اِت مارا زُرت ءُ ورگجاہ ءَ شُت۔ سُھب ءَ کہ ما یونی ءَ شُت اِیں، مارا ھال ءَ گپت، کہ تربت ءِ بازار ءَ سرمچاراں فوجی یے جتگ ءُ تُپنگ ءُ ایدگہ سامان اِش بُرتگ اَنت۔ منی گُشان سر ءَ چہ کپت ءُ سُنٹ نودان بوت۔
