بلوچستان کے ضلع کیچ کے علاقے مند سے اہم سرکاری شخصیت کے بھائی کو گن پوائنٹ پر مبینہ طور پر اغوا کر لیا گیا ہے، جس کے بعد ان کا کوئی سراغ نہیں مل سکا ہے۔
تفصیلات کے مطابق، بلوچستان اسمبلی کی رکن اور وزیراعلیٰ بلوچستان کی مشیر برائے کھیل و امورِ نوجوانان مینا مجید کے چھوٹے بھائی اورنگزیب مجید کو ان کے آبائی گاؤں مند، بلوچ آباد سے مسلح افراد نے حراست میں لے کر لاپتہ کر دیا ہے۔
مقامی اور پولیس ذرائع کے مطابق، دو موٹر سائیکلوں پر سوار چار نامعلوم مسلح افراد نے اورنگزیب مجید کو بلوچ آباد میں گن پوائنٹ پر یرغمال بنایا اور اپنے ساتھ نامعلوم سمت لے گئے۔
واقعے کے بعد سے ان کے بارے میں کوئی اطلاع سامنے نہیں آئی ہے اور ان کا پتہ نامعلوم ہے۔
واقعے کے فوری بعد پولیس اور متعلقہ انتظامی حکام کا موقف سامنے نہیں آیاہے۔
اس ہائی پروفائل واقعے کے بعد علاقے میں شدید تشویش اور کشیدگی پھیلی ہوئی ہے۔
