سوئی ڈیرہ بگٹیءَ یک ورنائیں مردمےءِ عکس سوشل میڈیایا شنگ ات۔ آ سوئیءِ پولیس تھانہءَ ات۔ ہمے گپ تالان ات کہ اے زانگ نہ بیت کئے اِنت۔ اے گپ پدر بوتگ ات کہ آ گپَ نہ کنت خاموش اِنت، وتی پجارءَ نہ کنت یا کرتَ نہ کنت۔ اول ما ایشرا ہنچائیں کیسے سرپد بوتاں کہ مدام ہالتاکاں کئیت انت کہ اے وڑیں مردمے فلان علاقہءَ انت، ”دماغی توازن“ ئےِ شر نہ انت۔
دیر نہ گْوست من وٹس ایپ گروپےءَ دیست کہ بولان کریمءِ براتءَ گْوشتہ کہ منی براتءِ رنگ انت بلئے شکل ئےِ باز بدل انت، چیا کہ آ ہشت سال اِنت بیگواہ اِنت۔ اسلا بیگواہ نہ انت، آئی گواہ ہست انت کہ پاکستانی فوجءِ کرا انت چیا کہ آئرا پاکستانی فوجءَ جنوری 2013ءَ پسنیءَ چہ آوار جتہ بُرتہ۔ ما گل بوتاں کہ ہزاراں بیگواہیں مردماں چہ یکے درا بوتہ، بل ات کہ طبیعت ئےِ سک خراب انت، گپَ نہ کنت، بلئے من زاناں علاج بوتَ کنت۔
اول اے اندازہے ات کہ اے بولان کریم انت، یا بلکن دگہ بیگواہیں مردمے۔ بلئے اے گپ زوت کنفرم بوت وہدے کہ فوجءَ اے ورنا پدا چہ پولیس تھانہءَ آوار جتءُ برت۔ جُست اے ودی بیت انت کہ فوجءَ یکبرے چیا یلہ داتگ؟ منی زانگءَ ایشی لہتیں سبب بوتَ کننت۔ یکے وَ ایش انت فوج سرپد بوتگ کہ آ زانگ نہ بیت کئے انت، آ وتی پجار کرتَ نہ کنت۔ اے شکلءَ مردم ہم پجار کرت نہ کننت ئےِ۔ دُہمی ایش انت کہ پاکستانی فوج بیماریں مردماں داشتَ نہ کنت۔ آ وت مِر انت یا فوج کُشیتءُ دَور دنت اش یا ہمے وڑا یلہَ دنت اش۔ دگہ سبب ہم بوت کننت۔ پہ درور، پاکستان چارگ لوٹی کہ من سکءَ دیریں گاریں مردمے یلہ بکناں گُڑاں چے ری ایکشن دیما کئیت اِنت۔
بولان کریمءِ اے حالتءَ چہ اے گپ ہم زانگ بیت کہ بیگواہیں گیشتری مردم ہمے وڑ انت نوں۔ ذہنی صورتءَ کسے ثابتءَ واپس نئیت انت۔ منا کسانیں چار ماہءِ بیگواہیءُ ٹارچرءِ تجربہ گون انت، من چاردہ سال انت وترا علاج کنائینگءَ اوں۔ اے دعایے نہ انت بلئے حالات مردمءَ را ہمے وڑَ کننت۔ بلئے ما بولان کریم ایں۔ مارا گپ کنگی انت۔ بولان ایوک نہ انت۔ اے جاوراں ما دُرست وڑے نا وڑےءَ بیگواہاں۔ ما خاموش نہ باں۔
ہمے روچاں آپسر تربتءَ ہمے فوجءِ دستءَ حیات مرزا بلوچ کُشگ بوت۔ شہید کنگ بوت۔ اے کوشءِ وڑءُ ڈول ہنچش اتنت کہ ایشی ہرچ مردمءَ را اثر کرت۔ سوشل میڈیاءَ بگر ہر شہرءَ زہر شانیءِ دْرچے بندات بوت۔ شہید حیاتءِ کلاس فیلوءُ یونیورسٹی فیلو، بلوچءُ غیر بلوچ درست اے واقعہءَ خلافءَ پاد اتک انت۔ حیات مرزاءِ کوش جاہءَ آئیءِ قلم گوں ہوناں ہنچو ایر اَت کہ بہہ بیہال نہ بیت۔ پاکستانءَ زانتگ ات کہ ہرکسءَ وانتہءُ شعور زرتہ، آ ہچ رنگءَ اے زلمءَ برداشتَ نہ کنت۔ آ وڑے نہ وڑے مزاحمتَ کنت۔ آ زندگیں ساہےءِ پجیءَ یک زندگیں ضمیرے ہم داریت۔ اے تہنا حیاتءِ زندگیءِ ہلاس کنگ نہ انت۔ ایشی تہا حیاتءُ آئی کہولءِ ہزار ارمانءُ امیت ہم کُشگ بوتگ انت۔ حیاتءِ رُژنائیں باندات کہ کہولءَ ہم وشیءِ مستاگ ات، آ درست ہلاس بوت انت۔
پاکستانءَ ایف سیءِ یک سپاہی یے پولیسءِ دستءَ داتگ کہ میاریءُ گناہ کار ہمیش انت۔ اے وَ کندگی گپے پمن۔ پولیسءِ واکءُ بستار نہ انت کہ فوجءِ خلافءَ چیزے کرت پکنت۔ بلئے ادا اگن چیزے پکنت ہم بزان اے یکیں سپاہی قربانیءِ پسءِ ہسابءَ ایشاں دیما داتگ کہ فوجءِ ادارہءِ نام مئیت انت۔ ما زاناں کہ ڈاکٹر شازیہ خالدءِ ریپ کنوک آزاد انت، ملا رفیقءِ ہمے رنگءَ شہید کنوک آزاد انت۔ لہتیں سال پیسر کراچیءَ سرفراز نامیں ورنایے رینجرزءَ گپتءُ دیم پہ دیم تِیر جتءُ کشت۔ اے فوج، ایف سیءُ رینجرز ہچبر جست کنگءُ سزا دئیگ نہ بنت۔
اگن اے یکیں سپاہی سزا دئیگ بہ بیت ہم آ حیات مرزا رنگیں ورنایےءِ بدل نہ انت۔ نہ کہ اے پیمیں ورناءِ بدل کئیت انت۔ بس مارا زانگ لوٹیت کہ مارا ابید آجوئیءَ دگہ راہ نیست۔ اے گپءَ درست پیرءُ ورنا بزان انت کہ اے ریاست کسرا نہ بکشیت۔ درست حیاتءِ وڑا کُشگ بنت۔ اے وہدا پاکستانءِ فیصلہ انت کہ شمارا من وتی وڑا وتی تبءَ کُشاں، من وت وہدءُ پاسءَ گچین کناں۔ بلئے بازیں مردمءَ وتی رہشون ڈاکٹر اللہ نذرءِ پنت زرتگ کہ آئیءَ 2001 ءَ وتی یک گشتانکےءِ تہا گْوشتگ ات کہ ”مرگءِ اختیار منی دستءَ انت، وتی مرگءِ وہدءُ جاگہہءَ من وت گچین کناں“۔ اگن ما اے فلسفہءَ عملی طورءَ بزوراں گُڑاں کسی ماتءُ پت حیاتءِ وڑا وتی چکاں مِرگءَ نہ گند انت۔
من سوشل میڈیا ہا گندگءَ آں کہ لہتیں مردم اچ پاکستانی سول سوسائٹیءُ پاکستانی سیاسی وفاق پرستاں اچ گلگ کنگءَ انت کہ آ اے وڑیں دردناکیں جاوراں خاموشَ بنت۔ آہانی خاموشی پمن ہبکہی گپے نہ انت۔ اگن ما ڈاکٹر مالکءُ حاصلءِ نیشنل پارٹیءَ امیت بداریں کہ آ بلوچءِ ھقیقی درد وار بنت، اے نبوتگیں گپے۔ اے روچءَ بلوچ کننت وترا شپءَ کینٹءَ سلامیءَ رونت۔ اے الیکشنءَ ایشانی بدلءَ کینٹ والایاں دگہ لہتیں سرگ دیما آرت پمشکا اے روچءَ بلوچَ بنت بلکن۔ بلئے شپاں تئی خلافءَ ہنچیں پندل ساز انت کہ سر تئی کارَ نہ کنت۔ ایشانی ہمدردیءَ ہم تُرسگ لوٹی۔ انسانی حقانی جیڑہءَ اگاں چشیں گلے دیما ہم کئیت انت، مارا ایشاں چہ دور دارگی انت۔ چیا کہ اے ہرچ انسانءِ یا ہر چ بلوچءِ کُشگءَ تئی ہمراہ نہ انت۔ اے ہمودا تئی ہمراہ انت کہ آ کوشءَ پاکستان نقصان ورگءَ بہ بیت۔
