آج دیگر ممالک میں مقیم ایرانی شہری رضا پہلوی کی دعوت پر دنیا کے مختلف شہروں میں ایران میں موجود مظاہرین کی حمایت میں ریلیاں نکال رہے ہیں اور غیر ملکی حکومتوں سے ایرانی حکومت کے خلاف کارروائی کا مطالبہ کر رہے ہیں۔
رضا شاہ پہلوی نے ایران کے اپنے حامیوں اور مخالفین سے سڑکوں پر آنے کی اپیل کی ہے تاکہ ’بین الاقوامی برادری کو ایرانی قوم کی حمایت میں عملی اور فوری اقدام کرنے پر مجبور کیا جائے۔‘
انھوں نے آج کی ریلیوں کے لیے چھ مطالبات کا بھی اعلان کیا، جن میں ’تمام سیاسی قیدیوں کی فوری رہائی‘ اور ’ایران کی جمہوریت کی طرف منتقلی کے لیے قانونی عبوری حکومت کو تسلیم کرنے کے لیے آمادگی‘ شامل ہیں۔
مرکزی اجتماعات میونخ، لاس اینجلس اور ٹورنٹو میں ہو رہے ہیں لیکن دنیا کے دیگر شہروں میں بھی مارچ اور ریلیاں نکالی جا رہی ہیں۔ پہلی ریلی اور مارچ آج سڈنی میں منعقد ہوا جس میں آسٹریلیا میں مقیم ہزاروں ایرانیوں نے شرکت کی۔
شہر میں رضا پہلوی کی موجودگی کے ساتھ ہی میونخ میں سب سے بڑا اجتماع متوقع ہے۔
رضا پہلوی نے میونخ میں تقریر کے دوران جرمن چانسلر کے ریمارکس کا حوالہ دیتے ہوئے کہا کہ ایران اپنے خاتمے کے قریب ہے اور وعدہ کیا کہ ’تبدیلی آنے والی ہے۔‘
شہزادہ رضا پہلوی نے اپنی تقریر میں عالمی برادری سے کئی مطالبات اٹھائے جن کا اعلان پہلے عالمی یومِ عمل کی ریلیوں کے مطالبات کے طور پر کیا گیا تھا۔
احتجاجی مظاہرین نے ایرانی حکومت کی جبر کو توڑنا اور ایرانی عوام کی حفاظت کرنا،ایرانی حکومت کے مالی وسائل کی مکمل کٹوتی،ایرانی سفارت کاروں کو ملک بدر کرنا اور مجرموں پر مقدمہ چلانا۔اورایران کی جمہوریت کی طرف منتقلی کے لیے قانونی عبوری حکومت کو تسلیم کرنے کے لیے آمادگی کے مطالبات کئے ۔
ایران کے رضا شاہ پہلوی نے میونخ سیکورٹی کانفرنس میں اپنی پریس کانفرنس کے دوران کہا کہ ’بیرون ملک ایرانیوں نے ایران کے اندر موجود لوگوں کے ساتھ یکجہتی کا مظاہرہ کیا۔ وہ جمہوری ممالک کے رہنماؤں کو ایرانی عوام کے ساتھ کھڑے ہونے کا واضح پیغام دے رہے ہیں۔‘
انھوں نے کہا کہ ’کیا دنیا ایرانی عوام کے ساتھ کھڑی ہوگی یا ایسی حکومت کو خوش کرے گی جس نے 40,000 افراد کو ہلاک کیا ہے؟‘
شہزادہ رضا پہلوی نے مزید کہا کہ ’میرا ملک آج کی جنگی اصلاحات اور انقلاب کے درمیان نہیں ہے، یہ آزادی اور قبضے کے درمیان ہے۔‘
انھوں نے کہا ’ایرانی حکومت اپنی قانونی حیثیت کھو چکی ہے۔ حکومت انٹرنیٹ بند کر رہی ہے اور اپنے ہتھیار لوگوں کے لیے کھول رہی ہے۔‘
مسٹر پہلوی نے پھر کہا ’تبدیلی آ رہی ہے۔‘
’میں ایران کے خلاف ٹرگر میکانزم کو فعال کرنے پر فرانس، جرمنی اور برطانیہ کی تعریف کرتا ہوں۔ میں یورپی یونین کی ان پابندیوں کی تعریف کرتا ہوں جو اس نے مظاہرین پر جبر کے لیے لگائی ہیں۔‘
شہزادہ رضا پہلوی نے الزام عائد کیا کہ ’یہ حکومت اپنے ہی شہریوں کو نشانہ بناتی ہے۔ یہ دوسرے ممالک کے شہریوں کو بھی نشانہ بناتی ہے، اس نے دنیا کے مختلف شہروں میں بم دھماکے کیے ہیں۔ ان کے اقدامات کی کوئی سرحد نہیں معلوم۔‘
انھوں نے مزید کہا کہ ’اب ہمیں جس چیز کی ضرورت ہے وہ ایرانی عوام کے ساتھ آپ کی یکجہتی ہے جو آزاد ہونا چاہتے ہیں۔‘
شہزادہ رضا پہلوی نے ایران پر زیادہ سے زیادہ دباؤ جاری رکھنے، انٹرنیٹ کی بندش کا مقابلہ کرنے میں مدد اور تمام سیاسی قیدیوں کی رہائی پر زور دیا۔
شہزادہ رضا پہلوی نے کہا کہ ایران میں خونریزی کو ختم کرنے کا وقت آگیا ہے۔
انھوں نے کہا کہ اسلامی جمہوریہ ایس ایس کا ایرانی ورژن ہے اور اسے ختم ہونا چاہیے۔ ایس ایس نازی جرمنی میں ایک خوفناک فوجی اور سکیورٹی تنظیم تھی۔
اس سوال کے جواب میں کہ خود رضا شاہ پہلوی ان کے گروپ کی فنڈنگ کہاں سے آتی ہے، رضا پہلوی نے کہا ’مالی عطیات نجی اور ایرانیوں کی طرف سے آتے ہیں جو مدد کرتے ہیں۔‘
انھوں نے کہا کہ انھیں اب تک کسی حکومت سے کوئی رقم نہیں ملی۔
