بلوچستان کے مختلف علاقوں میں پاکستانی فورسز پر حملوں کی اطلاعات رپورٹ کی گئی ہیں۔
ذرائع کا کہنا ہے کہ تربت، کولواہ اور سوراب میں گزشتہ روز مسلح افراد نے پاکستانی فورسز اور سیندک پروجیکٹ کے سیکورٹی قافلوں کو حملوں میں نشانہ بنایا اور بعدازاں ڈمپر گاڑیوں کونذر آتش کیا گیا۔
مقامی ذرائع کا کہنا ہے کہ سوراب واقعہ گزشتہ روز صبح کے وقت گیارہ بجے پیش آیاجہاں سوراب اور رودینجو کے درمیان بتگو کراس کے مقام پر آر سی ڈی شاہراہ پر بڑی تعداد میں مسلح افراد نے گھنٹوں تک ناکہ بندی کی۔
ذرائع کا کہنا ہے کہ اس دوران مسلح افراد نے سیندک جانے والے گاڑیوں کے قافلے کی سیکیورٹی پر مامور فورسز پر بھی حملہ کیا۔
حملے کے بعدمسلح افراد اور فورسز کے درمیان کافی دیر تک جھڑپ بھی جاری رہی۔
ذرائع کے مطابق حملے میں گاڑیوں کو بھی نقصان پہنچا ہے۔
دوسری جانب ضلع کیچ کے علاقے ہوشاب میں نامعلوم مسلح موٹر سائیکل سواروں نے دو ڈمپر گاڑیوں اور ایک ایکسکیویٹر کو پیٹرول چھڑک کر آگ لگا دی جس کے نتیجے میں بھاری مشینری کو شدید نقصان پہنچا۔ واقعے کے بعد حملہ آور موقع سے فرار ہو گئے۔
ذرائع کے مطابق واقعہ رات گئے پیش آیا، تاہم کسی جانی نقصان کی اطلاع نہیں ملی۔ آگ لگنے کے باعث گاڑیاں جل کر ناکارہ ہو گئیں۔
ادھر تربت میں مسلح افراد نے گزشتہ رات نیوی کے کیمپ پر ایک دستی بم پھینکا جو زور دار دھماکے سے پھٹ گیا تاہم کسی قسم کی جانی نقصان کی اطلاع نہیں ملی۔
ان حملوں کی ذمہ داریاں تاحال کسی تنظیم نے قبول نہیں کی ہیں۔
