پاکستانی فوج کی شعبے تعلقاتِ عامہ کی جانب سے جاری ہونے والے ایک بیان میں دعویٰ کیا گیا ہے کہ پانچ دسمبر کو سکیورٹی فورسز نے بلوچستان کے ضلع ڈیرہ بگٹی میں مسلح افراد کی موجودگی کی اطلاع پر ایک خفیہ آپریشن کیا۔
دعوے میں مزید کہا گیا ہے کہ ’آپریشن کے دوران فورسز نے مسلح افراد کے ٹھکانے کو مؤثر طریقے سے نشانہ بنایا اور شدید فائرنگ کے تبادلے کے بعد 5 افراد مارے گئے۔‘
آئی ایس پی آر کی جانب سے مزید دعویٰ کیا گیا ہے کہ ’اس کارروائی کے دوران مسلح افراد کے قبضے سے اسلحہ، گولہ بارود اور دھماکہ خیز مواد بھی برآمد ہوا۔ تاہم یہ عناصر علاقے میں متعدد عسکریت پسندانہ سرگرمیوں میں ملوث تھے۔‘
یاد رہے کہ پاکستانی فوج آئے روزمیڈیا پر اپنے ایک پریس ریلیز میں بلوچستان سمیت خیبر پختونخوا میں خفیہ آپریشنز کے نام سے متعدد مسلح افراد کو مارنے اور ان کے قبضے سے اسلحہ ،گولہ بارود سمیت دھماکا خیز مواد کی برآمدگی کا دعویٰ کرتی رہتی ہے لیکن دوسری جانب مقامی ذرائع مسلح افراد کو مارنے کے فوج کے دعوئوں کو جھٹلاتے ہیں ۔
ان کا کہناہے کہ ان جعلی کارروائیوں اور مقابلوں میں ہلاک ہونے والے افراد کی شناخت پہلے سے جبری لاپتہ ،عام اور بے گناہ لوگوں کے طور پرہوتی ہے جنہیں بعدازاں کوئی میڈیا رپورٹ نہیں کرتا، بس آئی ایس پی آر کی ایک طرفہ پریس ریلیز پر اکتفا کیا جاتا ہے ۔
