بلوچستان میں جبری گمشدگیوں کے خلاف آواز بلند کرنے والی تنظیم وائس فار بلوچ مسنگ پرسنز (VBMP) نے مالی دباؤ کے باعث اپنے تاریخی احتجاجی کیمپ کو عارضی طور پر بند کرنے کا اعلان کیا ہے۔ یہ کیمپ گزشتہ 15 سالوں سے زائد جاری ہے اور لاپتہ افراد کے لواحقین کی جدوجہد کا مرکز رہا ہے۔
وی بی ایم پی کی جانب سے جاری تازہ ترین بیان میں کہا گیا ہے کہ مالی مشکلات کی وجہ سے اس سال سردیوں کے موسم میں کیمپ کو کراچی منتقل کرنا ناممکن ہو چکا ہے۔ یہ تنظیم عام طور پر سردی کے سخت موسم میں اپنے احتجاج کو کراچی لے جاتی رہی ہے تاکہ زیادہ توجہ حاصل ہو سکے اور مظاہرین کو سخت موسم سے بچایا جا سکے۔
ماضی میں ماما قدیر کی سربراہی میں یہ کیمپ ہر سال سردیوں میں کراچی منتقل ہوتا رہا ہے لیکن گذشتہ کئی مہینوں سے ماما قدیر بلوچ کی علالت کے باعث کیمپ کی جاری تسلسل میں خلل پڑ رہی ہے ۔
بیان کے مطابق مالی مشکلات کی وجہ سے اس دفعہ سردیوں میں وائس فار بلوچ مسنگ پرسنز کے احتجاجی کیمپ کو کراچی منتقل کرنا ناممکن ہے۔ اس لیے ہم کیمپ کو 15 دسمبر سے مارچ تک عارضی طور پر بند کرنے کا اعلان کرتے ہیں۔
تنظیم نے واضح کیا ہے کہ یہ بندش مستقل نہیں ہے۔ وی بی ایم پی کا کہنا ہے کہ وہ مارچ کے مہینے سے کوئٹہ پریس کلب کے سامنے اپنے احتجاجی کیمپ کو دوبارہ اسی جگہ سے جاری رکھے گی۔
