بلوچستان کے ضلع کیچ کے علاقے گومازی اور دیہات سے ایک لاپتہ نوجوان سمیت 3 افراد کی لاشیں برآمدہوئی ہیں۔
تحصیل تمپ کے علاقے گومازی سے دو روز قبل پاکستانی فوج اور اس کی حمایت یافتہ ملیشیا جسے مقامی طور پر ڈیتھ اسکواڈ کہا جاتا ہے کے ہاتھوں اغوا ہونے والے نوجوان عمران ولد نادل قومی کی لاش آج بروزجمعہ کوگومازی کراس کے مقام سے برآمد ہوئی ہے۔
مقامی ذرائع کے مطابق عمران کو دو روز قبل سرپ گاڑی میں سوار مسلح افراد اور پاکستانی فوج نے گھر سے زبردستی اٹھایا تھا۔
اغوا کے وقت وہ شادی کی تیاریاں کر رہا تھا اور ایک دن بعد اس کی شادی طے تھی۔
ورثاء اور علاقائی لوگوں کا کہنا ہے کہ عمران کو شدید تشدد کے بعد قتل کیا گیا۔
واضح رہے کہ بلوچستان میں اس سے قبل بھی متعدد نوجوان مبینہ طور پر ڈیتھ اسکواڈ اور پاکستانی فورسز کے ہاتھوں جبری لاپتہ کیے جانے کے بعد تشدد زدہ لاشوں کی صورت میں مل چکے ہیں، جس پر انسانی حقوق کی تنظیمیں اور علاقائی لوگ تشویش کا اظہار کرتے رہے ہیں۔ تاہم اس طرح کے واقعات مسلسل جاری ہیں۔
دوسری جانب ضلع کیچ کے علاقے دیہات سے مزید 2 افراد کی لاشیں برآمد ہوئی ہیں۔
لاشوں کی شناخت ابو بکر ولد حاصل سکنہ بلنگور اور طاہر احمد ولد اللہ بخش سکنہ شولی دشت کے ناموں سے ہوئی ہے۔
ابتدائی اطلاعات کے مطابق مقتولین کی ہلاکت کی وجوہات اب تک معلوم نہیں ہوسکیں جبکہ واقعے سے متعلق مزید تحقیقات جاری ہیں۔
