پاکستان کے اسلام آباد ہائیکورٹ نے ریویو کمیٹی کو ڈاکٹر ماہ رنگ بلوچ کا نام ایگزٹ کنٹرول لسٹ (ای سی ایل) سے نکالنے کی درخواست پر 30 دن کے اندر فیصلہ کرنے کی ہدایت جاری کر دی۔
عدالت نے متعلقہ لا افسران کو حکم دیا کہ عدالت کے احکامات پر مکمل عمل درآمد یقینی بنایا جائے۔
کیس کی سماعت چیف جسٹس سردار سرفراز ڈوگر نے کی۔
سماعت کے دوران درخواست گزار کی جانب سے وکیل عطا اللہ کنڈی ایڈووکیٹ پیش ہوئے، جبکہ قبل ازیں ما ہ رنگ بلوچ کے کیس کی پیروی ایمان مزاری ایڈووکیٹ کر رہی تھیں۔
عطا اللہ کنڈی ایڈووکیٹ نے مؤقف اختیار کیا کہ پٹیشنر کو 7 اکتوبر کو امریکا سفر سے روکا گیا، پہلے ان کا نام پی سی ایل میں اور بعد ازاں ای سی ایل میں شامل کیا گیا۔
انہوں نے بتایا کہ ریویو کمیٹی کو پابندی ختم کرنے اور نام فہرست سے نکالنے کی درخواست دے چکے ہیں، لہٰذا کمیٹی کو وقت کا پابند کیا جائے۔
چیف جسٹس نے ریمارکس دیے کہ عدالت ریویو کمیٹی کو 30 دن میں فیصلہ کرنے کی ہدایت جاری کرتی ہے۔
بعد ازاں عدالت نے باضابطہ طور پر 30 روز میں درخواست پر فیصلہ کرنے کا حکم دے دیا۔
