افغانستان میں طالبان حکام نے دعویٰ کیا ہے کہ جمعے کو پاکستان نے اس کے سرحدی صوبے پکتیکا میں بمباری کی ہے اور جنگ بندی کی خلاف ورزی کی ہے۔
طالبان کے حکومت کے ایک صوبائی عہدیدار نے بی بی سی افغان سروس کو بتایا کہ جمعے کو ’پاکستان نے پکتیکا صوبے کے ارغون ضلع میں ایک قصاب کے گھر پر بمباری کی ہے جس میں عام شہری ہلاک اور زخمی ہوئے ہیں۔‘
اس سے قبل طالبان کے مرکزی ترجمان ذبیح اللہ مجاہد نے پاکستان اور افغانستان کے درمیان جنگ بندی کی تصدیق کی تھی۔
تاہم پاکستانی حکام نے جنگ بندی میں توسیع یا افغانستان میں کسی بھی قسم کا کوئی حملہ کرنے کی اطلاعات پر تاحال کوئی تبصرہ نہیں کیا ہے۔
خیال رہے پاکستان اور افغانستان نے بدھ کو جھڑپوں کے بعد 48 گھنٹے کی جنگ بندی پر رضا مندی ظاہر کی تھی۔
دوسری جانب خبر رساں ایجنسی اے ایف پی کو بھی طالبان کے ایک سینیئر عہدیدار نے نام نہ ظاہر کرنے کی شرط پر بتایا کہ پاکستان نے افغانستان کے سرحدی صوبے پکتیکا میں کارروائی کی ہے۔
ان کا کہنا تھا کہ ’پاکستان نے جنگ بندی کی خلاف ورزی کرتے ہوئے پکتیکا میں تین مقامات پر بمباری کی ہے۔ افغانستان اس کا جواب دے گا۔‘
دوسری جانب طالبان کے مرکزی ترجمان ذبیح اللہ مجاہد کا کہنا ہے کہ پاکستان کی درخواست پر جنگ بندی میں توسیع کر دی گئی اور دوحہ میں ہونے والی بات چیت کے اختتام تک جنگ بندی برقرار رہے گی۔
انہوں نے بی بی سی اردو کے روحان احمد کو بتایا کہ پاکستان اور افغانستان کے درمیان جنگ بندی میں توسیع کر دی گئی ہے تاہم ان کا دعویٰ تھا کہ یہ اقدام پاکستان کی درخواست پر کیا گیا۔
دوسری جانب خبر رساں ادارے روئٹرز کا کہنا ہے کہ پاکستان اور افغانستان نے مشترکہ طور پر جنگ بندی میں توسیع پر رضامندی ظاہر کی ہے۔ روئٹرز نے پاکستانی سکیورٹی حکام اور افغان طالبان کے ذرائع کے حوالے سے بتایا کہ افغانستان اور پاکستان نے دوحہ میں ہونے والی بات چیت کے اختتام تک جنگ بندی میں توسیع کی ہے۔
اس سے قبل افغان عبوری حکومت کے ترجمان ذبیح اللہ مجاہد نے مقامی نیوز چینل آریانا نیوز کو بتایا کہ پاکستان سے بات چیت کے لیے افغان طالبان کا وفد دوحہ جائے گا۔ انھوں نے کہا تھا کہ ان مذاکرات کا مقصد جنگ بندی اور کشیدگی میں کمی لانا ہے۔
یاد رہے کہ پاکستان اور افغانستان کے مابین کشیدگی میں کمی کے لیے مذاکرات قطر کے دارالحکومت دوحہ میں سنیچر کے روز ہوں گے۔
پاکستان اور افغانستان کے مابین سرحدی کشیدگی اور جھڑپوں کے بعد دونوں ملکوں نے 48 گھنٹے کی جنگ بندی کا اعلان کیا تھا جو جمعے کو شام 6 بجے ختم ہونا تھی۔
