پاکستان کے علاقے ڈیرہ اسمٰعیل خان میں پولیس ٹریننگ سینٹر پر خود کش حملے میں 7 اہلکار ہلاک ہوگئے۔
ڈسٹرکٹ پولیس آفیسر (ڈی پی او) ڈیرہ اسمٰعیل خان سجاد احمد صاحبزادہ کے مطابق ڈی آئی خان کے پولیس ٹریننگ سینٹر پر 7 سے 8 عسکریت پسنددوں نے بھاری ہتھیاروں سے حملہ کیا۔
ڈی پی او کے دعوے کے مطابق ایک خودکش حملہ آور نے ٹریننگ سینٹر کے قریب خود کو دھماکے سے اڑا لیا، جبکہ پولیس کی جوابی کارروائی میں 3 حملہ آور مارے گئے۔
دھماکے کے بعد علاقے میں شدید فائرنگ کا سلسلہ شروع ہوا، صورتحال پر قابو پانے کے لیے اعجاز شہید پولیس لائنز سے پولیس کی اضافی نفری پہنچی۔
دوسری جانب پاکستان وفاقی وزیر داخلہ محسن نقوی نے ڈیرہ اسماعیل میں پولیس ٹریننگ سکول حملے میں سات پولیس اہلکاروں کی ہلاکت کی تصدیق کی ہے۔
ایک بیان میں وزیر داخلہ محسن نقوی نے ہلاک ہونے والوں کے لواحقین سے دلی ہمدردی کا اظہار کیا ہے۔
وزیر داخلہ کا کہنا تھا کہ پولیس اہلکاروں نے اپنی جان دے کر ’عسکریت پسندوں کا حملہ ناکام بنایا اور 3 حملہ آوروں کو ہلاک کیا۔
واضح رہے کہ ڈیرہ اسماعیل خان میں پولیس ٹریننگ سکول پر جمعے کی شب حملہ کیا گیا تھا۔
ڈیرہ اسماعیل خان پولیس کے ترجمان کے مطابق ڈسٹرکٹ پولیس افسر سجاد احمد صاحبزادہ نے مقامی صحافیوں کو بتایا تھا کہ تین حملہ آوروں کو ہلاک کر دیا گیا ہے۔
اس ٹریننگ سکول کا افتتاح اس برس جنوری میں کیا گیا تھا جہاں پولیس اہلکاروں کو بنیادی تربیت دی جاتی ہے۔
