نبشتہ کار: مراد بلوچ
مزاھمت پہ ھر گلام ءُ ایردستیں راج ءِ واستا زندگی اِنت ، اگاں اے درگت ءَ کُجام راج ءِ زند نوآبادیاتی نظام ءِ توک ءَ گَْوزگ ءَ اِنت آئی ءِ زند گلامیں زِندمانے گْوشگ بیت ، ءُ ھمے داب ءَ آئی ءِ زند بزگی ءُ واری تہ ءَ گْوز اِیت۔
بلے وھدے آ مزاھمت کنت گُڑا آئی ءِ زند ءِ تہ ءَ بدلی کَیت ، چی ءَ کہ تھنا زندگی بزگ ءُ وار نہ بیت بلکیں اِشی ءَ گوں ھوار راجی پجّار ، تاریخ ، دود ءُ ربیدگ ءِ سر ءَ ھم اثر کپ اِیِت۔اگاں وھدے یک راجے چہ وتی تاریخ ، دود ءُ ربیدگ ءَ چہ دُور کنگ بیت گُڑا آ راج ءِ نام چہ اے گیِدی ءَ گار بیِت ۔ گلامیں زند ءِ تہ ءَ مزاھمت پمیشکا المی اِنت کہ تو چہ اے مزاھمت ءَ وتی ھما بِستار ءَ برجم داشت کن ئے ، وتی تاریخ ، وتی زُبان ءُ لبزانک ءَ دیم ءَ بُرت کن ئے کہ آئرا گار کنگ ءِ کُوشست بوتگ ءُ انگت بُوَگ ءَ اِنت ۔
چی ءَ کہ یک نوآباد کارے ءِ مزنیں جُھد ءُ کُوشست ھمے بیِت کہ ھما راج ءِ سر ءَ قابض اِنت اُود ءَ وانگ ءَ چہ مھلوک ءَ دُور دار اِیت ، پرے ھاتِر ءَ کہ علم ءُ زانت مردُماں مزاھمت ءِ ڈسّ اِیت ءُ ناانصافی ءِ ھِلاپ ءَ جزبہ پیدا کنت ، پمیشکا نوآباد کار لس مھلوک ءَ چہ وانگ ءَ دُور دار اِیت۔ ھما راج کہ جھد نہ کن اَنت گُڑا آ راجانی نام گار بیت۔ ءُ ھمے پیم ءَ گَیدی ءِ تہ ءَ یک رَواجے ھست کہ اُود ءَ ھر بَزّگ ءُ ایردست ءِ سر ءَ زُلم ءُ زُوراکی بیت ، ھر مظلوم قوم ءِ سر ءَ تاکت ور قابض بیت ءُ آئی ءِ مال ءُ مڈّیاں وتی قبضہ ءَ کنت ۔ آئی ءِ زِند ءُ مَرگ ءِ پیسلہ ءَ ھم وت کنت ، چی ءَ کہ آ راج ءِ تاریخ ، دود ءُ رَبیدگ ءَ گار کنگ لَوٹ اِیت۔ آئی پجّار ، نام ءُ نِشان ءَ گارکنگ لوٹ اِیت ءُ پہ مُدامی گُلام جوڑ کنت۔ اگاں آئی چہ گُلامی ءَ درکپگ ءِ واستا جُھد ءُ کُوشست نہ کُت ، گُڑا بِہ زان میار ھمے ماتیں گُلزمیں ءِ پرزندانی اِنت کہ وتی مات ءَ چہ گلامی ءِ زند ءِ کشگ ءَ جُھد ءُ کُوشست نہ کنت ءُ کُربانی نہ دنت۔
اے تاریخی راستی یے کہ یک راجے ءِ پجّار آھگی زُبان ، دود ءُ ربیدگ اِنت ، وھدے آئی سر ءَ زالم کہ قبضہ کنت گُڑا پہ آئی ءَ آ دِگہ کُلّیں راہ ءُ در بند بَہ اَنت ءُ یک راھے پشت کَپ اِیت ، آ راجی جُھد ءُ مزاھمت اِنت۔ وھدے تئی جِند ءِ سرزمیں ءَ تئی پجّار ءِ بابت ءَ جُست کنگ بِہ بیت ، تئی جند ءِ سرزمین ءِ مالءُ مڈّی پہ دِگہ راجے ءِ گھبودی ءِ واستا کارمرز بِہ بَہ اَنت ۔ گُڑا پہ جزم بِہ زان ھمے زالِم ءِ ھِلاپ ءَ جدوجہد کنگ المی اِنت ، چی ءَ کہ ھبر تھنا مال ءُ مڈّی ءِ نہ اِنت بلکیں تئی راجی پجّار ءُ سرڈگار ءِ گپ اِنت ۔
بلوچستان ءِ سر ءَ پاکستان ءِ قبضہ ءَ رند بلوچ راج اَنچو بیوس ءُ لاچار اِنت کہ بلوچ وتی زمین ءِ سر ءَ نِشت نہ کنت ، چی ءَ کہ بلوچ ءِ سائل ءُ وسائل ءِ سر ءَ پاکستان ءِ پیسر ءَ قبضہ ءُ انّوں وتی زُلم ءُ زُوراکیانی تہ ءَ ھم گیشی آؤرتگ ۔ نہ پِیر ءُ کماش ، زھگ ءُ زالبُول ، نیکہ بلوچ ءِ ورنایاں پش گِپتگ اَنت ، بلے نوں وتی زُلم ءُ زُورانسری ءَ کسانیں چُکانی سر ءَ کنگ ءَ اِنت ۔ آ بْرمش ءِ دْروشم ءَ بِہ بیت یا کہ کسانسالیں ناز بی بی بِہ بیت ، آیانی سر ءَ پاکستان ءِ زُلم ءُ زُوراکی ھمے زاھر کنت کہ ریاست پاکستان بلوچ راج ءَ پروش داتگ ءُ پاکستان حکومت ءِ دست گوں سرمچاراں نہ رس اِیت پمیشکا چُکّانی سر ءَ وتی زُلم ءُ زُوراکیاں کنگ ءَ کنگ ءَ اِنت ۔
وھدے کہ ھِندوستان ءَ آزادی ءِ جنگ گوں جوش ءُ تْرندی ءَ دیم ءَ رَوگ ءَ بیت گُڑا انگریز لس مھلوک ء سر ءَ وتی زُلم ءُ زُوراکی گیش کُرت، چی ءَ کہ انگریز ءِ دست چو پاکستان ءِ حکومت ءِ داب ءَ گوں ھِندوستان ءِ جُھد کاراں نَہ رس اِت پمیشکا وتی زُلم لس مھلوک ءِ سر ءَ کُرت۔ مرچی ھمے وڑ ءَ بلوچ جُھد گوں جوش ءُ تْرندی ءَ دیم ءَ روگ ءَ اِنت پاکستان ءِ دست گوں بلوچ سرمچاراں نہ رس اِیت نوں لس بلوچ مھلوک ءَ شھید ءُ زندان ءَ بندی کنت۔ پاکستان ء اے زُلم گوں بنگلہ دیش ءِ مھلوک ءِ سر ءَ کُُرت۔ سِی لکّ ءَ گیش مھلوک شھید کُرتگ، بلے اے شھیدانی ھونان رنگ آرت ءُ بنگلہ دیش آزاد بوت۔ پمیشکا من گْوش آں پاکستان ءِ حکومت اے آزادی ءِ جزبہ ءَ سرپد نہ بیت ، بلے پاکستان بائِدیں بنگلہ دیش ءِ جنگ ءَ چِہ سبکّ بَزورِ اِیت ءُ بلوچ ءِ آزادی ءِ پلسپہ ءَ سرپد بِہ بیت انگت پاکستان ءِ واستا گھتر بیت ، اگاں نا راجی جُھدانی دارگ آسان نہ اِنت۔ چوش کہ پہ مَردُمانی شھید کنگ ءَ جُھد ھتم نہ بیت ، بلکیں جُھد گیشتر مُھکم ءُ پہ دژمن ءَ آس جوڑ بیت۔ پاکستان چینچو کہ زُلم ءُ زُوراکی کنت بلوچ راج ءِ سر ءَ ، بزاں آ ھمینچو وت ءَ نُکسان دَیَگ ءَ اِنت ، چی ءَ کہ بلوچ راج ءَ گوں وتی سرڈگار ءَ اھد کُتگ اے جُھد ءَ داں مِنزل ءَ سر کناں داں منی ڈیھ پہ مُجّتی آجو بِہ بیت ءُ اِیمنی ءِ کَوش ھر چار کُنڈاں بِہ کشّ اِیت۔
