مشین – آزمانکار۔ زیمر بلوچ

آزمانک

آ گوربام ءَ پاد اتک گشان ءِ لمب سرجاہ ءِ چیر ءَ چہ کش اِت چماناں لتاران ءَ چُل ءِ نیمگ ءَ شُت۔چاہی لوھیگ ئِے شُشت ساپ کت، کُڈّک ءِ کش ءَ بگلے دار زُرت ءُ چُل ءَ پُترت۔ آس روک کت ءُ چاہ پِر کت۔ کوپ شُشت اَنت بالٹین ءَ کت اَنت۔ تال زُرت آرت تر ءِ کت، داں چاہ لھڑ بوتاں۔ آئی ءَ شکر ءُ چاہی تاک کت ءُ ترماس ءَ ایرشانت۔۔۔۔۔۔۔۔۔۔۔۔
جُرّیں کوپے ءَ پہ وت ءَ چاہے کش اِت نان ءِ پچگ ءَ لگ اِت۔ کُڈّک ءِ گیشیں دوتاں آ کور کُتگ اَت، چمانی ارس دم پہ ساھت یلہ بوت اَنت۔ آئی ءَ گشان ءِ لمب ءِ سر ءَ ارس پھکّ کنان کت اَنت، نان پتّک اَنت۔
روچ درائی ءَ آئی ءَ نان ءِ پچگ ھلاس کت کمو ترْاِت ءُ جیڑ اِت مردم بہ تتکیں لوگ ءَ چہ شر اَت اِینچوکہ من اے سانکلاں چہ آجو بوتگ اَت آں۔ بلے چوں در بیا آں برو آں، کئی گوْر ءَ برو آں۔۔۔۔۔۔۔۔۔۔۔۔۔
تو منی گُد اِستری نہ کتگ اَنت، باھڈ ءِ توار ءَ گوں آ ھیالاں در اَتک۔
اناں استری نہ بوتاں من گشت اِستری ئِےکناں لین شتاں، آئی ءَ پہ تُرسے جواب دات ءُ چُل ءَ پُتّرت۔
شریں بیا اِستری ئِے کن، ترا قرآن بِجنت تو مُدام ہمے وڈ ئے ترا اگاں من نہ کُشت۔
آ بان ءَ پُترّت پیتی ءَ چہ جوڑے گُد کش اِت مُسّلہ چیر گیتک اِستری ءَ شرو بوت کہ آ پت ءَ توار کت۔ ۔۔۔۔۔۔۔۔۔
بیا ھیکاں پچ من ءَ بازار ءَ روگی اِنت زوت کن۔
ابّا من باھڈ ءِ گُداں اِستری کنئگ ءَ اوں۔ کُشت شما مارا۔ آئی ءَ جُھلیں توار ءُ بیزاریں گالوارے ءَ گشت۔
تو ڑے بیا ھِیکاں پچ کہ من گُداں اِستری کنئگ ءَ اوں۔ آ زاناں کجا روت آئی ءَ چے کار است بید ءِ کُچکانی پادگانی پُروشگ ءَ۔ تو سک ہم جواب ئے ترا من گندگ ءَ اوں، پت ءَ آ ھکّل کت۔
آئی ءَ اِستری ءِ بٹن دستانی زور ءَ بند کت شت چُل ءَ ھِیک پتک اَنت، دو نان تیچ ءَ کت، ھِیک سر ءَ دات اَنت گوں ترماسے چاہ ءَ پت ءَ را دات اَنت۔
گُد اِستری دات اَنت ھانجگ کت اَنت ایر کت اَنت۔۔۔۔۔۔۔۔۔۔۔۔۔۔۔۔
او جنے بیا کہ نل اتکگ درپاں زور بیا۔ مات ءَ آئی ءَ را گوانک جت ءُ لوٹ اِت۔
آئی ءَ دِرک بست ڈنّ ءَ درپانانی نزھارگ شرو کت۔ ھپت ءُ ھشت بالٹین زورت شت نل ءِ سر ءَ ۔ ہمساھگانی جنک ھم یک یک ءَ آیان اَت اَنت۔۔۔۔۔۔۔۔۔۔۔
آئی ءَ یک مزنیں بالٹی ے آپ ءَ پُر کت سر ءَ کُت شُت دیم پہ پسیل ءَ ۔ بالٹی ءِ آپ سر ءَ چول جنان اَت اَنت آ تر بوھان اَت پسیل ءَ پُترت بالٹی ھالیگ کت در اتک، چارمی رند ءَ پسیل پُر بوت۔ پدا آئی ءَ دیم کموٹ ءِ پُر کنئگ ءَ دات، داں کموٹ پُر بوت آ یکپارگی میچل بوت۔
آ ہمے کہ بہ نندیت دم ءَ بال ءَ بکنت، ھانی ءِ کالج ءِ سوزیکی ءَ ھارن جت۔
ھانی ءِ زی ئِے گیٹ ءُ آیانی گیٹ دیم پہ دیم اَت اَنت۔
آئی ءَ وتی گیٹ ءِ شم ءَ چہ چم در کت اَنت چار اِت ھانی در اتک، چہ گیٹ ءَ ساپ ءُ سینگار، دیم ءِ کالک آئی ءِ انارک ءِ سر ءَ ایر اَت، بیگ پشت ءَ بڈّ ءَ اَت ءُ دیگہ زنڈیں کتابے دست ءَ سوزیکی ءَ سوار بوت۔
آئی ءَ وتی ءَ سر ءَ سک بد اتک۔ ایشانی جنک وان اَنت کیامت نہ بیت منی وانگ ءَ نزاناں چونیں کہرے کپت۔ ھُدا ءَ من پہ اے زند ءَ پیداک مہ کتیں۔۔۔۔۔۔۔۔۔۔
او بیا بوٹاں سپا کن۔ باھڈ ءَ آ توار کت۔
آئی ءَ توار پچ نہ دات ءُ پاد اتک، بان ءَ بوٹ چست کت اَنت۔ گشان ءِ لمبے آپ جت ءُ بوٹاناں ساپ کت دروازگ ءِ چوکاٹ ءَ چیر ایر کت اَنت۔
چُل ءَ رزان پہ دیم کپتگ اَت اَنت۔ آئی ءَ رزان یک یک ءَ چنان کت اَنت۔ کُنڈا زورت شت چات ءِ سر ءَ ایران مُشت اَت اَنت پُرشتگیں تہت ءِ سر ءَ تاپ ءَ دات اَنت۔
روچ پِسّانی بُنجاہ ءَ پُترت، آئی ءَ پس یل ءَ دات اَنت، روپگ زورت پسانی لِڑ روپت اَنت ٹین ءَ کت اَنت۔ درآیگ ءَ آئی ءِ گُشان دارے ءَ چانک دات۔ شما زانہ کجا شرتر اِت گیشتر دِر ئِے اے وَ انگت نہ دِرتگ۔ آئی ءَ زد دار ءِ سر ءَ کش اِت اَنت۔
لوگ ءِ پیشگاہ روپت بُچ دیوال ءَ سربر آکوٹ ءِ سر ءَ ریتک اَنت اتک بان ءِ چارک ءَ، اِید ءَ میچل تنسار بوت نشت۔
باھڈ ءَ جان شُشت سر رست، ڈڈیں باڑی اسپرے گوں سینٹے ءَ جت در اتک۔ ہمے ساہت ءَ باھڈ ءَ آئی ءَ را پرمان دات کہ منی آزمان سبزیں گُداں شود اِستری کن۔
ھو شما برو اِت گُداں چل کن اِت بیار اِت من بشوداں شمے گوْر ءَ بدیاں، کہ من واشنگ مشینے آں ناں، آئی ءَ گوں وت ءَ گپ کت۔
آ پاد اتک بان ءِ گردو چست کت اَنت بان رُپت پسیل ءِ گُداناں کش اِت شت چات ءِ سر ءَ کُنڈا دیم ءَ کت پُورائیں لوڑے گُد شُشت تاپ ءَ دات۔ کُنڈا ءِ آپ ریتک اَنت رپّاٹگ ءَ لگت، گش اِت آ پٹ ءُ ملام کنئگ ءَ اَت وت ءَ ۔ اے زند ءَ مرگ انگت گہتر اِنت مردم بہ مِریت چہ اے کہریں ازاباں آجو بیت۔۔۔۔۔۔۔۔۔۔
یک بج لگ اِت آئی ءَ تال زورت آرت تر کت سُبارگ ءِ تیاری ءَ موشکول بوت۔ دمانے ءَ پد آئی ءِ پت اتک آ تچان بوت گیٹ پچ کت۔ پت ءِ پُتّرگ ءَ گوں ھانی ءِ سوزیکی اتک ھانی ایر کت، آ گیٹ ءِ بند کنئگ ءَ پھک بے ھال بوت ھانی روک روک ءَ چار اِت داں گیٹ ءَ شُت اندیم بوت۔
جنے آپے بیار گوں وراں پت ءَ سیکل دیوال ءِ ساھگ ءَ ایر کت کُمبانی کاپر ءِ کش ءَ گوست بان ءَ شُت۔
آئی ءَ گلاس ءِ پل جت آپ پت ءِ دیم ءَ ایر کت در اتک۔
اے وَ گرم اَنت تو برو زرینہ ءِ لوگ ءَ سارتیں آپے پچ گر بیا۔ پت ءَ گلاس ءِ آپ ھیر کت اَنت گشت۔
آئی ءَ ھچ گپ نہ کت شت دیوال ءِ سر ءَ سر کش اِت آپے لوٹ اِت۔
زرینہ ءَ آپ وتی چُک ءَ را دات کہ راوگ ءَ ئے آپ ءَ دست ءَ دۓ گوں، بگش بوتل ءَ را دی اِت شما سک بوتلاں دار اِت۔
آئی سک تور اِت، بلے۔۔۔۔۔۔۔۔۔۔۔۔۔۔
من اگاں پت ءَ بُگشاں سنٹر ءَ وان آں باریں چے گوشیت، من ئِےنہ گشاں مات ءَ گشاں بلے گوشیت اِش۔ آ گوں وت ءَ شور کنان اَت اتک بان ءِ دپ ءَ سر بوت۔ آپ ایر کت، انچو دو دلگ اَت کہ پت ءَ بگوشاں مہ گوشاں، بلے ھچ ئِے نہ گشت در اتک۔۔۔۔۔۔۔۔۔۔۔۔۔۔۔
نان پتک اَنت ناروشت پر کت۔
آئی ءِ مات چُل ءَ اتک وتسر ءَ نانی ڈاکو دست ءَ کت داں آئی ءَ ھال بِد اَنت کہ تئی پت ءَ را کسے ءَ تئی سانگ ءِ واستہ گُشتگ۔
آئی ءَ زانت کہ گپے است۔۔۔۔۔۔۔۔۔۔۔۔۔۔
اماں پت ءَ بُگش من سنٹر ءَ واناں۔ سنٹر ءَ باز زر ھرچ نہ بیت بس گاڑی ءِ باڑہ اَنت۔ آئی ءَ مات ءِ دست گپت پہ کُودکی گشت۔
مات ءَ دست ژپّگ ءَ کش اِت۔ تو گنوک ئے۔ تئی پت ءَ اینچو زر کج اِنت۔ من وَ تئی ھال دیگ ءَ اتک اوں کہ تئی پت ءَ را کسے ءَ تئی سانگ ءِ واستہ گشتگ۔ پت گشیت سکیں شریں مردم اَنت من زورین اِش۔۔۔۔۔۔۔۔۔۔۔۔۔۔۔
آئی ءِ چم در گڈاتاں، اماں من سور مور نہ کناں، کئے بزاں چے بلاے۔۔۔۔۔۔۔۔۔۔
من لوٹاں من بواناں۔ من ءَ وانگ ءَ چہ کش اِت نیشت من دہ ءَ پاس بکن آں۔ آئی ءِ چمانی ارس گُل گُل بوت اَنت لوھیگ ایر کت پُنز بوت نشت۔
مات ئِے ھچ نہ گشت ڈنّ ءَ در اتک۔
پت ءَ بگش من سنٹر ءَ واناں، آئی ءَ ارس پھک کُت اَنت مات گشت۔
مات پھک ھیران بوت نو پت ءَ چوں ءُ چے بُگشاں۔۔۔۔۔۔۔۔۔۔
کترہے ءِ جیڑگ ءَ پد مات ئِے دوبر چُل پُترت پت ءِ ورگ کش اِت اَنت بُرت اَنت۔
من سور مور نہ کناں پت تُری من ءَ بُکشیت، آ کُڈّک ءَ نشت گوں وت ءَ شور کت۔
تئی پت ءَ ونتگ کہ تو وانئے، ترا اگاں من ھلار نہ کت، سک ڈڈ اِنت کہ پت ءِ ھبراں نہ ھبر بیت، اے وڈیں مردم ایشی ءِ واستہ ھجبر نیئت۔۔۔۔۔۔۔۔۔۔۔۔۔ آئی ءِ مات ءَ کہ آئی ءِ پت ءَ را گشت آ سور ءَ تیار نہ اِنت پت ءَ دپ پچلگوشت دات ءُ پلینڑ کت۔
آئی ءِ مات چہ بان ءَ در اتک شت کُڈّک ءَ آ آزتگ اَت نشتگ ءُ گریوگ ءَ اَت۔۔۔۔۔۔۔۔۔۔۔
پت ءَ سر ایر کت وپت، باھڈ اتک آئی ءَ باھڈ ءِ نان کش اِت اَنت دات اَنت۔
ایدگہ اِیران چت اَنت چات ءِ سر ءَ شُودگ ءَ بُرت اَنت۔ اِیرانانی موشگ ءَ آ سرجم وتی ھیالان اَت زھر ءَ پُر۔
سیمہ اتک آئی ءَ را گشت مرچی ماہگُل چہ کراچی ءَ اتکگ مارا لوٹ اِتگ ءُ تئی آرگ ءِ ہم گشتگ ئِے کہ ترا بیاراں گوں۔۔۔۔۔۔۔۔۔
آئی ءَ وتی دیم ءِ کرچک ساپ کت اَنت داں سیمہ ھچ ءَ سرپد مہ بیت۔ شما برو اِت من مرچی اَتک نہ کناں منی سرین سک درد ءَ اِنت زیکین اِنت پِٹّگ ءَ اَنت۔۔۔۔۔۔۔۔۔۔۔
آئی ءَ زانت پت من ءَ نیلیت ھمے ھاتر ءَ دروگ ئِے بست۔
سیمہ ءَ دگہ ھچ زور نہ دات شُت۔
آئی ءَ سک تور اِت، ماہگُل آئی ءِ ہم کلاس اَت کہ کراچی ءَ میڈیکل وانگ ءَ اَت۔
مارا زانہ ڈنّ گردگ کِل اَنت، آ سک تکانسُر اَت، لنٹ کنئگ ءُ رزاناں مُشگ ءَ اَت۔ ہمے دمان ءَ آئی ءَ ھیال کت اگاں من ماہگُل ءَ بُگشاں من لوگ ءَ چہ در کپگ لوٹاں گوں تو کایاں گوں۔ من لوگ ءَ نشت نہ کن آں، من بزگ آں، من اگاں اے ازاباں چہ در نہ اتکاں گڈا بزاں من۔۔۔۔۔۔۔۔۔۔۔۔۔
پدا آئی ءَ ھیال کَروتک اَنت اناں ماہگُل من ءَ داں چینچوک ءَ کُمک کنت۔ آئی ءَ سر ءَ چیا وت ءَ بار بہ کناں۔۔۔۔۔۔۔۔۔۔
شپ ءَ وتی بانزل روچ ءِ سر ءَ زور دات اَنت روچ جل ءَ دیکہ دیان کت ءُ اندیم کت۔ کوراسی ودّ اِت۔
آئی ءَ پس بنجاہ ءَ سر دات اَنت گپت اَنت بست اَنت۔ دان کش اِت اَنت سُہریں ڈال ھوار گیتک اَنت در چت اَنت پر کت اَنت۔
بٹ ءَ را تیار کت۔ درستاں شام کت وتی وڈ ءَ بوت اَنت۔ آئی ءَ تُشے بٹ کش اِت چار لُنکہ ناکامیں دلے وارت۔ درستانی نپاد پچ کت اَنت اتک وتی نپاداں دراج بوت۔
ژندی ءَ ھچ واب نہ شُت بازیں لیٹ ءُ کائی ءَ آ ھیالاں ایر کپت۔ پت چیا چوش کنت، ھو من جنکے آں بلے انسانے آں۔ کسے لوگ ءِ تہا گوں من گپ نہ کنت بس اے بکن آ بکن۔۔۔۔۔۔۔۔۔۔
جیڑان جیڑان ءَ آ واب کپت۔
سہب ءَ لوگ ءِ ہما چوَلوُپگ ہما کار پسانی لڑ، رزان، آپ ءُ اے دگہ تچ ءُ تاگ۔
باھڈ مرچی موٹر تیار اِنت برو بیار ئے۔ چات ءَ کن ئے۔ آئی ءِ پت ءَ باھڈ ءَ را پرمان دات۔
باھڈ ءَ کمو سر چست کت ھو کت، پدا سر ایر کت وپت۔
ساہت دیم ءَ کنزان اَت اَنت، پت ءَ سیکل زُرت ءُ در اتک باھڈ ءَ را روچ ءَ پاد کت۔ ناشتے کت در اتک شُت دیم پہ بازار ءَ۔۔۔۔۔۔۔۔۔۔
آئی ءَ روپگ چت پہ بان ءِ روپگ ءَ سیمہ اتک ءُ سر بوت۔
ماہگُل ءَ تر سلام کت گشی مرچی سے بج ءَ کایاں تئی چارگ ءَ سیمہ ءَ جوڑ ءُ تیاری ءَ پد آ ھال دات۔
آئی ءَ سیمہ ءِ دیم ءَ ھو کت ءُ گشت شریں بلّے کایاں، بلے۔۔۔۔۔۔۔۔۔۔۔۔
بلے باریں پت چون کنت ھبر مہ دنت من ءَ۔۔ باریں چینچو کس اَنت کا یَنت، پیسہ من ءَ گون نیست چوں بہ کناں، چاہے، بسکوٹے ءُ دیگہ۔۔۔۔۔۔۔۔
آ ھیالاں سر ءُ چیر کت، آئی ءَ نہ زانت من چوں بکناں۔
آئی ءَ پیتی ءِ اُرداناں یک یک ءَ پٹّان کت وار ءُ جزائی ھپتاد کلدار در اتک۔ آ پھک ھُشک بوت زر دستاں کت اَنت بلاھیں ساہتے ءَ نشت ءُ زر چار اِت اِنت۔ پدا آئی ءَ پیتی شنگینت بلے۔۔۔۔۔۔۔۔۔۔۔۔۔۔
مرچی من شر پشل باں چوں بہ کناں اے ھپتادیں کلداراں اے شیر ءَ ابید ھچ نہ بنت۔ بس شر اِنت دگہ ھچ راہ نیست۔ آئی ءَ وت ءَ وت تسلّہ دات، بلے دل ءَ سک کپتگ اَت۔
باھڈ ءَ سوبارگ ءَ موٹر آؤرت نانے وارت گُداناں مٹ کت چات ءِ ایرکپگ ءِ وڈ ءَ کت وتارا۔
آئی ءَ نان وارت پہ وت ءَ جوڑاہے گُد گیشینت کہ تیار باں داں ماہگُل ءِ زی بیا اَنت۔
آ باھڈ ءَ توار کت بیا موٹر ءَ مان کناں من چات ءَ ایر کپاں تو پیپ ءُ ویراں بدار گوں۔
آئی ءَ را گش اِت مار ءَ وارت، آئی ءَ اِشتاپ کت پاد اتک کہ زوت زوت ءَ کاراں کناں داں آیانی آیگ ءَ ساری بہ گیشاں۔
باھڈ ءَ مین سُچ بند کت چات ءَ ایر کپت آئی ءَ موٹر داشت آست آست ءَ ایردیان کت پہ واری ایرگیتک۔ باھڈ ءَ توک ءَ موٹر ءُ موٹر فٹبال برابر کت اَنت، ایشی ءَ ڈنّ ءَ ساد ءُ ویئر داشت اَنت۔ گیشیں زوراں آئی ءِ سرین تیرُک جنگ ءَ اَت، بلے پہ زور داں جلدی کار بہ بیت تاں ماہگُل ءِ زی مہ رس اَنت گوں۔
باھڈ ڈنّ ءَ در اتک ساد ءُ ویر دار ءَ بست اَنت، آ تتک جان ءِ شودگ ءَ شُت۔
باھڈ ءَ موٹر ءِ بٹن جت کہ چارن ئے بلے موٹر چالو نہ بوت۔
باھڈ ءَ آ پد ءَ توار کت، بیا موٹر ءَ کشاں چالو بوھگ ءَ نہ اِنت۔
اللّٰہ۔۔۔۔۔۔۔۔۔۔۔۔۔۔، آئی ءِ دپ ءَ انچوش اللّٰہ در اتک انچوشکہ زراب ءَ زراب یکے ءَ سنگے یا کُنٹگے بہ لگیت۔
پت ہمد ءَ نشتگ بنگ ءَ بروت اِنت نہ سُریت اے نو زالبولی کار اَنت، اے بے سُد ءَ ہم کسے پہ اے کار ءِ واستہ نیارتگ گوں آ کُپاناں شت۔
اردُکاں موٹر گپت کش اِت۔ آئی ءَ پیپ دست اَت اوشتاگ اَت ماہگُل ءِ زی گیٹ ءَ پُترت اَنت۔
آ اجالت بوت نہ زانت چوں بکناں، آئی ءَ دل زور دات ءُ گشت باھڈ منی دزگہار اَنت من برو آں۔۔۔۔۔۔۔۔۔۔۔۔۔۔۔۔
ایشی ءَ تئی پت شر کنت گڈا، کمو سبر کن پدا برو۔ آ انچوش ائید ءَ سٹ اَت اوشتگی نہ بوت۔
شما برو اِت بان ءَ بہ نند اِت من کایاں۔ سلام ءَ پد آئی ءَ ماہگُل ءِ زی بان ءِ نیمگ ءَ راہ دات اَنت۔
ماہگُل آئی ءِ گندگ ءَ ھیران بوت۔۔۔۔۔۔۔۔۔۔۔
من نو برو آں، آئی ءَ باھڈ ءَ جست کت۔
برو ءُ بہ مر، پت ءَ توار کن۔
آئی ءَ پت را دیم دات باھڈی دیم ءَ وت شت جلدی جلدی پسیل ءَ سابون ءِ سر ءَ دیم شُشت، آ چِلاں بُرتگ اَت۔ گُدانی مٹ کنئگ ءَ وار آئی ءَ نہ رست انچوش شت بان۔۔۔۔۔۔۔۔۔۔۔۔۔
چون اِت شما جوڑ ءُ وش اِت، بہ بکش اِت کمو دست گٹ بوتگ آں، آئی ءَ جوڑی کت ءُ پہلی لوٹ اِت۔
آ یک دیمے آیاں گوں گپ ءَ اَت ءُ دومی نیمگ ءَ وتی ءُ پاد ءِ لچاں چیر دیگ ءَ اَت کہ چات ءِ سر ءَ لچّتگ اَت اَنت۔
شرّیں شما بہ نند من کایاں، آئی ءِ نیت اَت کہ چاہ ءَ پِر کناں بلے۔۔۔۔۔۔۔۔۔۔۔
جنے بچار ہما لوگ ءَ ویری چُنڈے درتکگ بیار ئِےگوں۔ پت ءَ آ پرمان دات۔
آ دل ءَ کُپان ءَ دیم پہ بان ءَ شت۔ ویر زُرت ءُ در اتک، اتک پت ءَ را دست ءَ دات۔
آئی ءَ ہمے کہ نیت کت رواں چاہ ءَ پر کناں پت ءَ آ برے یک کارے پرمات، آ لبڑّ بچن بیار۔ اے پیپ ءَ گیشین، آ بالٹیناں چست کن چداں۔
آ زد ءَ بش بش ورگ ءَ اَت بلے ھچ گشت ئِے نہ کت کہ دزگہارانی دیم ءَ پت جنت بے عزت کنت۔۔۔۔۔۔۔۔۔۔۔۔۔۔
بلے،بچار ئِے باریں چالو بیت۔ باھڈ ءَ توار دات۔
آئی ءَ بٹن جت موٹر چالو بوت۔
آ تتک دیم پہ چُل ءَ کہ چاہ ءَ جلدی ھڈ کناں داں ماہگُل گوں ھمراہاں درتک آئی ءَ را رکستی ءِ گشت۔
شما بہ نند اِت چاہ پر اِنت، آئی ءَ اجالتیں رنگے ءَ درائینت۔
نہ ما راوائیں کہ گاڑی نو کیت۔
آ گش اِت زمین ایر بورت، چہ وت ءَ سک ملامت بوت، آئی ءَ زنڈیں ساہتے ءَ چم بند کت اَنت پدا دیم گوں چات ءَ دات گشت، من ءَ زندگی بس اِنت، من تئی باھوٹ آں۔۔۔۔۔۔۔۔۔
پت ءَ ژِمبگ ءِ توار ءَ گوں سر کش چار اِت چات ءِ سر ءَ آئی ءِ گشان ءُ چمپل کپتگ اَنت جند گار اِنت۔۔۔۔۔۔۔۔۔۔