بلوچستان کے علاقے خضدار میں پاکستانی فورسز نے ایک نوجوان کوحراست میں لیکر جبری طور پر لاپتہ کردیا ہے جبکہ ضلع کیچ کے علاقے بلیدہ سے گولیوں سے ایک چھلنی نعش برآمد ہوئی ہے ۔
فورسز نے خضدار شہر کے وحید شاہ چوک سے رحمت اللہ ولد عبدالکریم بڈانی کو حراست میں لے لیا، جس کے بعد سے وہ لاپتہ ہیں۔
رحمت اللہ، جو زہری کے رہائشی ہیں، اپنے رشتہ داروں سے ملنے خضدار آئے ہوئے تھے، دو گاڑیوں میں سوار اہلکاروں نے انہیں اغواء کر لیا۔
اہل خانہ کا کہنا ہے کہ واقعے کے بعد مقامی تھانے میں ایف آئی آر درج کرانے کی کوششوں کو بھی پولیس نے مسترد کر دیا ہے۔
دوسری جانب ضلع کیچ کے علاقے بلیدہ گردانک سے ایک شخص کی لاش برآمد ہوئی ہے۔
لیویز ذرائع کے مطابق مقتول کو فائرنگ کر کے قتل کیا گیا تھا۔
تاحال لاش کی شناخت نہیں ہو سکی، جبکہ مقامی انتظامیہ نے لاش کو ضروری کارروائی کے لیے ہسپتال منتقل کر دیا ہے۔
