بلوچستان لبریشن فرنٹ کے ترجما ن میجر گہرام بلوچ نے میڈیا کو جاری کردہ اپنے ایک پریس ریلیز میں کہا ہے کہ تمپ میں پاکستانی فوج اور مند میں ملٹری انٹیلی جنس اہلکاروں کو دو الگ الگ حملوں میں نشانہ بنا کر 5 اہلکاروں کو ہلاک کیا ہے۔
ترجمان نے کہا ہے کہ تیس مئی کو بلوچستان لبریشن فرنٹ (بی ایل ایف) کے سرمچاروں نے شام 6 بجے کیچ کے علاقہ تمپ کے مقام ملانٹ میں قابض پاکستانی فوج کے ایک عسکری کیمپ کو تین مختلف اطراف سے راکٹ لانچرز، گرنیڈ لانچرز اور بھاری ہتھیاروں سے مؤثر طور پر نشانہ بنایا۔ حملہ طویل دورانیے تک جاری رہا، جس کے دوران سرمچاروں نے کیمپ کے حفاظتی مورچوں پر تعینات دشمن فورسز کے تین اہلکاروں کو ہلاک کر دیا۔ کارروائی کے دوران کیمپ کے نگرانی (سرویلنس) نظام کو بھی مؤثر طریقے سے تباہ کیا گیا۔ حملے کے بعد سرمچاروں نے علاقے میں گشت کیا، مقامی آبادی سے ملاقات کی اور خطاب بھی کیا۔
انہوںنے کہا کہ اسی روز، شام 7 بجے کے قریب ایک علیحدہ کارروائی میں، مند کے علاقہ سورو بازار میں قائم ملٹری انٹیلی جنس کے دفتر کی چھت پر موجود دو اہلکاروں کو بی ایل ایف کی اسنائپر ٹیکٹیکل ٹیم (ایس ٹی ٹی) نے ہدف بنا کر نشانہ بنایا، جس کے نتیجے میں دونوں اہلکار موقع پر ہی ہلاک ہو گئے۔
ان کا کہنا تھا کہ بی ایل ایف ان دونوں حملوں کی ذمہ داری قبول کرتی ہے اور اس عزم کا اعادہ کرتی ہے کہ آزاد بلوچستان کے حصول تک عسکری کیمپ، عسکری تنصیبات، عسکری منصوبے، انٹیلیجنس اہلکار اور ان کے آلہ کار ہمارے سرمچاروں کے نشانے پر ہونگے۔
