انڈیا کی وزارتِ داخلہ نے تمام ریاستوں اور مرکز کے زیر انتظام علاقوں کی انتظامیہ کو 7 مئی کو شہری دفاع (سول ڈیفنس) کی مشقوں کا حکم دیا ہے۔ 22 اپریل کو انڈیا کے زیرِ انتظام کشمیر کے علاقے پہلگام میں حملے کے بعد انڈیا اور پاکستان کے درمیان بڑھتی کشیدگی کے تناظر میں اسے کافی اہمیت دی جا رہی ہے۔
وزارت داخلہ کے جنرل فائر سروس، سول ڈیفنس اور ہوم گارڈ اور سول ڈیفنس ڈائریکٹوریٹ جنرل کی جانب سے یہ ہدایت 5 مئی کو تمام ریاستوں اور مرکز کے زیر انتظام علاقوں کے چیف سکریٹریوں کو بھیجی گئی ہے۔
انڈیا کے شہری دفاع کے قوانین کے مطابق، وزارت داخلہ کو ریاستوں کو اس طرح کی فرضی مشقیں کرنے کی ہدایات جاری کرنے کا اختیار حاصل ہے۔
ان مشقوں میں یہ جانچنے کی کوشش کی جاتی ہے کہ جنگ یا قدرتی آفات جیسی کسی ہنگامی صورتحال سے نمٹنے کے لیے شہری دفاع کے ادارے کتنے تیار ہیں۔
وزارت داخلہ کی جانب سے بھیجے گئے خط کے مطابق 7 مئی کو ہونے والی سول ڈیفینس کی ڈرلز کے دوران کئی طرح کی مشقیں کی جائیں گی۔ ان کی مدد سے یہ جانچنے کی کوشش کی جائے گی کہ فضائی حملے کی وارننگ کا نظام کتنا موثر ہے اور ہنگامی صورتحال سے نمٹنے کے لیے قائم کنٹرول روم کا نظام کیسے چلایا جائے گا۔ اس کے علاوہ عام افراد اور طلبا کو اس صورتحال کے دوران امدادی کاموں کی تربیت فراہم کی جائے گی۔
ان مشقوں کے دوران لوگوں کو اپنے گھروں یا اداروں کی تمام لائٹس کو کچھ دیر کے لیے مکمل طور پر بند کر کے بلیک آؤٹ کی ہدایت بھی کی جا سکتی ہے۔
یاد رہے کہ گذشتہ ماہ کے آخر میں پاکستان کے زیرِ انتظام کشمیر کے دارالحکومت مظفرآباد میں شہری دفاع کے محکمے نے ممکنہ جنگی حالات سے نمٹنے کے لیے مختلف تعلیمی اداروں میں طلبا زندگیاں بچانے کی تربیت دینے کے سلسلے کا آغاز کر دیا تھا۔
اس تربیتی پروگرام میں ابتدائی طبی امداد، پناہ گاہوں کا استعمال اور بمباری یا گولہ باری کے دوران حفاظتی تدابیر سے متعلق بتایا گیا۔
