بلوچستان کے ضلع کیچ کے علاقے تمپ میں ایک نوجوان کو فائرنگ کر کے قتل کردیا گیاجبکہ تربت شہر سے پاکستانی فورسز کے ہاتھوں جبری گمشدگی کے شکار 2 نوجوان بازیاب ہوکر گھر پہنچ گئے۔
تمپ سے آمدہ اطلاعات کے مطابق نامعلوم مسلح افراد نے ایک نوجوان کو فائرنگ کرکے قتل کردیا۔
مقتول کی شناخت احسان شوکت کے نام سے ہوگئی ہے۔
ذرائع کے مطابق قتل کا یہ واقعہ آج اتوار کی صبح ساڑھے گیارہ بجے پیش آیا ہے۔
ذرائع کا کہنا ہے کہ مقتول اپنے دکان پر بیٹھا تھا کہ موٹر سائیکل پرسوار 2مسلح افراد نے آکر فائرنگ کرکے اسے قتل کردیا۔
مقامی ذرائع کے مطابق مقتول ماضی میں پاکستانی فورسز کے ہاتھوں جبری طور پر لاپتہ ہو چکے تھے اور بعد ازاں بازیاب ہوئے تھے۔
دوسری جانب تربت سے جبری گمشدگی کے شکار 2 نوجوان بازیاب ہوکر اپنے گھر پہنچ گئے۔
دونوں نوجوانوں کی شناخت خدابخش ولد مرید سکنہ بالگتر کیلکور اور عاقل ولد جمعہ سکنہ شاہ آباد آپسر کے نام سے ہوگئی ہے ۔
خاندانی ذرائع نے دونوں کی بازیابی کی تصدیق کی ہے۔
مذکورہ دونوں نوجوانوں کو5 روز قبل جبری گمشدگی کا نشانہ بنایا گیا تھا اور انہیں گذشتہ شب چھوڑ دیا گیا ہے۔
