من مُدام کہ چہ وتی گِس ءَ در کپتگ آں گُڑا چم پہ مرزبُوم ءِ زید ءُ کھچر ، سبز ءُ آباتیں ڈگاراں کپتگ اَنت۔۔۔۔۔۔باتِن ءِ دِیوانگیں مَرد ھزار وار سیراپ بوتگ ، چی ءَ کہ ھیالانی جھان ءَ من وت ءَ اِیشانی ھُدابُند گْوشتگ ۔ چو نہ زانتگ کہ مئیگ اَنت ، بلے گوں ریزاں بستگ اَنت۔ دانکہ چہ ریزاں لگُوشک مہ بَہ اَنت۔۔۔۔گُڑا اے واب کدی مانا نہ بیت کہ تو جِند ءِ ڈگار ءِ دامُن ءَ سارتیں گینّسارتے بِہ کش ئِے۔۔۔۔۔۔۔۔۔۔
پمیشکا! اے ھبر کدی شموشگ ءُ بے ھیال کنگ نہ بیت ، کُجام وھد ءَ من گوں تھنائی ءَ ھیالانی جنگ ءَ بنا کن آں لھتیں اکس من ءَ چاگِرد کنت ءُ جیڑگ پرما اِیت۔۔۔۔۔۔۔۔۔۔۔۔۔
چوناھی ءَ من وت یک انچیں گِدانے ءِ ساھگ ءَ سر چِست کُتگ گُڑا زِند ءِ مستِریں اڑاند کہ منی پاداں اِشکیل ءُ دیم ءَ میلانک بوتگ۔۔۔۔۔۔نیزگاری۔۔۔۔۔۔۔۔۔۔۔
من کدی نہ پھم اِتگ کہ نیزگاری ءِ اے ساد پرچا مئے گْور ءَ لوپ اِنت۔۔۔۔۔۔۔۔۔۔، بس مُدام چہ بلّی ءِ زُوان ءَ ھمے ھبر گُوشاں کپتگ کہ اے نیزگاری ھاوند ءَ مئے نسیب ءُ تالِہ ءَ نبشتگ کُتگ ، پمیشکا ” نبشتہ گُزشتہ نہ بیت ” ۔ گُڑا مئے ھم جیڑگ ءُ مارِشتانی مَھری ءَ وت ءَ دیم ءَ گامینت نہ کُتگ ءُ اے گپّ ءِ سر ءَ سِتک کُتگ ، چی ءَ کہ مئے چاگِرد ءَ اے ھبر ءِ سر ءَ بے سِتکی زنڈیں گُناھے زانگ بوتگ۔۔۔۔۔۔۔۔۔۔۔۔
وھد مَدان مَدان ءَ دیم ءَ کِنزان اَت کہ من سُھب ءِ سر ءَ چہ گِس ءَ کوپے چاہ گوں سِرتگیں نگنے ءَ وارت ءُ چو مُدامگیں وڑ ءَ بلوچی وانگی یے زُرت ءُ دیم پہ ڈگارانی سیل ءُ سواد ءَ درکپت آں۔۔۔۔۔۔۔۔۔۔۔۔۔
کلیر ءِ موسم اَت ، گِند آں لھتیں زھگانی شور ءُ شار ، جاک ءُ جیک ءِ توار اِنت ، من زانت اے پہ کلیر ءِ چِنّگ ءَ اتکگ اَنت ۔ من آستے آستے ھمے زھگانی نیمگ ءَ روان اِت آں ، وھدے من اِیشانی کِرّ ءَ سر بوت آں چاراں یک زھگے ءِ پوشاکاناں چو منی وڑ ءَ نَود ءُ نُھ اگّڑ مانداتگ۔۔۔۔۔۔۔۔۔۔۔۔۔۔۔۔
چونائی ءَ کُلّیں زھگ یکیں داب ءَ اِت اَنت ، بلے اے یکیں چہ دْرستاں جُتا ءُ گِستا اَت۔۔۔۔۔۔۔۔۔۔۔۔ ، اِیشاں من ءَ دیست کمّیں اجکّا بوت اَنت۔۔۔۔۔۔۔۔۔۔
من ساھتے ءِ چارگ ءَ پد چہ ھمے زھگ ءَ پول کُت تئی نام کَے اِنت۔۔۔۔۔۔۔۔۔۔۔۔؟
پہ اجکّھی زھگ ءَ پسّو دات ءُ گْوشت، منی نام باھوٹ اِنت۔
من دوبر جُست کُت ، تو کئی چُکّ ئے۔۔۔۔۔؟
من سنگین ئے
تئی پِت ءِ نام کَے اِنت۔۔۔۔۔؟
ھُدابکش
تو مکتب ءَ وانگ ءَ ئے۔۔۔۔؟
اِنّا
پرچا وانگ ءَ نہ ئے۔۔۔۔؟
پِسّ ءَ گْوشتگ پہ وانگ ءَ زر لوٹ اِیت۔۔۔۔۔۔۔۔، زر نیست وتی پساں چارین۔۔۔۔۔۔۔۔۔۔۔
شُمئے زان ءَ چینچو پس اَنت۔۔۔۔۔۔؟
چار
اے دہ ءُ چاریں پس شُمئیگ انت۔۔۔۔۔۔؟؟
کُلّیں زھگاں ھواری ءَ پسّو دات۔۔۔۔۔۔۔۔، ھو! اے مئیگ اَنت۔۔۔۔۔
شُما ھم وانگ ءَ نہ اِت۔۔۔۔۔؟؟
کُلّاں ھوری ءَ پسّہ دات۔۔۔۔۔۔۔، ھاں۔۔۔۔۔۔۔۔
من گْوشت شُما بِہ وان اِت ، وتی پِتاں بِہ گْوش اِت ما واناں ۔ پد ءَ کُلّانی پسّو باھوٹ ءِ بوت کہ پِت ءَ گْوشتگ ” پہ وانگ ءَ زر لوٹ اِیت ، زر نیست وتی پسّاں چارین ” اِت ۔
من چرئے زھگانی گِندگ ءَ پد واتر دیم پہ گِس ءَ دات ، ھمے جیڑگ جیڑگ ءِ ریس ءُ پرّیس ءَ من گِس ءَ سر بوت آں ءُ تِچک ءَ وتی کُڈُک ءَ شُت آں۔۔۔۔۔۔۔۔
سواس کش اِت آں ءُ بالشت ءَ تِکّو (تِکہ) دات ءُ جیڑگانی زِر ءَ اُوژناگ اِت آں کہ منی ھم تبکّ ءُ دِلدوستیں سنگت دِلدار اتک ءُ دْروتی بوت۔۔۔۔۔۔۔۔
من کہ سر چِست کُت چاراں دِلدار ءَ ھم وانگی یے دست ءَ پہ پُرشتگیں بِچکندے گِس دپ ءَ اُوشتاتگ۔۔۔۔۔۔۔۔
من پہ ھلاھُوشی دْروت ءِ پسّو نہ دات ءُ گْوشت ، بیا دِلدار جان بیا۔۔۔۔۔۔۔۔۔
من پرے ھاتر ءَ اجکّھی اِت آں کہ دِلدار منی جیڑگانی سِستگ ءُ ڈکّیں بندیکّ ءِ سر ءَ سرپد مہ بیت۔۔۔۔۔۔۔۔۔۔، بلے دِلدار ءَ منی اے ھلاھُوشی پھم اِتگ اَت کہ منی جیڑگ ءُ ھیالانی بوجیگ زِر ءِ کُجام گْورم ءَ مَیل کنگ ءَ اِنت۔۔۔۔۔۔۔۔۔۔۔
بزاں دِلدار ھم ھمے گْوات ءَ گْور جتگ ءُ پمّن پیداک اِنت دانکہ وتی ھیال ءُ زِرد ءِ لھڑیں پاھاراں گوں من درشان بِہ کنت ءُ ساھتے اِیمن بِہ بیت۔۔۔۔۔۔۔۔۔۔۔۔۔۔،
چی ءَ کہ دِلدار ءَ منی سر ءَ اُوست ءُ باور اَت۔۔۔۔۔۔۔ پمیشکا آئی ءَ وتی ھر نگیگیں جاورھالانی بابت ءَ من ءَ یک رازدارے ءِ داب ءَ سرپد کُت۔۔۔۔۔۔۔۔۔۔
بلے! اے روچی من گوں وت ءَ ملار اِت آں۔۔۔۔۔۔۔۔۔۔۔، پرے ھاتر ءَ من نہ پھم اِت کہ دِلدار ھم منی رنگیں جاورے یے دیمپان اِنت۔۔۔۔۔۔۔
دِلدار کُڈُک ءَ پُتِرت ءُ منی دیم پہ دیمی ءَ نِشت ، من کہ چم پہ دِلدار ءِ دْروشم ءَ شانک دات اَنت۔۔۔۔چاراں دِلدار ءَ ھم مُلوری یے ءَ انگرّ کُتگ۔۔۔۔بلے اے بِچکند دِلدار ءَ پہ زُور لُنٹاں کماتگ۔۔۔۔۔
ساھتے گوں وت ءَ جیڑگ ءَ پد من ءَ موہ رست کہ چہ دِلدار ءِ جُست ءُ پُرس کنگ ءَ پیسر۔۔۔تو آئی ءَ جُست بِہ کن باریں چے جیڑھے ءَ دِلدار مان پتاتگ کہ دِلدار ءِ پُربچکندیں دپ ءِ شھدیں بِچکند پُرشتگ ءُ چو کانچ ءَ ٹُکّرٹُکُّر اِنت۔۔۔۔۔۔۔۔۔۔
من شاکارگے جت ءُ پُرس اِت ، ھاں دِلدار۔۔۔۔۔۔!
ھالاں دے تو مرچی چو ابیتک ابیتک ئے ، ھَیر اِنت۔۔۔۔۔۔۔؟؟
چاراں دِلدار گیش لپرزگ ءُ چو کماش سِنگُو ( سِنگُو مئے میتگ ءِ کبرجن اَت ءُ زُبانے چچّ اَت ) ءَ مُکّگ ءَ لگ اِت ۔
ھمے مُکّگ مُکّگ ءِ تہ ءَ من پھم اِت کہ دِلدار الم گوں نگیگیں جاورے ءَ دیمپان اِنت ، اگاں نا دِلدار ءَ کدی چو نہ مُکّ اِتگ ، من پد ءَ درّائینت۔۔۔۔۔۔۔ھاں تو گپ جن ھبر ءِ جِند چی اِنت۔۔۔۔۔؟؟
دِلدار ءَ گوں ھمے مُکّگ مُکّگ ءَ گْوشت ، بھادین میتگ ءَ نوکیں گپّے شِنگ ءُ تالان اِنت کہ گْور دیم ءَ تپتگیں جونے کپتگ تانسر ءَ تپس اِتگ ءُ کِرم اِنت ، بو ءُ بھار نزّیک ءَ گْوزگ نیل اِیت ۔ میتگ ءِ تیوگیں مھلوک شُتگ دیم پہ جون ءِ نیمگ ءَ۔۔۔۔من تئی ودار ءَ نِشتگ آں دانکہ تو بِیائے۔۔۔۔۔من ءُ تو ھوری ءَ رَو اِیں۔۔۔۔۔۔۔۔
باریں اے تپتگیں جون کُجام مات ءِ لاڑیں بچّ ءُ کُجام زھگ ءِ۔۔۔۔۔۔۔کُجام گْوھار ءِ۔۔۔۔۔۔۔۔۔۔۔۔کُجام زال ءِ سالونکیں جود بیت۔۔۔۔۔۔۔۔
گوں دِلدار ءِ اے ھبر ءَ منی نِزوریں کُوپگانی بار گیش ودّ اِت ءُ ھیالانی روتاک ءَ نوکیں گمے نبشتگ بوت ، چاراں دِلدار پہ بیوانکی ھمے ودار ءَ اِنت کہ بھادین پہ رَوَگ ءَ کد جاڑِیگ بیت۔۔۔۔۔
بلے من اے ھم پھم اِت کہ دِلدار منی ابیتکی ءِ بارو ءَ ھِچّ پِگر ءَ نہ اَت ، بس آ گوں تپتگیں جون ءِ ھیالاں گوں وت اَت۔۔۔۔۔۔۔
ھمے جن ءُ مانجن ءِ تہ ءَ من وتی گْوھار ھوران ءَ توار جت ءُ گْوشت کہ سارتیں آپے بِیار کہ تُنّ ءَ پُروشاں ، ھوران ءَ آپ آرت ءُ من گوں دِلدار ءَ گِلاسے گِلاسے آپ تِنگ اِت ءُ دیم پہ گور دیم ءَ تپتگیں جون ءِ نیمگ ءَ۔۔۔۔۔۔۔۔۔۔۔۔
ما گوں ھمے ھیالاں جنان ءُ پُروشان باریں کئی لاش بیت ، مرچی آس کُجام کُل ءُ کرگین ءَ ماندار اِیت۔۔۔۔۔۔۔، کُجام زھگاں چورہ کنت۔۔۔۔۔۔، کُجام ھزار اُمیتں دِل ءَ سْیاھیں پوشاک پوش اِیت۔۔۔۔۔۔۔، کُجام مات ءِ دِل ءَ چیر ء جلّاں کنت۔۔۔۔۔۔۔، کُجام گْوھار ءِ زِرد ءَ تْراول کنت۔۔۔۔۔۔۔
گوں ھمے جیڑگ ءُ سَوڑگاں وھدے ما گْوردیم ءَ جون ءِ نزّیک ءَ سر بوت اِیں چاراں تیوگیں ھلک جُمب اِتگ ءُ جون اِش گوں شالے ءَ مانپُوشتگ ، بلے بو ءُ بھار سگّگ ءِ وڑ ءَ نہ اَت۔۔۔۔۔ھرکس ءَ دبوکہ بستگ اَت گوں یکّے دومی ءَ گُوش ماں گُوش اَت ۔ من ھم گوں دِلدار ءَ شُت آں جُگر ءِ ساھگ ءَ نِشت آں ھما الوتاناں دُوبر شِنگینت کہ باریں کَے بیت ءُ کُجام گِس مرچی گوں ارساں شام کنت ۔ ما نِشتگ اِت اِیں کہ چہ پُشتی نیمگ ءَ پادبرمشے مئے نیمگ ءَ پیداک اِنت ، من چک جت چاراں بی ایس او ءِ نام ءَ ، نام کپتگیں مئے میتگ ءِ سنگت کامریڈ نود بندگ اِنت ۔ وھدے نود بندگ نزّیک بوت گُڑا من گوں دِلدار ءَ کامریڈ ءِ دیم ءَ پاد اتک اِیں ءُ وش آتک کُت ۔ چہ سلام ءُ دْروت ءَ پد من چہ کامریڈ ءَ پُول کُت ، ھال کن کامریڈ اے تپتگیں جون کئییگ اِنت باریں ؟
کامریڈ ءَ پہ تھلیں بِچکندے پسّو دات ءُ گْوشت ، دِگہ کَے بیت بھادین جان ، ھمے بلوچ ءِ بچّ اِنت کہ جِند ءِ ڈگار ءِ سر ءَ ھرجاہ آھگی ھڈّ ءُ کامپُولیں جون تالان اِنت ، دِگہ باریں چُنت ناھار ءُ جنگلی رسترانی دپار بوتگ۔۔۔۔۔۔۔، دِگہ چُنت بے گور ءُ کپن بیت۔۔۔۔۔، دنیگت ھِچ نہ بوتگ ، اے بس جلشکے مئے نِگاھاں شَھم اِتگ ۔ اگاں مرچی! بلوچ راج گوں وتی کوہ مرد ءُ راجی جُھدکارانی ھمراھی ءَ گوں یکمُشتی ءَ پاد بئیت دُژمِن چوشیں گوہ نہ وارت ، بلے نِزُوری مئیگ اِنت کہ کمان تیر نہ بارت۔۔۔۔۔۔، دِگہ کئی گِلگ ءَ بِہ کن اِیں۔ انگت اگاں بلوچ ھوش مہ کنت ءُ راج ءِ ورنا وتی راجی ڈُبّہ ءُ زِمہ واری ءِ پیلو کنگ ءَ ساڑی مہ بَہ اَنت ، باندا مئے زھگ ءُ زالبُول ھم اے زُوراک ءِ دست ءَ بے پردگ بَہ اَنت۔۔۔۔۔۔۔، گُڑا رندے ارمانی بُوَگ کاسگ ءَ کیل نہ کنت۔۔۔۔۔۔
بلکیں دُژمِن ءَ را دُژمِن ءِ زُبان ءَ سرپد کنگی اِنت ، ما بِہ نِند اِیں ءُ بِہ چاریں کہ دُژمِن مئے زار ءُ پِریاتاں ،جاک ءُ کُوکاراں دِلگوش دنت ءُ گُوشدار اِیت۔۔۔۔، نہ بوتگیں ھبرے ۔ ما آ دِگہ راجاں بِہ چار اِیں باریں آیاں پہ وتی راجی جُنز ءَ کُجام دگ ءَ سپر کُتگ کہ باریگ مئے بِہ بیت ، اے کہ سرکار ءِ چانوگر اَنت پہ اِیشاں مئے جُھد ملکموت اِنت ، پمیشکا مرچی آ ھم گوں دُژمِن ءَ ھمگام ءُ ھمراہ اَنت ، بلے مارا وتی تاکت ءُ توان جاہ آرگی اِنت ۔ وھدے ما تِپاک ءُ یکمُشت بوت اِیں ،گُڑا یک دُژمنے نا ، بلکیں ھزار دُژمِن راجی تیلانک ءِ دیم ءَ داشت نہ کنت ۔ بس مارا وتی راجی تاکت چِنگ ءُ نزّارگی اِنت ، پہ اِیشی ءَ ماتیں گُلزمین ءِ تِلائیں سِنگے ھم درد ءُ کولنج اِنت۔ کامریڈ ءِ گپ جاری اَت کہ ناکو ابراھیم ءَ جار جت بلے کماش ءُ ورنایاں ھَے کن اِت شھید ءَ دیم پہ جید ءَ بریں ، من ءُ دِلدار کامریڈ ءِ ھمراھی ءَ چہ جُگر ءِ بُن ءَ پاد اتکیں ءُ گوں مُچّی ءِ ھواری ءَ میّت کُوپگ دات ءُ داں کبرِستان ءَ سر کُت ۔ کبرِستان ءِ سر بُوَگ ءَ ھوار من ءَ ھمے ھیال ءَ انگرّ کُت کہ کامریٖڈ ءَ بِہ گْوش چہ شھید ءِ نِماز جنازہ ءُ کل ءُ کسارت کنگ ءَ پد اے مُچّی ءِ دیم ءَ راجی جُنز ءِ درگت ءَ گُشتانکے بِہ دے دانکہ چار مردُم سرپد بِہ بیت اے تپتگیں جون بے وارس نہ اِنت ۔ من دِلدار گْوانک جت ءُ گْوشت بیا کامریڈ ءَ چاریں کارے ھست ، من ءُ دِلدار ھمے مُچّی ءَ چمشانک دیان اِت اِیں چم پہ کامریڈ ءَ کپت اَنت کہ میتگ ءِ کماش گْوھرام ءَ گوں نِشتگ ءُ تْران ءَ اِنت ۔ من ءُ دِلدار کامریڈ ءِ کِرّ ءَ شُت اِیں ءُ گوں میتگ ءِ کماش ءَ ھم دست ءُ دْروت بوت اِیں ، چہ کماش ءِ دست ءُ دْروتی ءَ رند من کامریڈ ءَ را گْوشت نود بندگ جان بیا کمّو پہ ترا کار اِنت ، کماش ءُ دِلدار دانکہ نِشتگ اَنت ۔
من کامریڈ زُرت ءُ کمّیں گِستا اتکیں الوت کُت ، من گْوشت کامریڈ نہ زاناں تو چے گْوش ئے، بلے منی ھیال ءُ لیکہ ھمیش اِنت کہ چہ شھید ءِ نِماز جنازہ ،کل ءُ کسارت کنگ ءَ رند تو اے مھلوک ءَ کمّیں سرپدی بِہ دے دانکہ مئے مھلوک سرپد بِہ بیت کہ اے تپتگیں جون ماتیں گُلزمین بلوچستان ءِ وارس اِنت ۔
کامریڈ ءَ پہ بِچکند ھو کُت ءُ گْوشت ، شر گْوش ئے بھادین جان ، منی وتی زِرد ءِ واھشت ھمے بوتگ۔۔۔۔بلے تو منی دِل ءِ ھبر کُت ۔گوں اے گپ ءِ گیشّگ ءَ پد من ءُ کامریڈ پد ءَ شُت اِیں کماش ءِ دیوان ءَ ، گوں دیوان ءِ رسگ ءَ ھوار ناکو ابراھیم ءَ پد ءَ جار جت کہ کبر سِنگو جان ءَ تیار کُتگ ، بیا اِت نِماز جنازہ ءَ وانیں کہ شھید چِد ءُ گیش دِیر ایرکنگ نہ بیت ۔ چہ ناکو ابراھیم ءِ جار ءَ پد کماش پاد اتک ءُ چادرے چنڈّ اِت ، گْوشتے بلے ورنایاں نِماز جنازہ ءَ وانیں دانکہ شھید ءِ ارواہ وتی ماتیں گُلزمین ءِ کُٹّ ءَ اِیمن بِہ بیت ءُ پُشپداں سبر ءِ ھمراھی ءَ گْرانیں بارے کُوپگ ءَ کنگ ءِ ھاٹیگے بِہ دنت۔ ما گوں کامریڈ ءِ ھمراھی ءَ آمین کُت ءُ گام پہ نِماز جنازہ ءِ وانگ ءَ دیم ءَ تیلانک دات اَنت ۔ مُلّا ابداللہ ءَ نِماز جنازہ ونت ھما دمان ءَ میّت ماں کبر ءَ اِیر دَیَگ بوت ، من ھمے ساھت ءَ پہ بے تواری ناکو ابراھیم دست ءَ گِپت ءُ گْوشت بِیا ناکو گوں ترا دو گپ گْوش آں ۔ ناکو ابراھیم ءَ ھم پہ شیرکِنیں دانکے گْوشت بلے کُرباناں ، من ءُ ناکو ابراھیم کمّو گِستا اتکیں۔۔۔۔۔۔گُڑا من گْوشت ناکو ھبر چو اے وڑ اِنت کہ چہ کبر ءِ بار دَیَگ ءُ پاتیا ءَ رند تو پہ مھلوک ءَ جارے بجن دانکہ مھلوک سرپد بِہ بیت کہ اے شھید کَے اِنت ، اے درگت ءَ بی ایس او ءِ سنگت کامریڈ نود بندگ مھلوک ءَ پوہ ءُ سرپد کنت کہ اے تپتگیں جون کئیگ اِنت۔۔۔۔۔۔۔۔۔
گوں منی اے گپاں گْوش ئے ناکو ابراھیم ءِ پیشانی تْرِپگ ءَ لگ اِت ءُ انچو پھمگ ءَ اَت کہ تپتگیں جون ءِ بابت ءَ کامریڈ نود بندگ مُچّی ءَ را ھمے سرپدی دنت کہ آئی ءِ جِند ءِ نام ءُ پِت ءِ نام کَے اِنت۔۔۔۔۔کُجام ھند ءُ میتگ ءَ نِشتگ۔
ناکو ابراھیم ءَ پہ گلے ھو کُت ءُ پہ اِشتاپی کبر ءِ نیمگ ءَ شُت ، بلے سک ودارِیگ اَت داں زُوت ءَ زُوت کبر ھاک پِر دَیَگ بِہ بیت ءُ مُلّا گُشاد گُشاد ءَ پاتیایے بِہ وان اِیت دانکہ من مھلوک ءَ اے اھوال ءَ بِہ دے آں کہ اے تپتگیں جون کئیگ اِنت۔۔۔۔۔۔۔۔۔
کبر ءِ ھاک پِر دَیَگ ءَ پد مُلّا ءَ پاتیا ونت۔۔۔۔۔۔انچو ناکو ابراھیم ءَ جار پِرّینت ءُ گْوشت ، دِلگوش منی راج ءِ ورنا ءُ کماشاں ، شرپداریں واجھاں ، من شُمارا دِگہ ھبرے گْوش آں کہ وتی پاداں پہ گِس ءِ رَوَگ ءَ کمّیں مھتل بدار اِت ۔ گوں ناکو ابراھیم ءِ اے جار ءَ چاراں تیوگیں مُچّی ءِ مھلوک اجکّھی ءِ آماچ بوت ، اجکّا پرے ھاتِر ءَ باریں ابراھیم چونیں ھبرے مارا گْوش اِیت۔۔۔ھر یکّے گوں ھیرانیں نِگاھاں ودار ءَ اَت کہ ناکو ابراھیم ءَ دوبر الھان کُت ءُ مھلوک ءَ را گْوشت ، منی واجھاں گپ چو اے وڑ اِنت مئے ءُ شُمئے چُک نود بندگ جان مارا شُمارا سرپد کنت گْوردیم ءِ تپتگیں جون کہ زگریں روچ ءِ بْرانزاں تاپتگ ءُ پاشینتگ، کئی جون اِنت ۔
تیوگیں مھلوک ءَ دِلگوش گْور کُت ءُ کامریڈ نود بندگ مھلوک ءِ دیم ءَ اتک ءُ اُوشتات ، گوں اُوشتاتگ ھوار گْوشگ ءَ لگ اِت
دلگوش منی راج ءِ شرپداریں کماش ءُ ورنایاں!
چہ کُلّاں پیش من گوں اے تپتگیں جون ءِ ھمراھی ءَ ھما کُلّیں شھیداں سُھریں دْروت پیش کن آں کہ آیاں وتی وشیں زِندمان پہ نیزگاریں بلوچ راج ءِ گُلیں باندات ءِ ھاتِر ءَ ندْر کُرتگ ، سلام پہ راج ءِ ھما ملّیں پُسّگاں کہ آ مرچی زِندان ءِ اندر ءَ پرے ھاتِر ءَ گوں سانکلاں بندیگ اَنت دانکہ مئے ءُ شُمے راجی زِندمان گُلامی ءَ بِہ رکّ اِیت ءُ آجو بِہ بیت ۔ سلامے پہ پُلّیں دیوان ءِ مزن مرّیں ورنا ءُ مڑاہ داریں کماشاں کہ آیاں اے تپتگیں جون وتی زھگ سرپد بوتگ ءُ آرتگ ماں کبرِستان ءَ کپن ، کل ءُ کسارت کُتگ ، چی ءَ کہ اے مئے راجی پرز اِنت وتی کد ءُ بالاد ءِ بِستار ءَ گوں وتی راجی جُھدکاراں ھمراہ ءُ ھم کُوپگ بِہ بَہ اِیں ۔
اے تپتگیں جون ما شُما کُلّاں دیستگ کہ آئی ءِ تانسریں بالاد چہ زگریں روچ ءِ گرمی ءَ تپتگ ءُ کِرماں وتی وردن جوڑ کُتگ اَت ، بو ءُ بھار ءَ مارا وتی نزّیک ءَ نیشت ، چمّ گُراگاں کشّ اِتگ اَت اَنت ، دیم ءُ دْروشم یک نیمگے روچ ءِ بْرانزاں انچو تاپتگ اَت ءُ دومی نیمگ ءَ کِرماں چونڈ اِتگ اَت کہ جاہ آرگ نہ بوت ، تو کَے ءُ کُجام میتگ ءِ نِندوکے ئے۔۔۔۔۔؟
بلے! آئی ءِ دودمان ءَ آئی ءِ پجّار کُت کہ آ اے گُلزمین ءِ کُنگُریں بچّ اِنت ، آئی ءِ پجّار گُلیں گُلزمین اِنت ، آئی ءِ پجّار بلوچ راج اِنت ، آئی ءِ سْیاد ءُ وارس اے مُچّی ءِ کُلیں مھلوک اِنت ، گُڑا پمیشکا من پہ پَھر گْوش آں اے تپتگیں جون درآمد نہ اِنت ، بلکیں آ مرچی پہ پَھر ءُ شان وتی ماتیں گُلزمین ءِ کُٹّ ءَ وپتگ ، چی ءَ کہ اے راج ءِ ھما پُسّگ اِنت۔۔۔۔۔۔تھنا پہ وتی میتگ ، ھند ءُ دمگ ءِ واستا جنگے نہ کُتگ ، بلکیں آ پہ تانسریں بلوچستان ءِ آجوئی ءِ واستا جِھدے کُتگ کہ مرچی آئی ءِ کِرم کپتگیں جون مِسکیں ڈگار ءِ دامُن ءَ کپتگ یا چگل دَیَگ بوتگ ۔ آئی ءِ واستا بلوچ ءِ ھر مات آئی ءِ مات بوتگ ، ھر گْوھار آئی ءِ گْوھار ، ھر برات ءُ کماش آئی ءِ کماش ءُ برات بوتگ ۔ من وتی گپّاں گْونڈ گِر آں کہ روچ ءِ بْرانز نوں گیشتر تْرند بُوھان اَنت دانکہ شُما گیش گرمی ءِ دیمپان مہ بَہ اِت ، بلے ! گُڈّی ءَ یک ھبرے من شُمارا الم گْوش آں ، آ ھبر ھمیش اِنت کہ اے گُلزمین ءَ گوں مئے مرگ ءُ زِند پیوند اِنت ، چو مہ بیت کہ ما شُما نشتگیں ءُ درآمد ءَ گُلزمین وتیگ کُتگ ، چی ءَ کہ بے وتنیں راج ءَ را وھدے وتی سرڈگار ءِ سر ءَ کبرے ءِ جاہ نسیب نہ بوت ، گُڑا چہ آ زِند ءَ مرچیگیں مرگ گھتر اِنت دانکہ باندا راجدپتر ءِ تاکاں ، آیوکیں پدریچ ءِ دیم ءَ شِگانیگ نہ بَہ اِیں۔ من وتی گپّاں چہ ھمد ءَ ھلاس کن آں ، آجوئی زِندگ بات ءُ گُلامی مُردگ بات۔۔۔۔۔۔۔۔۔
گوں کامریڈ ءِ گپّانی ھلاسی ءَ پد انچو سما بوت کہ مھلوک ءِ باتِن ءَ نوکیں گمے تیجار بوتگ ، بلے زُبان انگت مھتل اَت کہ ھمے پاھار ءَ درشان بِہ کنت ۔وھدے ما کُلاں دیم پہ میتگ ءَ دات ، گُڑا پد ءَ ھر یکّے گوں یکّے دومی ءَ گپ ءُ الوت کنان ءُ سر جھلاد اَت ۔ من ءُ دِلدار گوں کامریٖٖڈ ءَ ھوار وت ماں وت ءَ گپ جنان اِت اِیں دانکہ مئے گِس نزّیک بوت اَنت ءُ راہ ھم گیشّ اِت اَنت ، گوں راہ ءِ گیشّگ ءَ ھوار ءَ من ءَ کامریٖٖڈ ءَ وار نہ دات ءُ پیسر ءَ گْوشت ، بِراں بھادین جان گوں دِلدار ءَ ھوار منی لوگ ءَ سُبارگے کن اِیں۔۔۔شرّیں نِند ءُ نیادے ھم بیت ۔
چوناھا من ءَ کامریڈ ءِ نِند ءُ نیادانی ھُبّ ھست اَت، بلے گرم ءَ انچو جتگ اَت کہ دِل ءَ نہ گْوشت برو گوں ، پمیشکا من کامریڈ ءَ را گْوشت ، پَھِل کن نود بندگ جان دِل لوٹ اِیت چہ تئی پُرمھریں نیادانی کَیپاں گوں دِلدار جان ءَ تِنگے بِہ گِر آں۔۔۔۔۔بلے گرم ءَ انچو جتگ کہ منی واک ءَ من ءَ دُروھتگ ۔ تو ھمدے الم تئی گْراں بهائیں مھر ءِ پتّر ءَ کا اِیں ، مرچی مارا موکل بِہ دے۔۔۔۔۔۔اگاں مئے گون ءَ کائے مئے چم سرد بنت۔۔۔۔۔۔۔۔۔
کامریٖٖڈ ءَ مارا منّت ءُ لیلا کُت ما کامریڈ ، گُڈّی ءَ ھمے سلاہ بوت کہ ما کامریڈ ءِ پتّر ءَ باندا یا پُونشی الم سرے جن اِیں ۔ چہ رُکست ءَ پد من ءُ دِلدار ٹِلان ءُ کپان دانکہ وتی لوگ ءَ سر بوت اِیں ، گوں سر بُوَگ ءَ ھوار ، ھوران ءَ پیسر ءَ کُڈُک ءِ دپ بُتک من ءُ دِلدار پُتِرت اِیں ۔ من کہ پُتِرت آں۔۔۔۔گوں سواسانی کشّگ ءَ ھوار بالِشتے ءَ تِکہ دات ءُ تچک بوت آں۔۔۔۔۔۔۔۔۔دِلدار ھم کش ءَ نِشت ءُ بالِشت ءَ تِکہ دات ۔ منی دِل ءَ اَت کہ من نوکی ھوران ءَ توارے جناں کہ چہ مشک ءَ سارتیں آپے بِیار کہ سک تُنّیگ آں۔۔۔۔۔۔۔چاراں ھوران ءَ بے گْوانک ءُ توار ءَ وت سارتیں آپے آؤرت ءُ مارا وارینت۔۔۔۔۔۔۔
چہ آپ ءِ ورگ ءَ پد من درّائینت ، باریں ھوران ھال کن سِرتگیں چے ھست کہ مارا گُژن ءَ ھم چکپُروش کُتگ ۔
گُڑا ھوران ءَ پہ پُرمھریں بچکندے پسّو ترّینت ءُ گْوشت ، شر لالا! شُما دانکہ دمے بالا کن اِت من شُمئے ورگاں کاراں ، من ھمد ءَ پہ مشکرا گْوشت۔۔۔۔۔بِہ چار ھورُک من ءَ گُژن ءَ انچو جتگ چہ سبر ءِ کیلو ءَ در کپتگاں ، دِلدار وتیگ ءَ وت زانت ، گوں من گیشیں سبر نہ بیت۔ ھوران ءُ دِلدار ءَ کمّیں منی سر ءَ کند اِت۔۔۔۔۔۔۔پد ءَ ھوران درکپت دیم پہ چُلّ ءَ شُت ، من لھڑیں گرم سگ اِت نہ کُت ءُ وتی جامگ کشّ اِت۔۔۔۔۔دِلدار ءَ گْوشت سک گرم اِنت جامگ ءَ کشّ۔۔۔۔۔۔بیچارگ گرم ءَ ھمپُس ئے۔۔۔۔۔۔۔چاراں دِلدار ءَ سر اِنگُو آنگُو چنڈّینت۔۔۔۔۔۔من زانت لجّ کنگ ءَ اِنت گُڑا گیش زُور پِر نہ دات۔۔۔۔۔۔۔
ھمے دمانُک ءَ پد ھوران ءَ شِیر گوں تاپگی ناناں آؤرت اَنت ، من پد ءَ پہ مشکرا ھوران ءَ گْوشت چوشیں کنجُوسکی مہ کن اِت پاکیں ھاوند وش نہ بیت ۔ اگاں نیزگاری یے اتکگ ھُداے گْوازینّیت۔۔۔۔۔۔۔شِیر کہ دے اِت پہ پیمّاز ءَ کنجُوسکی مہ کن اِت۔۔۔۔۔۔۔۔۔ھاھاھاھاھاھا۔۔۔۔۔ھوران پہ بِشکندان پد ءَ چُلّ ءَ شُت۔۔۔۔۔۔
انچو دِلدار ءَ جھ جت! ترا شِیر ورگی نہ اِنت اِنچو ٹھل ءُ نازے نہ لوٹ اِیت۔۔۔۔۔، بیچارگیں گْوھار ءَ پہ بُن ئِے پیمّاز ءَ دل سْیہ ( سْیاہ ) مہ کن ، من ءَ کندگ ءَ گپت بلے ھوران رس اِت پمیشکا من وتی کندگ اِیر بُرت ءُ گوں شِیر ءُ نانانی مینگ ءَ گُلائیش بوت آں۔۔۔۔۔۔۔۔
چہ ورگ ءَ رند من ھوران پد ءَ گْوانک جت کہ بِیا پرزونگ ءَ چِست کن۔۔۔۔۔۔۔چاراں دِلدار من ءَ زھر زھر ءَ چارگ ءَ اِنت۔۔۔۔بلے ھِچّے نہ گْوشت ، من پھم اِت کہ دِلدار پرچا چو زھر ءَ پُر اِنت۔۔۔۔۔۔۔بلے من کِمار نہ کُت ۔ ھوران پرزونگ گوں ناناں چِست کُت ءُ چُلّ ءَ شُت۔۔۔۔۔۔۔۔، چاراں دِلدار ھم پہ وتی گِس ءِ رَوَگ ءَ ھُدوکی اِنت کہ من بُرواں۔۔۔۔۔۔۔، گُڑا من وار نہ دات ءُ پیسر ءَ گْوشت۔۔۔۔۔۔۔ھاں دِلدار چو سربتگ بُوھان ئے ، بلکیں نان ءُ شِیر وارتگ نوں واب گِران اِنت۔۔۔۔۔۔۔۔بالِشت اِیر اِنت تچک بُو ۔
دِلدار ءَ لھم لھم ءَ پسّو دات نا بھادین جان رو آں کہ مات پریشان بیت۔۔۔۔۔۔بچّ سُھبی چہ گِس ءَ در کپتگ باریں کُجا شُتگ ، بلے بیگاہ ءَ کایاں کہ من ءَ ھمائی ” م ” ءِ درگت ءَ چیزے گپ گوں تو جَنَگی اِنت۔۔۔۔۔۔۔مات ءَ گِر بستگ زمین ءُ آزمان یک بِہ بَہ اِنت ناکو گنج بکش ءِ جِنکّ کہ لائِک ءُ گُد دوچے ، رنگ ءُ دانگ ءَ چہ میتگ ءِ ھِچ کس ءَ کمتِر نہ اِنت۔۔۔۔۔۔۔۔تو بس گْوش ئے وانِندگ ، وانِندگ پمّن مشک آپ نہ کنت ءُ رزان نہ مُش اِیت۔۔۔۔۔۔نیکہ گِس رُوپ اِیت ءُ پس ءُ مالاں دِلگوش کنت۔۔۔۔۔۔شلی ھرچی بِہ بیت منی برازتک اِنت۔۔۔۔منی درد ءُ دور ءَ شریدار اِنت۔۔۔۔۔۔۔۔۔چے بِہ کنت یار۔۔۔۔مردُم!
مئے چاگِرد انگت پدمنتگیں پِگرانی منّوگِر اِنت ، اِد ءَ مھر ءُ دیمروئی وابے کہ انگت واب اِنت۔۔۔۔باریں کدی بُست کنت۔۔۔۔۔۔۔۔!!
من زانت دِلدار ءَ ماھل ءِ مھر ءَ گِرپتار کُتگ ، دومی ماھل مئے میتگ ءِ وانِندگیں جِنکّے اَت۔۔۔۔۔۔۔آشوبی پِگرے یے راجبانُک اَت ۔ آئی ءِ لوٹ مُدام ھمیش اَت کہ مئے مھلوک وتی جِنکّاں مکتب ءَ دیم بِہ دنت دانکہ دُگنیا ءِ دیم ءَ شُتگیں زانت ءُ درس ءَ در بِہ بَر اَنت ءُ وتی پدمنتگیں چاگِرد ءَ رُوژناہ بِہ کن اَنت۔۔۔۔۔۔
من چہ دِلدار ءِ اے لُنٹانی سر ءِ ھبراں باتِن ءِ مارِشت ھم مار اِت کہ دِلدار پرچا گوں ماھل ءَ زِند گْوازینگ ءِ اھد ءُ کَولان اِنت ، چی ءَ کہ دِلدار وت ھم رُوژناہ پِگریں وانِندگے اَت۔۔۔۔۔۔، آئی ءِ لوٹ ھم ھمیش اَت کہ منی زِند ءِ ھمسپر ھم رُوژناہ پِگرے بِہ بیت دانکہ ما ھوری ءَ وتی اے پدمنتگیں چاگِرد ءَ دیمروئی ءِ پوشاکاں گْور ءَ بِہ دے اِیں ءُ گوں وھد ءَ ھمگام بِہ کن اِیں۔۔۔۔۔
پمیشکا منی زُبان ءَ پہ دِلدار ءِ پسّو ءَ یکّیں گپ پشت کپتگ اَت ، شر دِلدار جان۔۔۔۔۔تو بیگاہ ءَ بِیا گُڑا الم سوڑگے کن اِیں۔۔۔۔۔۔ھَیر بیت۔۔۔۔۔وت ءَ دِلوارگ مہ کن ، گوں اے ھبر ءَ ، پد دِلدار ءَ من ءَ رُکست کُت ءُ دیم پہ وتی گِسانی نیمگ ءَ رھادگ بوت۔۔۔۔۔۔۔۔
من بالِشت ءَ تِکہ اِت آں کہ زِرد ءِ ھنکین ءَ رنگرنگیں ھیالانی رُمب ءُ ریچ بِنا بوت ، تپتگیں جون ، زِندان ءِ ساھگ ءَ ودار ءِ سوزمانیں کِسّہ ، پدمنتگیں چاگِرد ، شیشاریں مھر ءِ بِستار ، وتی منی ءِ رُوکیں آس ، زانت ءُ زانگ ءِ لگوشتگیں رنگ ، نیزگاری ءِ تبدیں لِوار ، دِگہ باز بے نامیں سرھال ءَ من ءَ یکپارگی ءَ وتی چنکّاں زُرتگ اَت کہ اے جیڑگانی کلّی وت ءَ کُجا آپ بِہ کنت۔ ھمے دمان ءَ کامریڈ نود بندگ ءِ گُشتانک ءُ تپتگیں جون ءِ اکس منی دیدگاں سھرا بوت۔۔۔۔۔آ دگہ کُلّیں سرھالاں وتی گْرنچ بُتک ءُ واب گِروک جَنَگ ءَ اَت ، ھمے گْرندگ گْرندگ ءَ من۔۔۔۔۔۔۔۔
