زِند ءِ جنگ جاہ ءَ راجانی زِندمان ءِ ھونریچیں داستان ءَ تو وھدے وان ئے گُڑا ترا ھمے درونت دست کپ اِیت کہ چہ جنگ ءُ چوپاں پد نوں راجاں سر پہ زیبائیں دمگ ءِ اِیمنیں گْواش ءَ سر کُتگ ءُ بھشتیں مرزبُوم ءِ وتواجہ ءُ ھُدابُند بوتگ اَنت ، چی ءَ کہ گیدی ءِ راجدپتر ءَ اے منّانک ترا کدی دست نہ کپ اِیت کہ راجاں پہ چاپ ءُ چوگان وتی مِنزل بُرّ اِتگ ۔
ءُ اے جنگ ءُ چوپ اے ھاتِر ءَ نا کہ اِنسانیت ءِ واستا زوالے ودی بِہ بیت ، بلکیں ھر راج ءَ وتی ڈیھ ءِ پاسپانی ءَ ، وتی رکّینگ ءِ ھاتِر ءَ گوں زُوراکاں جنگ کُتگ ءُ وت ءَ رکّینتگ دانکہ مئے باندات گُبار اندیم مہ بیت ۔
ھمے داب ءَ مرچی بلوچ راج ءِ چَول باھندیں ورنا وتی گُلزمین ءِ پانپاہی ءَ جنگ ءِ پِڑ ءَ ساڑی اَنت دانکہ مئے آیوکیں پدریچ وتی جِند ءِ مِسکیں ڈگار ءِ وتواجہ ءُ واھُند بِہ بیت ۔
پمیشکا مرچی بلوچ راج ءِ اَھد نویسیں پِدائیگ وتی سر ءُ ساہ ءِ دیمونی ءَ دَیَگ ءَ اَنت داں مئے راج گیدی ءِ راجدپتر ءَ رُزوائی ءِ بدل ءَ زِندگ بِہ مان اِیت ۔اگاں کسے سرپد بیت کہ وتی رکّینگ ءِ جنگ ھراب اِنت ءُ دُگنیا مارا ناشرکاری ءِ نِگاہ ءَ چار اِیت ، مئے سیاسی چِست ءُ ایراں دلگوش نہ دنت یا مارا ھما مھلوک ءَ گوں شُمار کنت کہ اے دمگ ءُ میان اُستمانی اِیمنی ءَ شِردانک ءَ مینگ لوٹ اَنت۔۔۔۔۔پہ آیاں منی لھتیں جُست چو اے وڑ ءَ اَنت ۔
اگاں دُگنیا ءِ نِگاہ ءَ بلوچ راج ءِ اے پِدائیگ ناشرکاری یے ، گُڑا پہ راجی ھستمان ءِ رکّینگ ءَ چے پکار اِنت۔۔۔۔دانکہ بلوچ راج وتی آکبت ءَ بِہ رکّینیت۔۔۔۔۔۔؟؟
دُگنیا ءُ چہ گیدی ءِ ھر اُستمان ءَ بلوچ راج اے جُست ءَ کنت کہ تو وتی راجپھازی ءِ جُھد ءَ وھدے زلمان ءُ بے دزرس بوتگ ئے ، گُڑا پرچا جنگ ءِ راہ گچین کِتگ۔۔۔۔۔۔؟؟
بائِد ھمیش اَت تو تھنا وتی جاک ءُ جلل برجاہ بِہ داشت اِیں دانکہ تئی تھاریں شپ بانگواہ بوت اِیں ، بلے اے جِست ءِ پسّو ھر یکّے ءِ گْور ءَ ھمے بیت کہ پہ ما بید ء جنگ ءَ دِگہ ھِچّ راہ ءُ در پش نہ کپتگ ، پمیشکا ما پہ وت زِند کَولیگیں راہ گچین کُتگ ءُ پہ ھر رنگیں دیمونی ءِ دَیَگ ءَ ساجو بیتگیں ، اگاں نا زُوراکاں مئے نام ءُ نِشان ، پدرند گار کُتگ اِت اَنت ۔
ھمے وڑ ءَ بَہ کَول ء دُژمِنیں ریاست گْوش اِیت ، لھتیں نام گِپتیں دانشمند ءُ سروک ھم گْوش اَنت کہ بلوچ راجی رھشُون واجہ ڈاکٹر اللہ نِزر بلوچ راست ءُ تچکیں دگ ءَ راھی نہ اِنت کہ آ ورنایاں مرگ ءِ امبازگ ءَ رھادگ کنگ ءَ اِنت ، گُڑا اے رنگ ءَ ماوزے تُنگ ، چی گویرا ، ھوچی منہ ، کاسترو ، کمل سِنگ ءَ ھوار کُل ھما رھشُون گُناھکار اَنت کہ آیاں وتی ورنا ڈیھ پھازگ ءِ سِکین داتگ اَنت۔۔۔۔۔۔۔
چوش کہ سیاسی پِڑ ءَ اگاں پاکستان ءَ بلوچ راج ءِ راجی توار دلگوش بِہ داتیں ءُ چہ بلوچ ءِ ڈیھ ءَ درکپت اِیں۔۔۔۔۔ڈاکٹر اللہ نِزر بلوچ گوں سنگتاں زِندان ءِ اندر ءَ گوں ریز ءُ سانکلاں بندگ نہ بوت ۔ لٹّ ءُ کُٹّ کنگ نہ بوت ، بلوچ پُسّگ گار ءُ بیگواہ ، شھید کنگ نہ بوت اَنت ۔
بلے! اے ریاست ءَ کُل سرپد ءُ شیوار اَنت ، اگاں انگت کسے پاد ءَ زُور پِر دنت ءُ ھبر ءَ گاجلی کنت ، گُڑا من یک نوکباھندیں نبشتہ کارے ءِ بِستار ءَ بس ھمے گْوش آں آئرا وتی لیکہ ءُ زانت ءِ آپ وت گْواز کنگی اِنت کہ چینچو جُھل اِنت۔۔۔۔۔۔۔۔۔من زِیراپ بَہ آں یا نا ، بلکیں بلوچ راج کُلّاں زانت ءُ سرپد اِنت کہ کَے کُجام پدیانک ءَ اُوشتاتگ ، چی ءَ کہ اے پِگر ء مجید برگیڈ ءِ اَھد نویسیں پِدائیگاناں وتی ساہ ءُ سر چو سر ءَ بار نہ اِنت کہ پہ مِرگ ءَ شات ءُ گل بِہ بَہ اَنت ، بلکیں آیاناں یک لیکہ ءُ مکسدے اے مرگ ءِ بگلگیر کنگ پرما اِیت ۔ آ مکسد بلوچ اُستمان ءِ ابدمانیں زِندمان ءُ مِسکیں ڈگار ءِ بے مُلّیں مھر اِنت کہ زِندگ بُوَگ ءِ ھاتِر ءَ مرگ ءِ بگل کنگ ءَ پرما اِیت۔۔۔۔۔۔
بِہ کَول ء بلوچ نیشنل موومنٹ ءِ بُنجاہی کماش واجہ کلیل بلوچ کہ جاھے وتی زانت چکاریں گُشتانک ءِ تہ ءَ گْوش اِیت ، اگاں تو لوٹ ئے کہ من پہ مُجّتی زِندگ بِہ ماناں۔۔۔۔۔۔۔۔۔۔گُڑا پہ شرپداریں مرگ ءِ امبازگ ءَ کدی لپرزگ ، چک ءُ پد مبو ، بلکیں مرگ ءِ امبازگ ءَ گامے دیم ءَ کِنز ءُ آئی ءَ توار بجن کہ من پہ ابد زِندگ بُوگ ءِ ھاتِر ءَ تئی امبازگ ءَ ھر ساھت ءُ دمان ساڑی آں۔۔۔۔۔۔۔
ھمے ھبر ءِ گواہ اِنسانیت ءِ بُن دپتر اِنت کہ زُوراکاں اِنسانیت مُدام لپاشتگ بلے ایردستاں مُدام بیرک بُرز داشتگ ، مرچی ھم ، ھمے درچ برجاہ اِنت ۔ پہ منّانک یو این او اِنت کہ چین ءِ بیھارانی دیم ءَ بلوچ راجی راجپھازاں ناشرکار گْوش اِیت ، بلے دومی نیمگ ءَ یورپی یونین ءِ کلوہ ھم پہ بلوچ راج ءَ کُجام داب ءَ کَیت ۔ اے کُل مارا چارگ ءُ وانگ ءَ ھوار وتی راجی تاکت ءِ مُھکم کنگ ءِ سِکین ءَ دے اَنت کہ دُگنیا چہ اِنسانیت ءَ گیش تاکت ءِ منّوگِر اِنت ، اگاں بلوچ راج وتی تاکت ءَ ھمُک گام ءَ گوں مُھکمی ءَ دیم ءَ شھار دنت۔۔۔۔جزمّاں باندا ھمے یو این او وتی گْوشتگیں گپ ءِ سر ءَ پشومانی درشان کنت ءُ بلوچ راج ءَ وتی ڈیھ ءِ پاسپانیں آجوئی ءِ جنگول گْوش اِیت کہ اے ناشرکار نہ بلکیں وتی ڈیھ موکگ ءِ جنگ ءَ کنگ ءَ اَنت ، اگاں کسے ، کسے ءِ ڈیھ ءَ پہ زُور ءُ زبردستی کْوزہ کنت ، گُڑا آئی ءِ اِنسانی ءُ راجی پرز بیت کہ آ وتی ڈیھ ءِ پانپاہی ءَ ھر رنگ ءَ بِہ کنت ۔ مرچی بلوچ راج کہ بے وس ءُ زلمان اِنت ، پمیشکا آئی ءَ را دِگہ راہ ءُ در نیست کہ دُگنیا ءَ گْوانک بِہ جنت کہ منی ڈیھ ءِ سر ءَ پاکستان ءَ پہ زُور کْوزہ کُتگ ءُ شُما منی کُمکّ ءَ بِہ کن اِت ۔
پمیشکا من گُڈّی ءَ پد ءَ ھمے گْوش آں مارا وتی راجی تاکت مُھکم ءُ توانمند کنگی اِنت ، اگاں ما وتی راجی تاکت مُھکم کُت گُڑا پاکستان پہ زِیر زمین بُوَگ ءَ دیر نہ کنت ، ءُ دُگنیا ھم مئے راجی توار ءِ گوشدارگ ءَ کدی وت ءَ دُور نہ دار اِیت۔۔۔۔۔۔۔۔
