ما کُل موسُمی مردُم ایں ، اَنچوش کہ هامین ءِ وهد ءَ دِهکان گَلّہ ءِ سُد ءُ سما ءَ نہ بیت ءُ گلّہ ءِ وهد ءَ هامین ءِ ۔ ما هَم همے داب ءَ ایں ۔۔۔۔ موسُمی ایں ۔ ۔۔۔۔هَر جیڑه کہ بنت ما یک ءُ دوئیں روچاں وتی پدردی ءَ پدّر کن ایں ءُ پد ءَ شموشکار بِہ ایں نہ گُشئے هِچّ چُشیں جیڑهے بوتگ مئے زمین ءِ سر ءَ ——
بِندات ءَ کہ بلوچ ءِ گار ءُ بیگواهی ءِ جیڑه ءَ رُدوم زُرت ما درُستاں توار چِست کُت دگانی سر ءَ اَتک ءُ زهرشانی کُت۔ پد ءَ کہ اِے جیڑه هروچی یے بوت ۔ هَر لوگ ءَ کسے گار ءُ بیگواه، کسے شهید کنَگ بوت۔۔ ما آدی بوت ایں۔ ما هیل کُت کہ ما گُلامیں راجے ءِ پرزِند ایں ۔ مئے سر ءَ گنتِریں وهد اَتک کُت کنت——-
ما گِرگ بَہ اِیں۔۔ گِر کنَگ بَہ اِیں۔۔ کُشگ بَہ اِیں۔۔ زِندانی بَہ ایں۔۔ مارا بے اِزت کنَگ بیت ۔۔ پرچا کہ ما گُلام اِیں ۔۔ لگتمال اِیں—-
وهد گْوزان بوت ما هیل کُت بازیں گیشی یے هَم سگّ اِت ۔ بے وس بوت اِیں نوں همروچ مئے برات ءُ پِت آوار جنَگ بنت ءُ ما وتی زِندمان پیسری ڑول ءَ گْوازینگ ءَ ایں پرچا کہ وهد گْوزان بیت درد ءُ اندو ودیگ بنت مردُم آدت کنت پد ءَ ما وَ گُلام ایں راجے ءَ چہ زانگ بِہ ایں ءُ گلام زوت شموشکار بیت…
چیزے روچ پیسر شھید ملِکناز بلوچ کیچ ءِ هند ڈنُّک ءَ تیرانی آماچ کنَگ بوت۔ آئی کسانُکیں جَنک برْمش زدگ کنَگ بوت ءُ هپتگے ءَ رند کُلسوم پہ کارچ جنَگ ءُ کُشگ بوت تمپ ءِ هند دازن ءَ آئی چکانی دیم ءَ —–
ما سرجمیں بلوچستان ءِ مردُماں چَہ واب ءَ بُست کُت توار چِست کُت زهرشانی کُت روانک کشّ اِت کہ ملکِناز ءُ کلسوم ءِ کشوکاں کُشگ بِہ بنت برْمش ءُ کلسوم ءِ زهگاناں اِنساپ دیَگ بہ بیت ۔ پد ءَ یَک برے مارا رد دیَگ بوت کہ کُشّوک گِرگ بوتگ اَنت ءُ زوت راج ءِ دیم ءَ آرگ بنت۔
ماهے بیت بلوچ نودربر پہ وتی دامگی کلاسانی بگیری ءِ هاتِر ءَ زهرشانی کنَگ ءَ اَنت پرچا کہ بلوچستان ءِ گیشتریں جاهاں دامگ نیست۔۔ زی وهدے کہ ڈاکٹر مهرنگ گوں دِگہ نوربرانی همراهی ءَ زهرشانی کنَگ ءَ بیت آهاناں لٹ شاپ کنَگ بیت۔ گِرّان کنَگ بنت دگانی سر ءَ پد ءَ ماں آزار جاهاں برگ بنت . مهرنگ ناکہ سیاست کنَگ ءَ اِنت ، ءُ ناکہ دِگہ لوٹ کنَگ ءَ اِنت آ تهنا وتی وانگ ءُ زانگ ءِ ھاترا جُھد ءَ اِنت ۔ پرچہ کہ وانگ آئی بُنکی ھک اِنت ۔ ءُ مَھرنگ ءِ جھد ھمے داب ءَ روان کنت ۔۔ باریں دِگہ چُنت مھرنگ ودی کنت بلوچستان ءِ دلبند ۔۔۔
