دو ھزار چار ءِ اپریل ءِ ماہ اَت، من وتی لوگ ءَ نشتگ اتاں کہ منی ھمساھگے اتک من ءَ گشت ءِ ڈن ءَ ترا دو مردم لوٹگ ءَ اِنت۔ گُڑا من ڑن ءَ دراتکاں گنداں کمپان ءَ چہ ڈن منی مھمان ھانہ ءِ دپ ءَ دو مردم اُوشتاتگ ات۔
من زوت مھمان ھانہ ءِ نیمگ ءَ شُتاں۔ سلام ءُ دوا ءَ پد آپ ءِ آورت ءُ مھمان ءَ دات۔ ھمے مھمان ءَ چہ یکے من دُرست کُت کہ مئے بازار ءِ نادرہ جاہ ءِ ڈاکٹر ات کہ آ مشکے ءِ جھمنند اَت۔۔دومی من دُرست نہ کُت۔
من چہ ڈاکٹر ساھب ءَ چہ جُست گپت کہ اے مرد کئے انت؟ ڈاکٹر ءَ پسو دات کہ اے سنگت ڈاکٹر دین مھمد بلوچ انت ءُ تئی گندگ ءَ اتکگ۔۔
چوناھاں من ڈاکٹر دین جان ءِ نام باز رند ءَ اُش کُتگ اَت بلے آئی ءِ گون ءَ من کدی ھم دُچار نہ کپتگ اتاں۔۔چاہ ءُ آپ ءَ چہ رند گپ ءُ تران بِندات بوت۔ ڈاکٹر دین جان ءَ گُشت کہ مروچی بلوچ راج ءِ تھا یک نوکیں پارٹی ءِ یک نوکیں زرمبش ءِ ودی بوتگ کہ آئی ءِ سروکی ءَ واجہ گلام مھمد کنگ ءَ اِنت۔ مئے ءُ شمے کُلانی زمہ واری انت کہ گوں واجہ گلام مھمد ءِ ھمراہ داری بکنیں، بی این ایم ءَ مضبوط بکنیں۔ شھید فدا بلوچ ءِ کاروان ءَ دیم ءَ بہ بریں۔۔ڈاکٹر دین جان ءَ بازیں گپ جَت ءُ گُڈی ءَ منا گشت ءِ کہ لَھتیں روچ ءَ چہ پَد آواران ءَ دگہ لھتیں سنگت بیار گوں پارٹی ءِ کارانی بارو ءَ ما ءُ شما دیوانے کنیں۔۔
لھتیں روچ ءَ رند من دگہ دو سنگت ءِ ھمرائی ءَ آواران ءَ شُتاں سنگت مئے ودار ءَ نشتگ اِتنت۔ پدا دیوان بِندات بوت ءُ ڈاکٹر دین جان ءَ دیوان ءَ گپ جت ءُ سنگت جوانیں رنگے ءَ بی این ایم ءِ مُول ءُ مراد ءِ سرپد کُت انت۔ھمے دیوان ءِ تھا پارٹی ءِ مرکزی سرکولر ونت ءِ کہ ڈاکٹر میران بلوچ اعزازی سنٹرل کمیٹی زورگ بوتگ۔ من جُست کُت کہ ڈاکٹر میران کئے انت؟ گڈا ڈاکٹر دین جان ءَ منی نیمگ ءَ چارات ءُ کندگے جت ءِ دراھینت ءِ کہ ڈاکٹر میران ڈاکٹر دین مھمد بلوچ انت۔
دیوان ءِ تھا بی این ایم ءِ کارانی ھوالہ ءَ شریں وڈے ءَ گپ ءُ تران بوت۔ گڈا دیوان ءِ تھا ھمے سوڈگ چہ پد من ءِ چیف اسلم بی این ایم آواران ءِ آرگنائزر جوڈ کنگ بوتاں۔
پارٹی ءِ کارانی ھوالہ ءَ مدام ڈاکٹر دین جان گوں ھال ءُ اھوال بوت۔ چوناھاں منی بی این ایم ءِ آھگ ءَ منا سرپدی دئیگ ءَ ڈاکٹر
دین مھمد ءِ بَلاھیں کردے بوتگ۔
وھد گوں تُرندی ءَ دیم ءَ جُنزان ات۔ دو مئی دو ھزار چار ءَ ما شال ءَ بی این ایم ءِ سیشن بوت۔ سیشن ءَ ھمے سوڈگ کنگ بوت کہ لبز بلوچستان کَشّگ بہ بیت ءَ بلوچ ایر کنگ بہ بیت۔ساری ءَ بلوچستان نیشنل موومنٹ ات پدا بلوچ نیشنل موومنٹ ایر کنگ بوت ءُ ڈاکٹر دین مھمد یکرندے پدا سی سی زورگ بوت۔
ڈاکٹر دین مھمد بی این ایم ءِ بُن ھِشت ءِ ایر کنوکاں چہ یکے۔ڈاکٹر دین مھمد واجہ گلام مھمد ءَ گوں ھوار بی این ایم ءِ سوگند وارت کہ ما شھید فدا ءِ کاروان ءِ دیم ءَ برگے ھاتر ءَ ھر وڈیں کُربانی دئیگ ءَ چک ءُ پد نہ بئیں۔۔
ڈاکٹر دین مھمد بلوچ بلاھیں زانتکار ءُ سرپدیں مردمے ات۔ سکیں ھاضر جوابیں ءُ نہ ترسیں مردمے ات۔ ڈاکٹر دین مھمد ءَ ھر کس ءَ دیم پہ دیم ءَ گپ گُشت ءِ آ گل ءِ زمہ داریں سنگتے بیتیں شر، یا دگہ ھندی میر ءُ مھتبرے بیتیں شر۔۔۔ ڈاکٹر دین مھمد ءَ ھر کسی دیم ءَ وتی تچکیں ھبر کُت۔۔
بلوچ راجی زرمبشت ءِ تھا ھزاراں سنگت گار ءُ بیگواہ بنت ءُ بازین ءِ شھید بنت۔ بلے لھتیں سنگتانی بیگوائی یا شھادت سک تورناک بیت۔ اے ھمے سنگت بنت کہ راجی زرمبشت ءَ اشانی سک باز زلورت بیت۔۔ ھمے سنگتانی تھا زاھد جان ءُ زاکر جان ءَ ابید ڈاکٹر دین مھمد بلوچ ھم ھوار انت۔۔
ھما سنگت کہ شھید بنت کُلیں سنگت پارٹی ءِ ھاتر ءَ کُربانی دئیگ ءَ اَنت بلے لھتیں سنگت ءِ سک باز پارٹی ءِ تھا یا کہ بلوچ راجی زُرمبشت ءِ تھا آیانی زلورت ھست انت ھمیشانی تھا یکے ڈاکٹر منان جان، رزا جھانگیر۔۔۔۔۔۔۔۔
مروچی بیست ءُ ھشت جون دو ھزار بیست انت ڈاکٹر دین مھمد بلوچ ءِ آوار جنئگ ءُ بیگواہ کنگے یازدہ سال سرجم بوت۔
ڈاکٹر دین مھمد ءِ درگیجگ ءِ ھاتر ءَ آئی ءِ چُک سمی بلوچ گوں ماما کدیر بلوچ ءِ ھمرائی ءَ شال تا اسلام آباد ءَ پیادگ لانگ مارچ کنت۔۔سمی گُشیت منی چم انگت راھچار انت کہ باریں کدی منی کماش منی مھروانیں ابا ڈاکٹر دین جان واتر کیت ءُ مئے چم سارت بنت۔۔۔
