لبنان کی وزارت صحت کا کہنا ہے کہ جنوبی لبنان میں اسرائیلی فوج کی کارروائیوں میں کم از کم 22 افراد ہلاک اور 124 زخمی ہو گئے ہیں۔ لبنانی انتظامیہ کا کہنا ہے کہ علاقے سے اسرائیلی فوج اور حزب اللہ کے جنگجوؤں کے انخلا کی ڈیڈ لائن ختم ہو جانے کے باوجود اب بھی اسرائیلی فوج ملک کے مختلف علاقوں میں تعینات ہے۔
لبنانی اور اسرائیلی افواج کے علاوہ اقوام متحدہ کی جانب سے بھی خبردار کیے جانے کے باوجود اتوار کی صبح ہزاروں باشندے سرحد سے متصل قصبوں اور دیہاتوں میں واپس چلے گئے، جن کے بارے میں انھیں بتایا گیا تھا کہ یہ علاقہ غیر محفوظ ہیں۔
اسرائیلی فوج کا کہنا ہے کہ اس نے لوگوں کو خبردار کرنے کے لیے انتباہی فائرنگ کی تھی۔ تاہم ان کی جانب سے یہ نہیں بتایا گیا کہ آیا ان کی فائرنگ کے نتیجے میں کسی کو گولی لگی ہے یا نہیں۔ اس کے علاوہ اسرائیلی فوج کی جانب سے کچھ افراد کو حراست میں بھی لیا گیا ہے۔
اسرائیل کا کہنا ہے کہ حزب اللہ کے ساتھ 60 روزہ جنگ بندی کے معاہدے پر مکمل طور پر عمل درآمد نہیں کیا گیا ہے اور یہ واضح نہیں ہے کہ اس کے کتنے فوجی لبنان میں رہیں گے یا وہ کتنے عرصے تک رہیں گے۔
لبنان کی وزارتِ صحت کا کہنا ہے کہ اسرائیلی فوج کی جانب سے لوگوں پر اس وقت حملے کیے گئے جب وہ ان علاقوں میں داخل ہوئے جو اب بھی اسرائیل کے قبضے میں ہیں۔
وزارتِ صحت کے مطابق ہلاک ہونے والوں میں خواتین بھی شامل ہیں جبکہ زخمیوں میں عورتیں اور بچے بھی ہیں۔
لبنانی فوج کے مطابق اسرائیلی فائرنگ سے ان کا ایک فوجی ہلاک اور ایک زخمی ہوا ہے۔
