پیرک مئے اھدءِ لیوڈمیلا- انجیــــرو بلوچ

جنگانی کسہ کنگ وش انت بلے جل ھما نرمزاراں کہ پہ وتی راجءُ ڈیھءَ انچیں جنگ کن انت کہ چہ آھانی جنگاں دژمن تھ پروش بیت ھمک پڑءَ
ھمے نرمزاریں شیرانی اھدءَ شھید پیرک جان ھم ودی بیتءُ پہ وتی بزگیں راجءِ لاچاریءَ تپنگءَ بڈا جنتءُ کوھاں در کپیت
چوناہا شھید پیرک جانءِ امر کسان بیتگ بلے پگرئِےِ یک رستگءُ توامیں پگرے بیتگ.آئیءَ گوں وتی ھمے پگرءَ دژمنءُ آئیءِ داشتگیں منڈی چمانی واب برتگ. دژمنءَ پہ پیرک جانءِ پد کنزگءَ وتی توامیں ھیلہءُ ھنر آزمودگ انت. لبءُ ملام ببیت یا پہ ترسینگ بلے دژمنءِ پندل پیرک جانءِ دیما ھما آپءَ کپتگیں پوڈءِ بستارءَ بیتگ انت. آئیءَ دژمنءِ ھمک ھیلہءُ پندل شر ماراتگ انتءُ گوں وتی مھکمیں پگرءُ بھادری ءَ چہ گوں سوب مندیں جنگاں دژمنءَ را جواب داتگ
لگوریں دژمن چہ شھید پیرک جان انچش بیمءِ آماچ بیتگ کجا کہ دژمنءِ سرا ترندیں ارشے بیتگ گڈا آئیءَ پیرک جانءِ نام وتی دروگیں ایف آئی آر آنی توکا مان کتگ چہ ھمے ھبراں ساپ زاھر بیتگ کہ دژمن چینچو بے وس انت بلوچءِ نرمزاریں بچانی دیما
کجام وھدءَ کہ پوج الاکہءَ پترتگ گڈا آئیءِ اولی کار ھمیش بیتگ کہ شھیدءِ لوگاں اتکگءُ زھگءُ زالبول لٹءُ کُٹ کتگ انتءُ لوگ مانداشتگاں. آئیءَ وتی دلءَ گشتگ کہ من پیرکءَ پہ بیمءُ ترس پدا کنزیناں بلے اے ھبر پیرک جان شر زانتگ انت کہ ایش پندل منی نہ دمبروکیں کدماں پشتءَ برت نہ کن انتءُ آئیءَ وتی جنگ ھما رنگءَ دیما برتگ کہ یک سرمچارےءِ سرا الم بیتگ
کسےءَ کہ پیرک جان دیستگءُ آئیءِ ھمراہ بیتگ آ بس ھمے سرپد بیت کہ پیرک یک توامینءُ مھکمیں سرمچارے بیتگ
گژن تن درتہ پچی شپادی آئیءَ اے کلیں بزگی ھچ موہ نہ داتگ انت کہ ایش منی گاماں بدارنتءُ منا پد کنزگءَ لاچار بکن انت. ھروڈیں وھدءُ ھالت بیتگ انت بلے پیرک جانءِ تب گوں کل ھمراہءُ سنگتاں یک ڈول بیتگ انت.آئیءَ وتی ھمراہءُ سنگت ھچبر اے مارگءِ موہ نہ داتگ انت کہ دژمن منی پشتءَ اینکہ پندل سازگءَ انت بس ھروھدءَ پہ کندگ آئیءَ دژمنءِ ھمک پندل لگتمال کتگ. پمیشکا من گشاں آ مئے اھدءِ لیوڈمیلا انت. لیوڈ میلاءِ کسہ ھم گوں شھید پیرک جانءِ بھادریءُ دلیریءَ ھمکدءُ یک رنگ انت
انچو کہ لیوڈ میلا دومی جھانی جنگءَ ھٹلرءِ پوجءِ دیما اوشتاتگءُ وتی ھمراہءُ سنگتانی پہریزگءَ ھچبر پد نہ کنزتگ اتگ.
شھید پیرکءِ نشانگ ھم کدی چو لیوڈمیلاءِ ڈولءَ رد نہ بیتگ کجا کہ آئیءَ تپنگ برداشتگ گڈا تیرءَ وتی نشانگ رد نہ کتگءُ ایدگہ رکیتگیں پوج پہ تچگءُ روگءَ لاچار بیتگءُ وتی کیمپانی توکا وتی ھمراھانءَ بس ھمے گشتگ اش کہ کجام روچءَ اگہ مئے مردم جنگےءَ کپت انتءُ آھانی نیم ھم پش کپتاں گڈا ھمے بزان ات کہ اے جنگءَ لیوڈمیلا گون نہ بوتگ پیرکءِ ھم دیما دژمنءَ پدا کسہ نہ کتگ کہ ما جنگءَ کپتگءُ رکتگاں.
بلے من شھید پیرک جانءَ چہ لیوڈمیلا ھم مسترءُ نشانگ باز تریں سرمچارے گشاں. چیا کہ لیوڈمیلا چہ کسانیءَ وتی ھمساھگےءِ گورا نشانگ سازی ھیل کنتءُ شھید پیرک جان وت ھیل کُتگیں نشانگ سازے بیتگ.
اے رنگیں سرمچارانی ودی بووگءَ کرن ھم پکار بنت بلے ھرکس وتی اھدءَ وتا نامدارءُ ڈولدار کنت
یکے پہ وت مریت بلے آئیءِ نامءُ توار ھلاس بیت دگہ یکے پہ راجءَ وتی ساہءَ کربان کنت بلے نہ مریت راجےءِ پسگاں زندگ کنتءُ ھمے سکین دنت کہ مرگءَ پد زندگ بووگءِ نام پیرک انت چیا کہ شھید پیرک جانءُ آئیءِ ھمراہءُ سنگتانی ءُ بلوچ ڈیھءِ ایدگہ نرمزارانی پہ گلزمینءِ رکھینگءِ وتی گراں بھاءُ بے مٹیں سرانی کربان کنگ پہ مئے واستہ رُپتگءُ ساپ کتگیں کشک انت بس ھمے ساپیں کشکءَ بلوچ بگیپتءُ دیما بروت آروچ ھچ دور نہ انت کہ بلوچ وتی مالءُ ملکتانی واجھیءَ وت کنت. شھید پیرک جانءِ کلوہانی دیما برگ بلوچ راج ءِ پسگءِ سرا المی انت.