پاکستان کے صوبہ خیبر پختونخوا کے ضلع کرم میں فورسز چیک پوسٹ پرعسکریت پسندوں کے حملے میں 6 اہلکارہلاک اور 7 زخمی ہوگئے۔
ذرائع کے مطابق خیبرپختونخوا کے ضلع کرم میں لوئر کرم کے علاقے بگن کے قریب ایف سی 156 ونگ ٹل اسکاؤٹس کے پوسٹ پر نامعلو م عسکریت پسندوں نے بھاری اور خودکار ہتھیاروں سے حملہ کیا۔
حملے کے نتیجے میں 6 ایف سی اہلکار ہلاک ہوگئے جن میں نائب صوبیدار خالد بنگش، حوالدار جدید اورکزئی، لانس نائیک ولایت حسین طوری، لانس نائیک شہید الرحمٰن، سپاہی نظام الدین محسود اور سپاہی صفت اللہ آفریدی شامل ہیں۔
چیک پوسٹ پر حملے میں 7 اہلکار زخمی بھی ہوئے جن میں ثواب گل خٹک، نائیک سعید خان خٹک، نائیک عابد حسین خٹک، لانس نائیک طاہر بنگش، سپاہی عامر سہیل آفریدی، سپاہی طیب الرحمٰن اور سپاہی توحید اللہ مروت شامل ہیں۔
زخمی ہونے والے تمام اہلکاروں کو سی ایم ایچ ٹل پہنچا دیا گیا ہے جب کہ سیکیورٹی فورسز اور پولیس نے علاقے کو محاصرے میں لے کر واقعے کی تحقیقات شروع کر دی ہے۔
