شھید پیرک جان جھد آجوئی ءِ نمیرانیں کارست – نبشتکار،، ڈاکٹر جلال بلوچ رجانکار، ھنیپ بلوچ

وھدےکہ زمین ءِ تُنّ وتی گُڈّی ءَ سر بیت تَہ جمبر مان کش اَنت،گْرند ءُ گْروک بیت،ابرم ھمے آس ءُ تُنّ ءِ سیرآپ کنگ ءَ کُدرت شیپ ءُ کوراں زمین ءِ راہ ءَ پیشداریت تاں زمین سیرآپ بہ بیت ءُ سبزہ زار بِہ تِْرک اَنت۔ھمے وڑ ءَ وھدےکہ چاگرد ءَ زوراکی وتئ گُڈی سیمسراں سر بیت گڑا آشوبی کاینت ءُ راج ءَ راہ نشان دیئنت،پہ جُھد ءَ دیمونی دیئنت ءُ گوں وتی ھوناں سرڈگار ءَ سیرآپ کن اَنت تاں پہ آؤکیں پدریچ ءَ زمین سُھر بورودینیت۔نورا ءِ ستک ھم ھمیش اَت ءُ ایشی درنگاز آئی وتی گُڈّی کلوہ ءَ چو اے وڑ ءَ کُرت کہ ” اے جنگے مردم شھید بنت،سر رونت۔مئے راھشون شھید بیتگ اَنت۔ انشاء اللہ اے جنگ وتی مِنزل ءَ سر بیت،ماسوبین بیں۔“ھؤ نورا اے جنگے ءُ اے جنگ ءَ زمین ءِ بچ پہ منزل ءِ سر بیگ ءَ وتی نُگرھیں جانانی دیمونی ءَ دیئنت تاں آھانی ھوناں سرڈگار گُل ءُ گُلزار بہ بیت ءُ مدام آشوبی بُہ رودین ایت ءُ چہ دیمونیاں ابرم ءَ انچوش رُژنائی تالان بہ بیت کہ چہ زانت ءَ زبھریں مردماں پہ راہ ءِ ھک ءِ شوزاگ ءَ نگیگے ءِ دیمپانی مہ بیت۔ نورا ءِ اے گُڈی کلوہ کہ آ اے درگت ءَ چاریں نیمگ ءَ دُژمن ءِ اَنگِر ءَ ابید گوں چلتن ایں دلبڈیاں راج ءَ جُھد آجوئی ءِ راہ ءَ آرگ ءِ ھواری ءَ آھاں آجوئی ءِ شاتکامی ءَ گوشگ ءَ اِنت۔چوشیں کارست وتی کرد ءُ کارانی انگیز ءَ راجدپتر ءَ یک جتائیں جاھے ءِ واھُند بنت۔انچیں کارستانی کِرد ءِ تہ ءَ آجوئی ءِ کلوہ اندیم بیت ءُ ھرکس کہ چوشیں لیکھانی رندگیری ءَ کنت آ ھمے کِردانی رِد ءَ پہ وت جاہ جوڑ کنگ ءَ سوبین بیت۔
بلوچ جھد آجوئی ءَ ھزاراں بچاں پہ ماتیں سرڈگار ءِ آجوئی ءَ وتی جان ندر کُرتگ اَنت ءُ ھزاراں بچ گوں دُژمن ءَ دیم پہ دیم اَنت،ھزاراں دُژمن ءِ آزارجاھاں بندیگ اَنت کہ پہ آھانی ناماں مردم ءِ دل گْوش ئے درکیت۔بیت کنت کہ اے مردمی ابرم اِنت کہ ھزاراں مردمانی تہ ءَ لھتیں مردمانی سسا ءِ سر ءَ انچیں کشک رند انت کہ راجدپتر آھاں راھشونی ءِ نام ءَ یات کنت۔انیگیں بلوچ جُھد آجوئی ءَ چوشیں بازیں بچاں زْرمبشت گوں وتی ھوناں سیرآپ کُرتگ۔شھید نوراھمد (پیرک جان)ھم چہ ھمے کارستاں یکےکہ گومن آئی گند ءُ نند دسمبر2014ءَ بوت ءُ اے درچ تاں گُڈی وھد ءَ برجاہ اَت۔ نورا ءِ کرد ءِ درگت ءَ نبشتہ کنگ منی وڑیں مردمے ءَ ارزان نہ اِنت بلئے کمے چوش گْوشت کناں کہ نورا ءَ نورا مینگل ءِ نام ءُ وتی کرد برجاہ داشت، نورا ءَ زمین ءِ ھک ءِ پیلوکنگ ءَ ھمک چیز پُشت جتگ اَت، نورا ءِ ھمک چیز ءِ تہ ءَ سرڈگار ءِ مھر پدر اَت، نورا ءِ رگانی تہ ءَ سرڈگار ءُ راج ءَ گوں بندوکیں سوت ھست اَت کہ ایشانی واگری چہ آئی ءِ لُنٹاں گیش آئی ءِ کرد ءِ تہ ءَ گندگ بیت۔
یک چوشیں ھستی یے ءِ کرد درشان کنگ ءِ چمدار نہ اِنت، یک انچیں کارستی کہ یک دھکے ءَ سرڈگار ءِ ھزمت ءَ جاڑیگ بیتگ،یک انچیں کارستی کہ پہ ھمبلاں رُژنائی ءِ چراگے بیتگ،یک انچیں کارستے کہ سوبمندی ءِ نشانے زانگ بیت،آئی جتائی ءَ آ جاہ کہ ھورک بیتگ آجاہ ءِ پُر کنگ ارزان نہ اِنت ءُ اے ھم یک راستی یے کہ زْرمبشت ءِ گُل ءُ گُلزاریں زمین ءَ چہ ھمے کردانی تلام بیتگیں ھوناں کہ کْرومگ تْرک اَنت ءُ چہ آھانی رُژنائی ءِ شھماں آوکیں باندات ءِ توار آشکار بیت،کہ ایشی گوشدارگ ءُ الھان کنگ ءَ سرڈگار ءِ آشکانی تُنّ ھچبر ھلاس نہ بیت۔ھمے اشک ءِ انگیز ءَ آشوبی مدام ھمے اھد ءَ کن اَنت کہ دُژمن چنچو کہ بہ لوٹیت مئے ھوناں تلام بہ کنت ما ایشی ءَ مدام پہ وشی جاڑی اِنت۔چے ءَ کہ چہ آشوبیانی ھوناں سرڈگار سیرآپ بیت،بھاریں لیکھانی کارست تْرک اَنت،سرڈگار گُل ءُ گُلزار بیت،کہ ایشانی بو ءُ باساں انچوش گُمان بیت ھمے اشک اِنت کہ سرڈگار ءِ لیکہ ءَ انچیں رُژنائی یے تالان بیت کہ کور ھم راہ ءِ ھک ءِ شوھازگ ءَ سرگردان نہ بنت۔ شھید نورا جان ءِ کرد ءِ تہ ءَ ما ھمے چیزاں جوانی ءَ دیست کُرت کن ایں کہ آ مدام پہ سرڈگار ءَ ھمے ستک ءُ بیسہ ءِ سر ءَ مِرگ ءَ جاڑی اَت کہ آؤکیں پدریچ چہ زوراک ءُ زورگیری ءِ پھریزگ ءَ ھمے راہ ءَ گچین کن اَنت۔
او شھید نورا جان تو اے گپ ءَ شری ءَ سرپد اِت ئے کہ آجوئی ءِ جُھد آس ءِ دریا اِنت،کہ ایشی ءِ بِرانزاں آشوبی ھمے ستک ءَ وتی ھوناں تلام کنت ءُ آس ءَ توس ایت تاں آؤکیں پدریچ چہ آس ءُ ھون ءِ بازی ءَ ابید دیمروی ءِ شھدگ ءَ گاماں ایر بہ کنت ءُ استالانی جھان ءَ پاداں ایر بہ کنت ءُ نوکیں جھانے آباد بہ کنت شھید نورا جان ھمے ستک ءِ پُژدر ءَ تو وتی نگرھیں جان پہ سرڈگار ءَ ندر کُرت کہ یکبرے جان ءِ کُربان کنگ ءَ پد پدا من ھزار رند ءَ زندگ باں،چے ءَ کہ آؤکیں پدریچ سرڈگار ھمک ھما بچ ءِ تہ ءَ من ءَ شوھاز کنت،پہ آھاں ھرچیز بس سرڈگار بہ بیت ءُ تئ کرد اے گپ ءِ چیدگ اِنت۔ آ ھون کہ تو پہ سرڈگار ءَ ریتکگ اَنت،تئ سرڈگار الم آجو بیت ءُ سرڈگار پہ آؤکیں پدریچ ءَ سُھر رودین ایت،پد ءَ چوش بیت کہ شوھان ءِ سوت گوں لیلڑی ءَ بدل بیت،پد ءَ پہ اندوھیں چھرگاں بچکندگ تالان بہ اَنت۔